اول سنوات الزواج ياغالب يامغلوب

السلام عليكم


بنات موضوعي هذا موجه للي توهم متزوجين لهم سنتين ثلاث اربع خمس ترى اول سنوات الزواج صعبه حيل والي مارح تتحملها وعندها احد يوجهها للصح رح تندم بعدين على الي فات الي خلاني اكتب موضوعي زمان اول ماتزوجت قبل عشر سنوات كنت اشكي هنا بعالم حوا بمعرف ثاني ههههههه يعني كنت حساسه واكبر المواضيع بزياده لانه ابوي الله يرحمه كان مدلعنا وكل مازعلني سحبت شنطتي ورحت لاهلي ولادقيت عليهم وجاو يراضون بينا ومتاكده ان اغلبكم ياحوائيات نفس الشي صح والالا
الي صار وتغير بالموضوع علمتني السنين وكبرت ونضجت وكسرتني وفاه الوالد تركت العناد تركت الحساسيه الزايده تعلقت باطفالي زوجي تغير ٨٠٪‏ قدرت الحمدلله اغيره تزوجته زي الشراره عصبي حيل الله يعين الي تتزوج عصبي معاناه جد بس الحمدلله صرت اعرف الي يزعله اتجنبه واذا زعل خلاص التزم الصمت بطلت عناد ومرادد موعشانه عشان اعيش بهدوء وسلام وعيالي مايتعبون نفسيا والرجال قد ماتدلعينه يدلعك قد ماتعاندينه تنرفزينه ردها لك اضعاف الرجل بطبعه انتقامي واناني الاغلبيه بس لما تعاملينه كطفل يتعلق فيك ومايستغني عنك واي شي ابيه مااطلبه عطول لا اعطيه واسوي اي شي يحبه ولاشفته مروق وقتها طلبته صار خلاص نادر يعيي لاني اطلبه وهو مروق عكس زمان كل شي لا
الزبده يابنات الطلاق كثر الحين الاحظ كل عايله عايلتين عندهم حاله طلاق صح والالا اكيد لاحظتوا الصبر مفتاح الفرج الي تقدرين تمشينه مشيه وانتبهي وعيشي بسلام انتي وزوجك وانتبهي من الي يحرضونك على زوجك وقت الزعل واتمنى بالاخير لكل المتزوجين حياه سعيده يعمها الهدوء والسكينه 💖💖