انقذوا زواجي وحياتي تعبت مره

السلام عليكم
من زمااان عن المنتدى لي اكثر من ٣ سنوات مااحطيت موضوع وهالحين جايه بمشكله اتمنى الاقي لو جزء بسيط لها
انا متزوجه لي ١٢ سنه وكانت اموري انا وزوجي تمام الحمدلله عندي طفلين .. فجأه خلال سنتين اللي طافت حسيت بنفور من زوجي ادور الزلّه عليه واهاوشه واجبس باليومين ما اكلمه .. هو طيب معي لكنّه شوي مايهتم بمظهره العام .. ريحة فمه مرررره كريهه ويستخدم التمباك ..العلاقه الحميميه اكسسس احس اني ماابي ذا الشي منّه اكررهه واتهرب منه.. نجلس مع بعض مانسولف احس اني متنرفزه منه دايم وكارهه اني امزح معه فجأه صرت انفر منه ماابيه افكر دايم ان علاقتي معه راح تنتهي بالطلاق بيوم من الأيام .. بس اللي يكسر ظهري عيالي مره متعلقين بأبوهم وهو كذلك.. تعبت نفسيتي مررره حتى وقت النوم اذا قرّب مني عصَبت عليه وزعلت مابيه احس جسمي يقرّصني منه احس مابيه حتى يسلم علي او يضمني او يلمسني مابيه يأمرني ولت يقولّي سوّي وافعلي .. مادري وش فيني بالرغم ان ابداً ماكنت كذا ابداً .. الحين بزياده وكل ماجيت ابي اروح لطبيب نفسي أو استشاري اجتماعي الاقي الإستشاره غاليه عندهم وانا ماعندي الإمكانيه .. ياليت اللي مرت بحالتي تعلمني وش سوّت وكيف عالجت الموضوع لأن تعبت من حياتي احسها كئيبه مرررره نفسيتي مره تعبت جداًً صرت انسانه عصبيه وأعصب من اي احد يعارضني برأي او مايسوي اللي ابي على طول اتنرفز واعصب .. وش الحل ياعالم احس حياتي مندمره حتى الضحك ماصرت اضحك وهالشي ملاحظينه اطفالي .. لدرجة اذا ضحكت استغربوا عيالي وطاروا من الفرحه وانا حاسه اني متعبتهم معي وش اسوي حاولت اني اعدل نفسيتي كثير مااقدرت ارجًوووكم وقفوا معي 😭