انقذوا ما بقي من شعري

السلام عليكم ورحمة الله وبركاته
هذا الموضوع موجه لينبال ولكل من يستطيع مساعدتي
فأنا اثق بتجاربك ونصائحك بدون تفكير ومن ثم كل خبيرة ومجربة ممكن تفيدني لا عدمتكم جميعاً.
لازم اديكم فكرة عني :
انا مسوية عملية تحويل مسار المعدة والامعاء من سبعة سنين وما شفت خير من بعدها الحمدلله على كل حال وبالذات من ناحية الجلد والشعر. فأنا لا يوجد عندي امتصاص للفيتامينات والمقويات وعندي ضعف عام ولا فايدة سوى ان اتعايش معاه وبرضو باتناول المقويات ولا اتركها واكلي قليل جدا ولا يهضم لانه ما عندي معدة ولا معظم الامعاء.. وعندي جفاف دايم بسبب قلة القدرة على شرب الماء ولكنني اشرب ايضا ولا اترك الماء ابدا. يعني سوء تغذية مع سوء تروية . وماله حل طبيا حاليا فلام اتعايش معاه وبس. والحل معا هاني اهتم بشعري من الخارج بما انه مافي تحكم من الداخل على الاقل.
النتيجة شعري صار خشن وناطط لفوق يعني كاشش ومنفووووووووووووش ويتكسر ، نفس الشعره تتفتت ومقصف.. بالذات بعد ما صبغت .. انعدم اكتر.. وحاليا بيتساقط اظن لانه نمت مرتين وفي فروة راسي زيت .. وما يطول الا بالسنة يمكن انش بالكثير .. وبدات اصلع من قدام .. جبيني صار عريض عن طبيعته وكل ماله بيزيد عرض.. وشعري رغم اني في الثلاثين صار مرعب .. الشعر الابيض غزاه ومن قدام 50% من شعري ابيض .. يعني نصفه الشعرات اقرب للخصل لونها ابيض
وطبيعة شعري اصلا جاف جداً .. وزاد .. وما تناسبني الكريمات قد ما تناسبني الزيوت الطبيعية وبالذات السمسم والنارجين لكن ما اعرف حل لريحتهم هل في مادة احطها عليهم تودي ريحتهم بدون ما تؤذي راسي وشعري لانه لازم يكون شعري طول الوقت مدهون بزيت (بدون الفروة) واحيانا كريم لكن المفعول يختلف كثيراً.
وشعري يتعقد بسرعة من بعد العملية يعني لو سرحته .. وتركته خمسة دقايق ارجع اسرحه يكون مليان عقد !!! وعقدني في حياتي
وباهت .. ومنفوش شعر صغير طاير فوق راسي وعلى الجنوب ما يهبط ولا يتلم لا بالزيت ولا بالكريم مؤخراً .. كان قبل كدة يتاثر وينعم بس مؤخرا زاد سوء
وكمان عندي مشكلة من فترة ليست بالقصيرة وهي الاكزيما الدهنية لفروة راسي كدة شخصتني الدكتورة .. وحاليا باستخدم رواكوتين لحب الشباب اللي عندي هو يجفف وعموما كمان يؤثر على الشعر بتجفيفه و لكنه ما عالج المشكلة .. ويبغالي اروح لدكتورة جلدية قريب ان شاء الله.. مشكلة الاكزيما الدهنية انه فروة راسي تعفن ريحتها بسرعة وتحكني.. وانا اعرق من وجهي وراسي وفروتي بغزارة .. العرق يصب صب مني .. لدرجة اني انشف بمنشفة صغيرة مو بمناديل لانها ما تلحق تمتص العرق .. مهما غسلت فروتي وشامبو طبي للقشرة وبرضو مافي فايدة .. وريحة راسي تعفن واضطر استحم كل يومين اغسله .. ويزيد جفاف .. لكني ما اقدر اقابل مخلوق من ريحة شعري (فروة راسي).
بصراحة ما باقصه بانتظام وبدي اسوي حنة او اعتناء واقص اطرافه كمان .. وحمامات مغذية .. واصبغ الشيب طبيعياً ..الخ
ففكرت اسوي حنة مع اني كنت بس بدي اصبغ الشيب بهذه الخلطة بدل ما اسوي حنة اسوي الاتي:
مغلي ميرامية للتغميق مع قرنفل مطحون (لتثبيت اللون) حتى يصيروا مركزين مرة واحط زبادي وقرمز بنفسجي مطحون واقلب مزبوط واحطه على شعري الجزء العلوي وادمجه شوية لتحت للاشقر .. لاعطاء لون باذنجاني بنفسجي وتغطية الشيب ، وعلى فكرة انا بيضاء .
هل ينفع ؟ وهل الزبادي في الخلطات او الحنة يكون منتهي الصلاحية ولا جديد؟
علما اني جربت مرة طحنت قرمز وخلطته بزبادي وحطيته على خصلة امامية على شعري الابيض والعادي .. كم ساعة ولا مسك اللون !! فكيف اخلي اللون يمسك ؟
سواء سويت حنة او خلطة تغمق الشيب كيف يكون بالوضع التالي :
انا شعري تقريبا لقبل المؤخرة يعني اخر ظهري ولكن الطويل خفيف زي ذيل الفار فكيف اغطي نص شعري العلوي بالحنة لانه النص الاخير كان معمول فيه خصل اشقر ثلجي ومن اقل من سنتين صبغت الجزء العلوي المفروض اشقر رمادي لكن طلع لون برتقالي (فقط النص اللي فوق عشان ادمج بداية شعري مع بقيته الاشقر لما نزلت الصبغة لتحت) ومن سنة صبغته كله سيكلامي اللي هو لون باذنجاني كانه اسود ويفتح مع كل استحمام وكان لون رائع علي جدا جدا جدا ونفسي اعمله في الحنة ومو عارفة كيف وايش استخدم او استخدم الخلطة ولا ايش تشوري علي ؟ ما بدي ياه برتقالي ولا احمر ، ممكن باذنجاني مدموج مع الاشقر اللي تحت او على اشقر عشان يصير كله لون متقارب ..وهو الاشقر غمق عموما

وبافكر اسوي زيت خاص لانبات وتطويل وتكثيف وترطيب وتغذية الشعر مرة واحدة ايش رايك بمكوناته :
مرامية : عشان التغميق
عشبة الاس و الكثيراء : يوجد سؤال عليهم بالاخير .. واظن فايدتهم تنعيم او انبات
محلب: معروف لانبات الشعر وتنعيمه
حلبة : مغذية
فلفل رومي مفروم ناعم : لتطويل الشعر بسرعة
زيت ذرة عافية : لتطويل الشعر بسرعة
جرجير: لتساقط الشعر
لب الصبار: معروف فوايده
زيت ميرامية : لتغميق الشيب
زيت نارجين : لتطويل وتنعيم وتطرية وتغذية الشعر
زيت خروع : لانبات الشعر
حبة البركة: سمعت انها مفيدة كمان للشعر
فلفل اخضر حار بدون البذور : لتطويل الشعر


اسئلتي :
عشبة الاس هل هي نفسها الكثيراء ؟ اذا لأ ، ايش فايدة كل واحدة وكيف طريقة استعمالهم والاستفادة المثلى منهم؟
هل ينفع اسوي زيت الميرامية لتغميق الشيب بنفسي ؟ . اشتري زيت ميرامية جاهز واخلطه بالخلاط مع ميرامية طازة واعرضه للشمس عشرة ايام واصفيه واستعمله عشان النتيجة تطلع مركزة واسرع؟
وهل طريقة تعريض الزيت للشمس صح ؟
ايش فايدة قشر الباذنجان وقشر الرمان في الحنة ؟
قريت في المنتدى لو ما ابغى احط حنة احط بدالها سدر واي شي معاه للصبغ .. هل صحيح ينفع؟
انا السدر يجفف شعري لما اسوي مغطس موية دافية وملح خشن وسدر عشان الام جسمي واغمس راسي عشان الم راسي.. ينشف شعري شوية ويحتاج غسل مرتين لكن ما لاحظت انه يعمل تساقط الحمدلله
وهل الكتم مع الزبادي والحنة يغمق الشعر ؟
عموما زيت الزيتون ينشف شعري مررررة وما ينفع لي

وايش فايدة الليمون والخل في الصبغات او الحنة ؟ أي واحد يثبت اللون واي واحد يفتح اللون ؟

وايش الطريقة الصحيحة لصنع الحنة وتخميرها (في الثلاجة ولا برة ؟) والمقادير للشعر الطويل وما كيفية وضعها على الشعر بالذات الطويل (قريبتي حتسوي كمان) والشعر الطويل النصف العلوي فقط (لي انا)

ومرة ما اعرف اختار حنة ابدا ولا افهم فيها فكيف اختار حنة ممتازة ؟

والله لك الجنة يا بنت الاجاويد
واجزل لك الشكر وطيب الدعاء من كل قلبي على رحابة صدرك ومساعدتي في حالتي والتي اتوقع انها ستفيد الكثيرات ايضاً

جزيت خيراً وكل عام وانت بخير