اهل زوجي

السلام عليكم و رحمة الله و بركاته ... شلونكم بنات اول مره اشارك و حابه افضفض شوي مادري يمكن ارتاح من ردودكم شوي .. ماعندي خوات و مو عادتي اشكي لأمي عشان ما تتضايق ،عموماً انا بنت متزوجه بكمل سنه و نص بزواجي.. بحاول اختصر قصتي عشان ماتملون تزوجت عن حب الحمدلله رغم ان اهله مايحبوني لاني كنت حيل معهم و اعرف اسرارهم مادري كانو خايفين او مترددين و جوو عشان زوجي اصر على ان مايبي غيري .. امه قبل فتره خطبتني و لانه ابوه كان بالعنايه وقتها اهلي قالو بس ابوه تتعدل اوضاعه يجي يخطب بنتنا من الرجال ..و انتظرنا و توفى ابوه ف جا مع اخوانه و الحمدلله تم زواجنا .. طبعا الصدمه ان امه و خواته ماحضرو عرسي و قالو اعذار سخيفه ان ع اساس كان نفس تاريخ وفاة ابوه نفس التاريخ فقط بس مو نفس السنه كان متوفي قبلها بسنه تقريبا .. حتى ما اتصلو باركو لي ولامي و رغم ذلك انا سويت عرسي حفله صغيره لاهلي بس و امي كانت زعلانه بس ماوقفت فرحتي .. و زوجي لما اساله يقولي اعذارها التافهه و كان يعرف حركات اهله و مطنش.. من بعد هذي السالفه قطعنا ما كلمناهم و اجرنا شقه .. بس هو كان عادي يسلم عليها بالتلفون .. انا و امي ما نكلم احد فيهم .. بعد فتره صارتلنا ظروف و زوجي انسجن سجن عسكري في دوامه و قالي روحي لاهلي .. رحت و اول ما دخلت جتني امه و قالتلي بنتي الصغيره ماتبيج عندي بالبيت ! طبعا من القهر بجيت و رجعت لشقتي و ماقلت لاهلي .. و اهلي اصلا كانو بعيد عني منطقه بعيده وانا رحت لاهله لانهم اقرب و زوجي اللي طلبني اروح رغم اني رفضت بالبدايه.. و الزبده بعد ماطلع زوجي و قالي راح نسكن بيت اهلي لانه ماعندي امكانيه دفع الاجار و طروفنا صارت صعبه بعد مشاكله بالدوام .. وافقت عشان حالتنا الماديه بس شرطت ان مالنا شغل ببعض و الصدمه انهم الحين يبون يكلموني و يبونا نرجع عادي مثل قبل حيل و كانه ماسوولي شي !! كانهم ماهانوني و طردوني .. شنو اسوي؟ اشوفهم يحاولون يتقربون وانا مو متقبله