الله يعوضك بمن هو خيراً منه

يابعد عمرى ما أرووووووووووووووووووووووووعك
والله يعوض صبرك خير ويعوضك عن الحرامى اللى سرقك
وصدقينى يالغالية الجمال جمال الروح زينى نفسك بتقوى الله والطاعات
وقلبى معاك

حبيبتي ابي اكتب لج بس مب عارفه بالضبط شو أقول وكيف أوصل اللي أبي أقوله

الناس تجرح وتتكلم من دون ما تثمن كلامها.. وللأسف إن هذا الشيئ حتى في تعاملهم مع الأطفال.. يخلون الواحد يخسر ثقته بنفسه مع إنهم ممكن يكونون خطأ في حكمهم

من قال إنج شينه؟؟؟؟؟؟؟؟؟؟ إنتي جميله وأجمل من كثير جميلات وهذا الشيئ بان في موضوعج .. سبحان الله اسلوب الشخص في الكتابه يعبر عن ذاته وشخصيته واسلوبج يقول إنج حبوبه طيبه ذكيه متفانيه ومعطاءه .. مستحيل شخص بهذي الصفات يكون شين .. ولا حتى بالمظهر .. لأن الجمال الداخلي لازم ينعكس على الشكل

إنتي مب شينه .. إنتي تحسين إنج شينه لأن الناس الله يسامحهم ويهديهم حسسوج بهذا الشيئ من صغرج ... خلنا نقول إنتي مختلفه عن خواتج في الشكل لكنج مب أقل جمالاً من أحد

الجمال نسبي وفيه ناس ما تتقبل إن الشكل المختلف له جماله .. تعودت ع شكل معين وصار عندها هو مقياس الجمال وأي شيئ يشذ عنه اعتبروه غير

ومريتي في تجربه عززت عندج هالمفهوم .. اللي تزوجتيه دش ع طمع ولما حصل اللي يبيه وهو الفلوس تركج وما كان عنده عذر يواجه به الخلق لأن ما شاف منج إلا كل زين فجاب عذر واطي لا يمت لج بصله بس عشان يبرر موقفه الواطي

حطي في بالج إنج جميله.. لأن الجمال يجي من الداخل.. قولي أنا جميله وما أقل عن أحد رددي هالعباره الين تصدقينها وبتشوفين نفسج غير .. اهتمي بنفسج .. كل وحده ولها جمالها بس يبيلها تعرف تبرزه

صدقيني وقفي عند المرايه بدون أي أفكار سلبيه عن شكلج وشوفي نفسج كأنج أول مره تشوفينها راح تلقين أشياء حلوه فيج

السمار مب شين .. أنا شفت بنات سمر بس والله العظيم كانن قمة في الجمال ..وهم نعومة الشعر مب كل شيئ .. كل شعر وله جماله .. شعرج جاف يعني يبي له عنايه أكثر .. ترى حتى الشعر الناعم ممكن لظروف معينه إنه يجف .. يعني مب مقياس

خواتج تزوجوا وإنتي لا لأنج شينه؟ .. مب صحيح
ما جاج متزوج لأنج شينه؟.. مب صحيح
طلع نذل وخان الأمانه لأنج شينه؟.. مب صحيح
تقدم لج أحينه متزوج بثلاث لأنج شينه؟ .. مب صحيح

هذي أقدار مكتوبه من عند رب العالمين .. واللي صابج كان مكتوب لج وكان ممكن يصيب أي وحده ثانيه الكل يشوفها حلوه .. يعني شكلج ما له علاقه .. حطي هالشيئ في بالج وتأكدي منه

كثير بنات مب متزوجات .. شوفي البيوت مليانه وبنات مب ناقصنهن شيئ .. وبنات مب ناقصنهن شيئ متزوجات وينضربن كل يوم وينهانن وبنات يتطلقن

أقولج شيئ الله العالم ما كنت بقوله إلا أحين أقوله لج.. لما كنت صغيره كنت أحس إني مب حلوه وايد .. كنت مقارنه بخواتي احس اني شينه .. وكنت اسمع بعضهم يقول خواتها أحلى.. تزعزعت ثقتي شوي بس ما اهتميت كثير .. واليوم الحمدلله ما أقل عن أي وحده منهن .. جميله ويقولون لي فلقة قمر وإذا طلعت مناسبه العيون كلها علي.. تدرين ليش؟ لأني من داخل رفضت أصدق إني أقل أو إني شينه .. ولأن عندي قاعده إن أي شيئ أبيه الله بيعطيني إياه.. البنات يتابعن الموضه والمكياج والكريمات وهالشيئ مب غلط.. بس الأهم والأساس عندي هو دعائي لربي سبحانه وتعالى.. دوم أدعيه اللهم اجعلني آية من آيات الحسن والجمال وحرمني على النار.. صدق أحس هذا سر من أسرار الجمال.. سبحان الله.. اهتمي بنفسج وطلبي اللي تبينه من الله وبين يوم وليله ربنا قادر يعطيج إياه

ياما بنات جميلات بالشكل ومجرد ما تكلمين وحده منهن تحسينها فاضيه من داخل.. داخلها الجمال معدوم .. هالبنات جمالهن لحظي ما تقدرين تقدرينه أو تحسينه

وبنات يمكن أول ما تشوفينهن تحسينهن عاديات بس مع كل لحظه تقضينها معاهن تعرفين شو هو الجمال وتحبين أشكالهن وتقولين ما شاء الله هن فعلاً جميلات وممكن تصير أشكالهن مقياس ينقاس عليه الجمال

إذا على الزواج هو قسمه ونصيب ومقدر ومكتوب.. كثير بنات ما تزوجن .. أعرف بنات ما شاء الله تبارك الله فيهن الزين كله وما تزوجن وفيه منهن خواتهن تزوجن وهن لا .. أنا بعدني ما تزوجت وانا في أواخر العشرينات

ثقي في نفسج وقدراتج وشكلج .. ثقي في جمالج الداخلي والخارجي .. والجئي لربنا سبحانه وتعالى.. إن شاء الله ربنا بيعوضج بزوج صالح من أحسن الرجال عازب يحطج بعيونه ويسعدج ويشوفج أجمل وحده في الكون ويرزقج الذريه الصالحه .. قولي آمين

ابدي صفحه يديده كلها ثقة وتفاؤل .. ثقي بنفسج بس الاهم ثقي بالله .. ربنا راح ينصرج ويعوضج.. احسني الظن بالله دوم لأن الله سبحانه وتعالى عند حسن ظن العبد متى ما احسن العبد ظنه بالله.. ومن حسن الظن به سبحانه ثقي إنه ربنا قادر يرزقج بواحد من احسن الخلق ويسخره لج ويجملج في عيونه

الله يوفقج وإن شاء الله تتزوجين قريب ونفرح فيج ولا تقولين ما بتزوج أخاف اجيب بنت شينه .. إنتي مب شينه ولا تخلين واحد ظالم وعايش حياته اليوم براحة وبدون احساس بالذنب يأثر في حياتج .. هو راح بس جملته الأخيره مأثره فيج .. لا تسمحين له بهذا الشيئ .. عيشي حياتج والله يوفقج .. أهم شيئ الجئي لله وادعيه بقلب حاضر خاشع

الله يسعدج

جزاك الله خيريانور القران ماشاءلله عليك ماخليتي شئ ينكتب بعدك كفيتي ووفيتي...

حياك الله اختي ..

اول شيء ياليت تسجلين باسم خاص بك وتشاركين معنا صدقيني بتشعرين بالفرق خصوصا اني لاحظت ان اسلوبك في الكتابه راقي ومميز وسلس .. ومختصر يسرد لك الاحداث بطريقه مختصره ولاتوثر على الفكره المراد ايصالها ... وهذه نعمه ..
وقليل من الناس من يجيد ايصال شعوره اوفكرته للاخرين ..

فان احببت سجلي انت وارسلي لي حتى يتم تفعيل اشتراكك فالامر سهل جدا ...

نرجع للموضوع ..
ذكرتيني بدكتوره في علم النفس .. كنت تتكلم في موضوع عن تاثير الناس علينا .. وقالت من ضمن كلامها كيف الوحده تعرف انها حلوه او لا ...؟؟

وكانت اجابتها تقول ان الشخص يستمد الشعور بالجمال من كلام الناس المستمر ...

يعني لو فيه بنت قبيحه مثلا وكل من حولها يصفها بالجمال فما هوشعورها ؟؟

وبالمثل لو فيه بنت جميله في بيت الفاظ اهله سيئه ويلمزون بعض ... كيف بيكون شعورها ؟؟
بالعكس بتشعر بنوع من النقص امام البنت الاولى لان الاولى واثقه من نفسها ... وهذا جملها ..
اما الثانيه فان اهتزاز الثقه جعلها تبدو قبيحه امام الاخرين وبالتالي هذا الشعو انعكس على الاخرين ..

انا احيانا يكون امامي فتاتين احدهما جميله جدا .. لكن شخصيتها سئيه ..
والاخرى اقل جمالا لكنها تعرف ماذا تلبس تعرف كيف تهتم بنفسها .. تعرف كيف تتحدث تعرف كيف تتصرف ..
صدقيني اني ارى الثانيه اجمل ..

والله اعرف وحده مستواها الجمالي لايذكر .. لكن لديها نقاط جعلت الكثيرين ينظرون اليها بانها جميله ..
** الثقه بالنفس .. وهذا كما قلت انعكس على الناس للي حولها ...وشعورها بانها جميله

** تعرف كيف تتحدث ...

** وتهتم بنفسها من جميع النواحي ..

صدقيني لو جلست في مجلس فان الانظار تتجه لها ولاتنظر الى الجميلات ...

نعم يمكن انت اقل جمالا من خواتك .. لكنك لست قبيحه او شينه كماقلت ؟؟؟

خصوصا في هذا الزمن لايمكن ان تكون هناك امراه قبيحه وفيه كل طرق التجمل الموجوده ..

ويمكن الكلام اللي سمعتيه في صغرك اثر عليك وعلى نظرتك لنفسك وترسبت مع الايام وبدات كما قلت في المقارنه بينك وبين اخواتك حتى توصلت الى نتيجه انك اقل جمال ..
وحتى ان كنت اقل جمالا ... فالجمال ليس كل شيء ... والشعور بالجمال شعور داخلي كما قلت لك ..

وشعورك الداخلي جعلك تتنازلين عن اشياء كثيره .. وجعل من السهل ان تخدعي من قبل هذا الرجل ..

باختصار نمي ثقتك بنفسك فهذه اهم نقطه .. من اجل نفسك حتى لاتخدعي من قبل اشخاص اخرين ..

وحاولي تطوري شكلك بما احله الله وتزيني بالزينه المباحه لانها تغير الشكل وتحسنه ..

وصدقيني كم من فتاه اقل جمالا تزوجت اسرع من كثير من الجميلات .. فالزواج يحكمه القسمه والنصيب ..

لكن لعل خواتك فائقات الجمال وانت عاديه وهذا جعلك تبدين قبيحه في نظرك ..

واحمدي ربك لديك وظيفه ومصدر دخل يساعدك ولايجعلك تحتاجين لاحد من الناحيه الماديه .

والاخت نور القران ماقصرت جزاها الله خير