يمنع دخول مرضى الربو والي عندهم حساسيه
من الغبار لهذا الموضوع
ابي اتكلم بصراحه عن ايجابيات التلفزيون السعودي زمااان قبل الدشوش او بالاحرى ايجابيات القنوات الارضيه ,, قبل المهزله التي اصبحت تسعى بين اسلاك جهاز التلفزيون والسبب المدعو ( رسيفر)
لما كنا صغار نصحى بدري جداااااا انا واخوي الي اكبر مني ونلعب في حديقه البيت الي كانت اكبر من البيت بزاتو ,, وكل القنوات الارضيه تكون مسكره من الليل وماتشوف على شاشتها الا نغمة ( تششششششششششششش الخ) عاد تغيرت هالنغمه مع الوقت وصارت تجي الساعه الرقميه الممله
المهم اول مايفتح التلفزيون نركض ونسنتر قباله من اول مايجي السلام الملكي وحنا نردد معاه الين يطل علينا المذيع بطلته البهيه ويقدم الافتتاحيه بالقرآن الكريم ,,
طبعا كان عندنا هالسلام الملكي مقدس نحترمه ونحس بفخر وحنا نردد مع الكورال واحيانا كنا نضرب تحيه للملك الين ينتهي السلام الملكي ههههههه
وكنا نتسمّر على القرآن الكريم ولا نتحرك حركه لان القارئ محمد الطوخي كان يقرأ هالايه قبل مايبدأ في قراءه القرآن :
{وَ اِذَا قُرِأَ القُرْآنْ فَاسْتَمِعِوا لَهْ وَ اْنصِتوْا لَعَلكُمْ تُرْحَمُون }
ونسمع الكلام وننصت ..
ولما يخلص القرآن يجي بعده تفسير القران .. عاد كان يطوول التفسير وكنا نتعب من الشوق والانتظار لما بعده ..
ولما يخلص يطل علينا المذيع بأحلى اعلان وهو بدء الرسوم المتحركه الي تجلس تشوفها ساعه او ساعتين مو اكثر ,, مره في الصباح ومره العصر مو مثل الحين طوووووووووول اليوم
كنا نجلس على الرسوم ونتابع بشغف ,, اصحيح اغلبها كانت تجيب العله بس كنا نتابع لاننا في انتظار حبيب الجماهير ومعشوق الكبار قبل الصغار ( توم وجيري )
زمان كان كل شي له وقت محدد يجي البرنامج وانت مشتاق له ويروح وانت مازلت مشتاق ,, كان التلفزيون عباره عن سله فواكه تقدم كل ماهو متنوع والاهم انها تقدمه بسمه معينه وهي الرقّي
زمان كان يفتح التلفزيون الصباح ويسكر في الليل .. كان جهاز محترم وجنتل مان ,, مو مثل تلفزيون هالوقت الي يبث كل شي في الليل والنهار كنه ابليس لاينام ولايخلي الناس تنام
طبعا التلفزيون القديم كنا نسميه ( الي يطقطق ) نظرا لصوته المزعج اثناء تغيير القنوات ( هذا وهي عشر قنوات مزعجنا تخيلوا عاد لو انه 8000 قناه مثل هالايام ) وماكان له ريموت كنترول , ويالله كل شوي يارايحين ياراجعين تغيير في هالقنوات ( من كثرهم عاد كلها قناتين )
وكان مصدر بث هالقنوات الارضيه هو جهاز رشيق طويل عريض المنكبين يرتز رافعا هامته في سطوح خلق الله ويقف في وجه الرياح والبرد والامطار ويتحدى حراره شمسنا المشاكسه بكل ثقه , وهو ذو ساق حديده واحده وغالبا يكون لونه <-- فز قلبها
وله مهمه انسانيه ونبيله اخرى وهي انه مدرج للحمام الذين يصطفون على اكتافه ( ماقولكم سيلفر) يصطفون وكأنهم يتفرجون على احدى مباريات دوري زين الممتع << ايه هين
هذا الجهاز يسمى الارياال او الانتل الي هو .. هالجهاز مرتبط بسلك ينزل من اعلى السطوح الى ان يدخل من نافذه احدى الغرف وهذا السلك يرتبط بجهاز مربع صغير فيه حلقه تدور وكأنها بوصله ( حتى هي صوتها مزعج ).. وهذا الجهاز يخرج منه سلك للتلفزيون ولما نغير اتجاه هالبوصله تبدأ القنوات تصير صافيه شوي شوي ويبدأ التشويش يقل عن القناه الي نبيها <-- ياليل مطولك
احيانا كنا نحط معلاق الملابس في فتحه التلفزيون
بدل الانتل حق التلفزيون الي غالبا يكون مكسور ويافرحتنا لما تصفى القنوات الخليجيه .. اما من ناحيه غصب واحد هين هذي طالعه طالعه من فوق خشمكفي ايام الصيف وبسبب الرطوبه البغيضه كانت القنوات تصير صافيه و قزااااااز على قولتهم .. و ياااااااااه كيف كنا نتعذب لما يجي الشتاء وتنعدم صفاوه القنوات ومايبقى الا التلفزيون السعودي ..
يازين ذيك الايام
ولا الاخبار
"بيان من وزارة الداخلية"
( إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الْأَرْضِ فَسَاداً أَنْ يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُمْ مِنْ خِلافٍ أَوْ يُنْفَوْا مِنَ الْأَرْضِ ذَلِكَ لَهُمْ خِزْيٌ فِي الدُّنْيَا وَلَهُمْ فِي الْآخِرَةِ عَذَابٌ عَظِيمٌ )
اقدم المدعو فلان بن فلان ال فلان الفلاني سعودي الجنسيه على قتل المدعو فلان فلاني باكستاني الجنسيه وذلك بضربه ضربتاً قاتله في عنقه اردته قتيلاً وبفضل من الله تعالى تم القاء القبض عليه وبإحالته إلى المحكمة العامة صدر بحقه صك شرعي يقضي بثبوت ما نسب إليه شرعاً والحكم عليه بالقتل تعزيراً
ووزارة الداخلية إذ تعلن عن ذلك لتؤكد للجميع حرص حكومة خادم الحرمين الشريفين حفظه الله على استتباب الأمن وتحقيق العدل وتنفيذ أحكام الله في كل من يتعدى على الآمنين ويسفك دماءهم وتحذر في الوقت نفسه كل من تسول له نفسه الإقدام على مثل ذلك بأن العقاب الشرعي سيكون مصيره، والله الهادي إلى سواء السبيل
اجلس بعدها اسبوع ماانام ههههههههههههه
كانت الاخبار زمان كلها استقبل وودع وتقعد اربع ساعات تشوف جمع غفير من الناس وطوابير تسلم على سموه وطول الوقت وموسيقى موزارت وبيتهوفن شغاله على هالمنظر ,, بس تدرون ؟؟ ليت الاخبار ما عاد نشوف فيها الا استقبل وودع ارحم على قلوبنا بكثييير من مناظر التفجير والقتل الي يحصد المئات شهريا
طبعا كانت برامج المسابقات مشوّقه وبريئه وكلها حماس مثل برنامج ( تيلي متش ) الالماني
وبرنامج حروف الي يجي برمضان وفوازير رمضان حقت الصغار والكبار
مو مثل مسابقات هالوقت كلها يا اسئله تافهه يا الغاز من سنه جدي ..
لا و صارت تخصص لها قنوات خاصه وجايبين مذيعات بحلف انهم جايبينهم من اصلاحيه ولا ملجأ ايتام وملبسينهم اي كلام وملقنينهم عده جمل ماتتغير طوول اليوم وقال ايش قال ( اتصل دلوئتي , كسف اتصالك و و و<--- الي فيه خير يسكتهم دقيقه وحده
وتقعد تتراقص هالمذيعه وتتمايل بدلع يسد النفس على احدى الاغاني الهابطه الي يحطها المعّد
كانت زمان العايله بكل دفئ تجتمع على تلفزيون واحد .. الاب والام والعيال والجد والجده
الان اصبحت العائله للاسف اذا اجتمعت تجتمع على هالمنظر :
نور ومهند
الان الناس اصبح عندهم في كل غرفه تلفزيون وفي كل ايد لاب توب او ايباد وفي كل ايد موبايل مزعج يخترق هدوء حياتك مثل البلاك بيري ولا الايفون
والان حبيت اقولكم ,, الي ماعاش وماشاف الارياال ولا التلفزيون الي يطقق ولا سمع نغمة ( تششششششششش ) معناتها ماشاف شي <-- بالله
منقول للامانه
ياالله ايااااااااام