اوافق على عريس أكبر منى ب١٥ سنة ؟؟

انا عندى ٢٧ سنة ومجال شغلى مع الاطفال ذوى الاحتياجات الخاصة
لو جالى عريس من مجالى دة عنده ٤٢ سنة واب ارمل وابنه طفل توحد
هل دى فرصة كويسة ليا ؟ يعنى انا مشكلتى فى السن هو ممكن يكون سنه كويس دلوقتى بس انا بفكر مستقبلا أنه هيكون عنده ٥٠ سنة وانا لسة فى الثلاثينات ممكن دى حاجة تخلينى احس بالنقص ؟ وكمان بالنسبة لابنه يعتبر كبير عنده ١٢ سنة وأطفال التوحد بيحتاجه اهتمام ومعاملة خاصة جدا وانتباه ليهم طول الوقت يعنى لو غفلت عنه شوية بيبقى فيها خطورة على نفسه أو على اللى حواليه ومسئولية كبيرة جدا خايفة اوافق واندم بعد كدة وأحس انى تعبت واكيد هبقى مضغوطة نفسيا
وكمان أنا خايفة يكون العريس دة كل همه يتجوز واحدة تعرف تتعامل مع ابنه وتربيه هو شكله انسان محترم وطريقة كلامه مش بتدى سنه يعنى بحس انى بتكلم مع شاب قريب منى فى السن وهو شكله محافظ على شكله جدا مش باين عليه أنه أربعيني وظروفه المادية كويسة و فى اعجاب شوية ما بينا
انا مش عارفة احدد إذا كانت دى فرصة كويسة بالنسبالى ولا لا ومش فارق معايا الفلوس بس فارق معايا انى هكون مبسوطة ومرتاحة نفسيا ولا لا فى الظروف دى وخصوصا ان أهلى عيلة مفككة وبابا وماما منفصلين وكل واحد فى حاله مفيش ترابط أسرى وعيشت فى مشاكل وظروف صعبة جدا ونفسيتى تعبت جدا فى بيتنا وماما دمرتنى نفسيا وجالى اكتءاب بسببها وبتجبلى عرسان تفرضهم عليا ومش مهم رأى ايه وبتضغط عليا جدا بسبب موضوع الجواز دة وبتقولى انى هعنس ومش هلااقى حد يبص فى وشى ولو عريس جه والموضوع مكملش بتعايرنى وتقولى بيشوفو وشك ويطفشوا !! وصل بيها الموضوع انها راحت سالت اخويا لو قدامك عروسة زى كدة توافق عليها بتقولى حتى اخوكى مش طايقك وقالى لا موافقش على واحدة زيها متخيلين هما بيدمرونى ازاى !!
انا شايفة مميزات العريس دة أنه اب كويس ومتحمل مسؤولية ابنه وبيعلمه كويس جدا ممكن لما يبقى عندى اطفال اكيد هيبقى اب كويس معاهم وهيعلمهم كويس وهيدخلهم مدارس محترمة مش هبقى شايلة هم انى هجيب فلوس منين عشان اعلم عيالى تعليم كويس ومخليهمش محرومين من حاجة
انا عارفة أن القرار قرارى فى الاخر بس محتاجة رأى البنات فى كل النقط اللى اتكلمت فيها دى لانى حاسة أن دة اهم واصعب قرار ممكن اخده فى حياتى ومش قادرة احدد وتفكيرى مشوش جدا