اول تجربة قيادة مع زوجي

صباح الفل
عرض علي زوجي يعلمني السواقة
و ما صدقت و عيوني صارت كذا 😳
لانة كان حلم مستحيل يتحقق
قلت على يدك راح اتعلم 😘
و قالي يلا مشينا
رحنا جنوب الرياض
هناك مساحات شاسعة من الاراضي البيضاء و المخططات
نزل و قالي يلا تعالي امسكي الدركسون
و هو جلس مكان الراكب
و انا شاقة الابتسامة و متحمسة 😃
قالي شغلي السيارة
شغلتها و قالي دوسي على دواسة الكلتش
للاخر و حركي القير ع ١
و سويت مثل ما قالي
و بعدها رقم ٢ و مشيت شوي و قالي رقم ٣
و كنت مستانسة و متحمسة 👍
مشيت مسافة طويلة شوي و قالي وقفي
كانت في سيارة ملبقة على اليمين و يساري نزلة وادي 😵😰
صرخ علي وقفي دوسي ع الفرامل انا ارتبكت و لفيت يسار و بغينا نطب بالوادي 😬
زوجي رفع البريك عشان يوفق السيارة و وقفت السيارة
شياطين زوجي قامت 👹 و جلس يهاوشني ساعة 🤕🤒
انت ما تسمعين يوم اقولك وقفي و دوسي على الفرمل هالحين لو نزلت السيارة بالوادي اشلون نطلعها لو طبينا في ذاك
المنطقة مقطوعة و مافي شبكة
تعانديني و تفكرين حتى توقفين السيارة
🤕🤒 بغيت اصيح و اقوله ما ابي اسوق ودني البيت 😭
قالي انزلي
نزلت و ركب هو و مشى شوي و هدي
قالي يلا اركبي و سوقي 😩
و شغلت السيارة كل مشينا شوي قالي اوقفي اوقف بس السيارة ترتد 😂
يقولي انت قومتك خطاء و وقفتك خطاء
و انا اقولة شوي شوي اتعلم
هذة اول مرة اسوق
وقفت و قالي لحظة 🤔
نزل و راح قدامي مسافة عشان يصورني و انا اسوق
قالي امشي و مشيت و تعديت من جنبة و هو يصورني مشيت مسافة كيلو تقريبا
و وقفت و اناظره و هو بعيد
مب عارفة كيف اتصرف 😥
قلت الظاهر يبيني ارجع
لفيت و رجعت عندة و وقفت
قالي ليش ما رجعتي ع طول
قلت كنت انتظرك 😂
قالي انت مب شايفة المسافة بيننا طويلة 😑
لفي و ارجعي اشلون اجيك مشي 😂
كل شوي من قومتي الخطاء تطفي السيارة و اشغلها
و كل ما مشيت مسافة قالي اوقفي
اوقف بس وقفتي ماش 😭
و يوم يقولي ارجعي ريوس يالله
اكبر مصيبة
اشلون اوجة القير ع الR هذة تعبتني الصراحة 🤕
و تدربت لمدة ساعة و ما جازتلة سواقتي
و هاتك يا نصائح و ارشادات و تعليمات
وبث
كانت تجربة جميلة و ممتعة
و ان شاء ربي يساعدني و انجز و اصير محترفة
سألتة بطريق رجعتنا كم تعطيني من عشرة
قالي ٣\١٠ 😂😂
بغيتي تنزلين السيارة با الوادي و ما تعرفين توقفين و تخربين السيارة ووووو ههههههه
عطوني نصائحكم يا حلوات
وشلون اتعلم القيادة ؟
وش افضل قناة لتعليم القيادة ؟
و افضل الكتب و البرامج ؟
علماً اني سجلت بمركز تعليم قيادة السيارات بجامعة الاميرة نورة
بس مدري متى يتصلون علي عشان اتدرب و اخذ الرخصة
يارب تتيسر و اخذها و اجي ابشركم