انما اشكوا بثي وحزني الى الله

السلام عليكم جميعاً

بعتبر اللي بقوله فضفضه
يمكن احد منكم ربي يسخره لي والاقي حل لما اعاني منه

انا لي سنه ونصف من تزوجت
لكن عمري ٣٥ سنه
ماحصل حمل بعد الكشوفات طلع زوجي معه ضعف في الحركة
انا سليمه حمد لله
طبعاً هو شب علي يبي نسوي تلقيح صناعي
كان لنا ٦ شهور فقط من تزوجنا
قلت له تو الناس يامسلم لاتستعجل
بس اصر علي ونشب لي وكرهني بعيشتي
سويت بعد معاناه تفسيه وخوف وحالتن مباركة
طبيعي اعتبر توي عروس وتعرضت لكل هالعفسه اكيد بتعب نفسياً
من شدة خوفي ماسويت اشعه الصبغه
وخضعت للعملية بدون الاشعه
فشلت طبعاً
ومايحتاج اقول لكم كمية الالم النفسي اللي مريت فيه

بعدها قلت برتاح كم شهر بعيدها بعد ماارتاح واستقر نفسياً
وكررت العملية بعد ماسويت اشعه الصبغه
وطبعاً معاناه وتعب نفسي واجهاد وقل نوم
وايضاً فشلت
كانت كمية الاحباط والالم والانكسار لاتوصف
مرره ضاقت فيني الوسيعه وقربت افقد الامل في اني احضن طفلي بيوم من الايام
لكن لاياس مع رحمة الله الواسعه

شلت الموضوع من بالي تماماً
وقررت اني الجأ للطب الشعبي والعسل وهالامور وصرنا ناخذ عسل انا وزوجي
وزوجي تهور وصار ياخذ مرتين في اليوم من العسل
بعدها تعب واكتشفنا انه جاه مرض السكر
تحطمت نفسياً اكثر واكثر
اقول بخاطري مايكفي انه فيه ضعف بالحركة
الا بعد سكر اش هالمأساة واش هالحظ
لاحول ولاقوة الا بالله
كان هو يبكي يوم عرف ان معه سكر
وانا اهديه وانو عادي ومع الحميه والاكل الصحي بينتظم معك السكر وتزين الامور
وانا قلبي يتحطم من داخل
كنت اواسيه وانا احوج منه ان احد يربت على قلبي المكلوم
انشغلنا بمراجعات السكر وعلاجه وطلع ايضا عنده كلسترول علماً بانه صغير في الاربعين من عمرة
مرت سنه من اخر عملية تلقيح صناعي
فتحت معه الموضوع انو نسوي طفل انابيب
رفض تماماً وعصب وصار يصارخ
انا مابي عيال ولا ابي اسوي عمليات
ان جت من الله ولا خلاص مو لازم !
مشيت له السالفه
حاولت مره ومرتين وعشر
ولا فيه فايدة مايبي يسوي شي ولايعالج ولاشي !!
ودي اقوله اش هالانانية يوم كنت انت تبي اجبرتني اني اسوي
ويوم صرت انا ابي ترفض !!
حاولت مره ايضا وعصب وثار وقال لايكثر وهذا اخر كلامي ماراح اسوي اي عمليات
من بعد ماجاه السكر صاير يعصب على اي شي ويثور على اتفه الاسباب
رغم انه طيب مره وحنون ولطيف
لكن تحول كم عقب ماجاه السكر
انا تعبت مره ونفسيتي في الحضيض
كل ماشفت حامل تقطع قلبي
كل ماولدت وحده من اهلي ورحت لها اطلع منها اصيح تعبت والله العظيم
مافيني اتحمل
اخاف اني اصر عليه زياده ويتهور ويتركني لاسمح الله
مابي اخرب بيتي ومرتاحه مع زوجي ومو مقصر علي بأي شي لكن هالموضوع صار عنده حط احمر
مو قادرة اقنعه انه يفكر في الموضوع مره ثانيه
ولا قادره حتى افتح معه الموضوع
لو المح فقط عن هالشي يقوم من مكانه ويطلع ويسكر الباب بااقوى ماعنده

اشعر اني ضعيفه واشعر بقلة الحيلة
صبر جميل واللع المستعان