اول عزيمة رجال في بيتي..تفضلوا حياكم على العشاء..

بسم الله الرحمن الرحيم
السلام وعليكم ورحمة الله وبركاته..

اقدم لكم اليوم..صور عزيمة الرجال في بيتنا

طبعا اول مرة اسوي عزيمة وتشوفوني قبل بشهر اسأل هذي وأسال هذيك..والله يعينني وووو كنت خايفة مرة من انه الوقت مايكفيني للعمل,, وخايفة من ردود الافعال بعدين من النقد ومن هالكلام...

بماانه اول عزيمة ..فطبيعي اكون محتاجة مواعين وووو...رحت وشريت لي 12 صحن ابيض غرف و12 صحن صغير للحلى ..وشنطة ملاعق و صحنين كبار لتقديم الكيكات وصحون ايس كريم للحلى اللي كنت بسويه..

العزيمة رجال طبعا ..يتفاوت عددهم بين 12 الى 20 شخص.. كأقصى عدد..انا هنا انهبلت الا شووي..ههههه
وش بيكفيهم ماشاء الله هههههههه

اللي حضروا كانوا 15 شخص ...

العزيمة كانت مكونة من مفطح مقسوم في صحنين + 8 صحون جريش من المطعم + نوعين سلطة + ثلاث انواع مقبلات + ثلاث انواع حلا عشاء + بيبسي + قوارير صغيرة ماء ...

= البداية : قسمت العمل على ثلاثة ايام..

قبل ب 3 ايام ..غسلت كل الاواني والاباريق والملاعق وكل شي يخص العزيمة ..وجهزتها للتقديم في طاولة خارج المطبخ..

قبل بيومين نظفت البيت ورتبت المجلس ومكان تقليط السفرة.. ولفيت ورق عنب ودخلته الثلاجة.. ولفيت سمبوسة بالجبن ودخلته الفريزر..

قبل بيوم سويت الحلى ..وكان 3 انواع ..بحط الصور والمقادير سوا ان شاء الله .. وطبخت ورق العنب على النار ودخلته الثلاجة..

في يوم العزيمة..( يمه ) رعب ههههههههههه

بعد الظهر عجنت عجينة للبتزا..وطلعت السمبوسة عشان يذوب الثلج منها..
وطلعت مقادير السلطات برا الثلاجة على الطاولة مرة وحدة..عشان اخذ راحتي بالعمل..وطبعا ماانسى جهد خدامتي معي ...

نبدأ اللحين خطوة خطوة :

بسم الله ماشاء الله تبارك الله لا قوة الا بالله

1) طريقتي في ترتيب السفرة..

"]




===========

أولا: السلطات:



حطيت نوعين بس ..في صحنين بيضاوي الشكل ..كل صحن قسمته نفصفين لأن العشاء مقسم الى صحنين كبار في سفرتين..

اول نوع هو الفتوش وكلن عارفه ..حلو وسهل والكل يحبه..

المقادير:
طماطم- خيار-جزر - فجل- كلها قطعتها انصاف حلقات نحيفة جدا..
واضفت خس شرايح + بصل اخضر..

الصوص: زيت زيتون- سماق- ملح-عصير ليمون=

خلطت المقادير لحالها..والصوص لحاله ودخلته الثلاجة..وقبل التقدين بنصف ساعة خلطت السلطة والصوص وغرفته بالصحون..وزينت الوجه بأعواد الفيشار الحار اللي يجي بعلبة اسطوانية..

االنوع الثاني : سلطة سيزر :

المقادير:

خس امريكي مقطع شرائح عريضة + حبة جزر مبشور + توست محمص مربعات صغيرة للزينة

الصوص: علبة زبادي + ملعقتين مايونيز وممكن تزيدي + عصير ليمونة + ملعقة صغيرة خردل معجون

خلطت كل نوع على حدة ودخلتهم الثلاجة..وقبل التقديم خلطت السلطة والصوص وغرفتهم بصحن التقديم وعلى الوجه جبن تشيدر مبشور والتوست المحمص

يتبع رجاء لا حد يرد..>>>>