اهلى بيكرهونى ليه ؟!

السلام عليكم
انا مصرية والدنيا ضاقت بيا وحابة افضفض معاكم شوية 🙂
انا كان نفسى يكون عندى عيلة بيحبونى وبحبهم منبقاش عايشين مع بعض كاعداء ماما ام نرجسية ومؤذبة جدا انا معرفش حاجة عن حنان الام والكلام دة هى اكتر حد اذانى نفسيا وجسديا انا عندى علامة فى دراعى معلمة لغاية دلوقتى بسبب سكينة ضربتنى بيها وانا صغيرة وبسمع منها كل انواع التنمر والكلام المؤذى
مع كل مشكلة تحصل شايفانى بشعة وشايفانى مش هتجوز ولا حد هيبص فى وشى وبتفرض عليا عرسان تجبهم البيت بعد ما تقعد تصرخ وتتخانق معايا عشان رافضة وفى الاخر العريس يجى بعد ضغط نفسى كبير وبيكون مش مناسب وبتيجى من عند ربنا والموضوع مبيكملش وبعدين ترجع تتريق عليا وتقولى كل لما حد يشوف وشك يطفش.
مع ان الناس الغريبة بيمدحوا فى شكلى بس انا مش بصدق كلام المدح دة لانى فقدت الثقة بنفسى وأوقات مبطيقش ابص لنفسى فى المرايا من كتر ما وصلى احساس أن انا بشعة بقيت بكره نفسى
بابا وماما منفصلين بعد مشاكل كتير جدا بينهم وانا عايشة مع ماما واخواتى وبابا مش علاقته قوية بينا احنا منهمهوش فى حاجة بيهمه الفلوس اكتر مننا لدرجة أن اختى الصغيرة الله يرحمها كانت مريضة وقبل وفاتها مكنش عايز يدخلها اى مستشفى وهى بين الحياة والموت وفضل يلف بعربية الاسعاف عشان يدور على مستشفى رخيصة مع أنه مقتدر مديا ودلوقتى حصلت مشكلة معاه وبيقولنا اصرفه على نفسكم وساعدوا بمصاريف البيت
انا حتى علاقتى بالناس بقت بتبوظ ومبقاش عندى اصحاب مبقتش قادرة اتعامل مع ناس وبقيت عايشة لوحدى تماما حتى فى البيت كل واحد فى حاله
عندى اختى الكبيرة عندها جنون العظمة وطول الوقت يا اما خارجة برا البيت يا اما قدام المرايا يا اما بتكلم صحابها البنات والشباب وعايشة حياتها على الاخر وماما بتفضلها عنى ومفتخرة بيها جداا
وعلاقتى باختى مش كويسة مش بطيق اقعد معاها فى اوضة واحدة وهى بتفضل صحابها عنى يعنى ممكن اقعد اتحايل عليها كل سنة فى العيد تنزل معايا صلاة العيد وترفض وتروح تنام بس اول ما حد من صحابها يعرض عليها تنزل الصلاة ما بتصدق وبتفضل سهرانة برا للصلاة وأوقات بحس انها بتتبرا منى كدة بيجبلى الاحساس دة لو فى مناسبة عائلية أو تجمع ممكن تروح تقعد وتتكلم مع اى حد وتتجنبنى نهائى ولا كانها تعرفنى
انا كان نفسى والله يكون عندى عيلة بيحبونى وبحبهم انا اصلا بحب الناس وبحب العزوة بس مش عارفة ليه نصيبى كدة انى اعيش مع عيلة بيكرهونى
هو ليه فى ناس بيخلفو وبعدين ياذوا عيالهم بالشكل دة ويكرهوهم فى نفسهم لما هما مش عارفين نعمة العيال بيخلفو ليه ؟