انقلبت حياتي جحيم بين يوم وليلة! بدي نصيحة!!!

السلام عليكم، يا جماعة عندي مشكلة وشوي رح أنجن منها!!

أنا أساسا سعودية.. يعني والدي سعودي ومن قبيلة معروفة.. بس ماما أردنية، تعرف عليها بابا بالجامعة وقت ما كان يدرس بالأردن.. و تزوجوا وسكنوا بالسعودية، قعدوا فترة ما انرزقوا بأطفال فيها، لحد ما خلفوني أنا وأخي ( أكبر مني بـ 3 سنين).. بعدين انفصلوا وإحنا صغار.. ماما رجعت عل أردن و أخدتني أنا وأخي معها بموافقة بابا لانو كان شفقان علينا ومتل ما كان يقول ما في أحن من الأم .. وكان ييجي دايما يشوفنا.. بعد ما كبر أخي شوي أخدوا بابا معو ع سعودية وكان بدو ياخدني بس ماما قالت إنو أنا كنت كتير ابكي ومتعلقة فيها فبابا سمح إنو ابقى معها..

فربيت بالأردن.. ودرست بالأردن وهلأ أنا بالجامعة.. يعني من وقت ما إجيت مع ماما ما رجعت ع سعودية وما بعرف عنها شي.. بابا دايما بحكي معي.. وبشوفو بس مو كتير عل أغلب بفترة الصيف بيجي عل أردن هو وأخي ومنلتقي..

ودايما كنت بدعي الله تعالى إنو ماما وبابا يرجعوا لبعض بس ما في فايدة.. مع إنو بابا لسا بحب ماما وبدو يرجعها وحاول كتير معها بس هي ما قبلت.. وأنا كل ما بدي أفتح معها الموضوع بحسها بتتضايق كتير وبتعصب مني وبتحكيلي هاد الموضوع انتهى من زمان وما تحكي في مرة تانية.. بس أنا بعرف إنها بتحب بابا كتير.. كل ما تشوف صورته بغرفتي بشوف دمعتها بعينها.. حتى إنو مرة من المرات بابا مرض وعمل عملية ووقت ما عرفت قلب وجهها أصفر وكانت خايفة عليه كتير يمكن أكتر مني مع إنهم مطلقين!!!

المشكلة مو هون.. هاد الوضع تعودت عليه.. المشكلة بلشت من شي شهر تقريبا.. فكرتها تكون شغلة عابرة وكنت بحاول اتجاهلها وأعيش حياة طبيعية وعادية جدا.. وما قدرت اتصور إنها ممكن تتحول لواقع مرعب!!

المشكلة إنو: ماما دكتورة بوحدة من جامعات الأردن وفي زميل إلها بنفس الجامعة تقدملها.. أهل ماما بشجعوها إنها توافق وبقدر احكي بضغطوا عليها كمان.. خصوصي خالو الكبير لانو الأفندي صاحبو! بابا وقت ما عرف عصب كتير.. ورجع لموضوع إنو ماما ترجعلو بس ما في فايدة.. وقال إنو أنا لازم ارجع لعندو ع سعودية إزا صار شي!
وأنا مو عارفة شو اعمل!!! إزا رحت لعند بابا ما بعرف مرتو كيف رح تكون ( لانو تزوج بابا من سنتين) وأساسا بابا أنا ما بشوفو كتير، ودراستي لسا ما خلصتها ورح أروح ع مجتمع جديد وأهل بابا ما بعرفهم.. كنا أنا وبعضهم نحكي عل موبايل بس بالمناسبات!! وبابا مو قبلان إني ابقى مع ماما مع زلمة غريب!!! أنا رح انجن!! حاسة ماما رح توافق.. أهلها بيضغطوا عليها والدب زميلها ما عم بحل عنا!! أنا خاااااايفة! شو أعمل؟ وكيف بقدر أمنع هل جيزة من أساسو؟ الله يخليكم قولولي شو أعمل؟ اليوم بعد المغرب عرفت انو هداك الزلمة بكرة جاي رسمي مشان يطلب إيد ماما! فكرت إنو احكي أنا معو شخصيا خفت خالو يعملي مشكلة لانو كتير متشجع للموضوع!

أنا كتبت هل موضوع لاني بدي نصيحة، ورجاء أي حدا عنده كلمة شر يخليها بقلبو.. بابا إنسان كتير طيب ومحبوب وبخاف الله.. وماما ما في أحن منها كمان وما بتقطع فرض..

اسفة كتير لاني طولت بالحكي.. انصحوني شو لازم اعمل؟؟! الله يوفقكم فكوا كربي ومشكلتي الله ينولكم كل خير!!!

((تعديل مشان بعض الردود ولاني ما بقدر أرد ع كل شي)): تيتى ام ماما توفت من زمان مشان البنات اللي بقولوا انو ابقى عندها/ وأنا مش أنانية أنا كتير بحب ماما وبدي إياها تنبسط بس ما بدي ابعد عنها كمان! أنا كتير متعلقة فيها.. هي مو بس إمي هي رفيقتي كمان ما بقدر اتخيل انو رح ابعد عنها!!! بس بالأخير شكلو رح أرجع ع سعودية غصبن عني!! كلو من هداك الدب اللي بدو ياخدها مني!!! / وبابا أول مرة بيحكي معي بهل طريقة بعد ما عرف إنو ماما ممكن تتزوج.. ما عرفت أحكي معو متل دايما أو أناقشو بأي كلمة! طيب كيف الوضع هناك والعيشة والدراسة؟؟!