اهل زوجي اذا ماجيت قالوا قاطعة واذا جيت تندمت

السلام عليكم


انا ساكنه في بيت قريب من اهل زوجي بالسيارة اخذ حوالي 5 دقايق والله الشاهد معتبرتهم مثل اهلي لكن هم العكس قبل كنت ازورهم كل يومين او ثلاث بعدها بالاسبوع مرتين والحين مرة بالاسبوع دايم اذا اروح اخذ قهوتي معاي وحلاي ومرات بدون شي واي مناسبة اجيب معاي كيكة واخذ معاها قهوة واروح وام زوجي كل عيد اشتري لها ملابس واعطيها فلوس ومااسافر لو ليومين الا مااجيب لها شي بخور ملابس عطور هذا غير هدايا الذهب اللي بين فترة والثانية لازم اجيب وحتى خواته كم مرة جبت لهم هدايا واللي مو متوظفة بالعيد اعطيها فلوس عيدية لكن اشوف كل مالهم يزيدون بسوء معاي اول شي ايسونه لما حد يعزمهم ويقول لهم قولوا لحرمة ولدكم محد يقولي ماعرف الا بعد العزيمة لما حد يولد يروحون ويوجبون وانا اكون مجهزة اغراضي اتصل لهم اقول بروح قولوا لعمتي يقولون حنا مصلحين وداقين على بناتهم ويروحون يدقون على مرة ولدهم الثاني ويزورون ماعرف الا بعدها وبالصدفة يتواعدون ويطلعون كشتات ومخيمات ومطاعم ولا احد يبيني ولا احد يدق على ولا على زوجي اتصل لهم اذا طولت مازرتهم اقولهم بتطلعون مكان يقولون لا اقولهم بجيكم يقولون حياكي الله لما اجي القاهم بالحوش لابسين عباياتهم وبناتهم جايات من بيوتهن ومصلحات حلا واغراض يعني متجهزين من بدري بيروحون حديقة والا مكان بيزورون ناس ورايحين للسيارة ومرات يطلعون ومرات من باب المجاملة يقولون لي امشي معانا زين انا دقيت عليكم تبون تطلعون دقوا علي قولوا بنطلع مشغولين قبل فترة عازمين وحده من مكان بعيد ومن قبلها بيوم عازمينها واتصلت لهم قلت لهم بجيكم بتطلعون مكان حد بيجيكم قالوا لا وكنت تعبانه شوي وولدي مريض ولا كشخت ومالي خلق يوم جيت الا الناس لابسه وبناتهم المتزوجات جايات ومسوين عشاء وحلا وفطاير وقهوة وشاي اقولهم حد بيجي يسكتون وايتلفتون وهم يسولفون يقولون ماجت الحرمة قلت لهم اي حرمة قالوا عزمنا حرمة من امس يوم اقولهم ليش محد قالي كنت لبست وتمكيجت قالت عمتي عادي تمكيجي من البنات قلت لا بروح بيتي البس وبجي ورحت وانا معصبة وابكي بالسيارة وقلت لزوجي ليش محد يبيني قعد ايعذر لهم ويقول انتي راعية بيت مافيه داعي احد ايعزمك قلت لا اطلع اعذار خواتك المتزوجات كلهن عندهن خبر من امس وكاشخات وجايات وانا متصلة لو مو متصلة اقول معليه لكن متصله يقولون محد بيجينا ولا حنا طالعين ويوم اجيهم مو كاشخة عادي عندهم يبون اقابل وحده تقرب لهم وجايه من ديرة بعيدة واول مرة اشوفها بجلابية بيت وبدون مكياج شتقول عني الحرمه وصلت بيتي زعلانه وقلت لزوجي ماني راجعه لهم مايبوني بعد ربع ساعه روح جيب ولدي وقولهم اني تعبانه قالي تعوذي من ابليس قلت حسبي الله ونعم الوكيل وقلت يابنت الحلال روحي واكشخي ووجبي الحرمة عيب اول مرة بتشوفينه واول ماتطلع الحرمة برجع البيت يوم وصلت لهم معصبات بناتهم يقولون شفتي الحرمة سخيفة اتصلت اعتذرت وحنا من امس عازمينه وطابخين ومسوين حسابنا بالحلويات والقهوة والشاي قلت احسن وفرت قالوا امي بتروح تزورها بالبيت وخذت عمتي الاغراض وراحت

المشكله انا لو زاروني يجون فجاه حتى بملحقي الخاص القاهم هم وبناتهم وبزراهن ويلعبون بشقتي ويشوفون خصوصياتي ويجون من قبل الساعه 4 العصر ويقولن للخدامة سوي شاي وقهوة وحلا ويطلعون دجاج والبنات ايفتشتن بادراج المطبخ واذا اصعدن فوق ايفتشن واقول اهل زوجي مو مشكله والغي كل مشاويري واقابلهم من العصر لين الليل هن والبزران وبناتهم المتزوجات يرسلن الشغالات والبزران لبيتي اذا درن ان عمتي موجودة والله راسي ينفجر منهم اكثر من 12 بزر وايخربون وايكسرون ولا اقول لهم شي بس يوم اشوفهم ايعاملون كذا اتحسر واقول لو بس مرة لما يزوروني من غير مايتصلون تلفون اطلع واخليهم مثل مانا اجيهم واتصل ويقولون موجودين يوم اجي ماالقى احد موجود اول توني واصله يلبسن العباه ويطلعن عادي وبعدها بكم يوم اعرف انهن معزومات او متواعدات هن ومرة ولدهم اللي هي بنت عمهم وبيني وبينه خلاف بسيط ولما اختلفنا قالت لي اصلا البنات يقولن انتي ام وجهين وانتي بس قدام الناس اتبينين انتي السنعه واتسوين الواجب وحنا لا قلت له لو بصير انا الحالي سنعه ووابي ينذاع صيتي ماكان كل مااروح اوجب احد اتصل عليكن تلفون واقول من تروح معي كان اروح الحالي مع انه هي اتمشيهن واي كلمه تقوله يسونه وصايرات احزاب علي اعصب واقول مازورهم ولا اجيهم بس اهل زوجي وكل شي ولا قطع صلة الرحم

افكر اغير طريقتي معاهم واسوي نص اللي يسونه معاي عشان يحسن بالظلم شوي اشرايكم