اهلـــي وتسلطهم وحمولتي مع زوجي

انا ربي ماكتب لي الحمل والله كريم
لي اربع سنوات متزوجه وانا وزوجي عقلانيين جدا يعني عواطفنا ماتحكمنا فينا العقلانيه

اهلي من وانا بنت لسه وهم عصبيين امي عصبيه جدا وابوي نفسها واكثر منها و تسسسلط عجيب مالي شخصيه مالي راي مسحوا شخصيتي حتى اكلي وشربي كانوا يتحكمون فيه
تزوجت وشفت ام زوجي وابوه فررق فرق طبعا انا عمري ماطريت اهلي عند زوجي الا بكل خير لاني عاقله وادري ان الرجال مالهم امان

المهم تخيلو طول فترة زواجي اهلي تسلط على موضوع الحمل ليش ماتحملين؟ وش فيك تاخرتي ؟ ماتعالجين؟ طيب زوجك يعالج؟ روحي عالجي روحي عالجي روحي عالجي

ومره امي قالتلي لايكون زوجك رافض يعالجك؟ ترى مو على كيفه اذا مايبي يعالجك والله لا اخذك غصب عنه وعنك تتعالجين !! اجل لايكون بتجلسين طول عمرك بدون بزران تفشلينا وسط الناس! قلتلها امر الله مافيه فشيله قالت ايه بس عالجي تلتحلي قلتلها قاعده اتعالج والله كريم و حسيت من تلميحات امي وابوي يبوني اجيبلهم تقارير واوراق واثباتات اني اتعالج يلمحون كثير لهالموضوع هذا غير التكذيب اللي بعيونهم شاكين اني اكذب عليهم واني ما اعالج بينما انا اعالج
المشكله زوجي منبه علي محد له علاقه بهالسالفه وانا مو عشان زوجي بس انا نفسي مقتنعه ان اللي بين الزوجين مايطلع
سؤالهم مو حب ولا اهتمام لان وانا عندهم بالبيت كانت حياتي ماساه ماساه حتى لما كنت امرض كنت اطيح ماكان احد يقول وينك كان فراشي فيه خير اكثر من اهلي اقل شي مسدحه فوقه احن من ام واب حتى شلونك مايقولون وضرب واهانات وذله حتى عالاكل ومافي اي احترام نهائي والابناء عندهم عبيد وجواري مايطلعون من شور ابوهم وامهم
الفكره ان لما تاخر الحمل زوجي طلب مني ان لا اهلي ولا اهله لهم حق السؤال قال حياتنا ومشاكلنا وهمومنا ماتطلع حدود بره البيت نحترم الناس والناس تحترم خصوصياتنا وكفى الله المؤمنين
الحين لي اربع سنين متزوجه ابو زوجي وامه عمرهم ماجرحوني ولا حتى سالوني ولا حتى تلميح مافي
محترميني ومحترمين ولدهم وخصوصياته لابعد حد والله على مااقول شهيد
ام زوجي لي اربع سنوات كلما شافت ولدها قالتله قدامي الله يرزقك بالضنا وتسكت عمرها ماسالتني وقالت تعالج ولا ماتعالج تعتبره عييب وشق جيب هذا شي بين زوجين هم يحلوا امورهم بانفسهم
والله العظيم حتى ابوي يتدخل ويسالني وش فيك ماتحملين لايكون ماتتعالجين؟
مع ان ابوي مو كبير ولا خرف ولا عنده زهايمر مدري شلون كذا محاصرني بالاسئله وكاني لسه بنت عندهم بالبيت متسلطين علي حتى وانا متزوجه مسيطرين على حياتي طبعا الحمل هذا جانب واحد هم مسيطرين على حياتي بالكامل تعبت
الف مره سالني ابوي حشرني بسؤال محرررج يقولي لايكون فلان مايبيك تحملين ولا متفقين تاخرون الحمل ؟ طيب لو رغبة زوجي مانحمل هل ابوي بيتهاوش مع زوجي مثلا؟

بالله عليكم حتى لو كانوا والديني بس مو عيب هالتسلط بشي خاص؟