اول كف تلقيته في حياتي

مساء الخير على كل اخت حبيبه في هاالمنتدى
والله ماادري من وين ابدى ضايق صدري وشايله هم كبيييير ومالي غيركم افضفض له امس اهلي طالعين بااستراحه ومتجمعين بنات عمي كلهم فيها المهم قلت لزوجي نبي نروح لهم خصوصا انهم عازمينا قل اوكيه بكره نشوف طلع يسهرمع شلته ولما جاء الصباح دقيت عليه مارد بعدين ارسل لي رساله يقول اذا لقيتي احد روحي لهم انا مشغول وماني بجاي المهم دورت مالقيت الا عمي الاهو ابوه رجال كبير بس عادي يروح ويجي وماشاء الله عليه نشيط المهم رحت اهلي واستانست معاهم كثيييييييير ونمت عندهم كلمني الظهر ويوم عرف ان ابوه هو اللي وداني عصب وجاء خذاني وفي السياره طول الوقت وهو ساكت يوم وصلنا البيت بدا يهاوش وماعطاني فرصه ادافع عن نفسي سبقني بكف على خدي اول مره في حياتي احد يعطيني كف ماصدقت ان زوجي حبيبي يمد يده علي وهو يقول مستحيل تمد عليك هاليد يالله يابنات شي فضيع ماتحملت لميت اغراضي وجيت بكلم اهلي وقفني وقال البيت اذا طلعتي منه مالك رجعه فيه وولدك والله ماتاخذينه معك ولدي عمره شهرين وطلع وجلس في الصاله انا لفت فيني الدنيا مادري وش اسوي مستحيل اترك ولدي ومستحيل اجلس معه صرت بين نارين تعوذت من الشيطان وجلست افكر مصلحت ولدي فوق كل شي في هالحظه دخل علي وبدى يتاسف ويطلب اني اسامحه وحاول كثير وفي الخير سامحته بس والله يابنات مانسيت الكف قلت في نفسي اخدمه واسوي اللي علي واللي في الخاطر في الخاطر مشى الحال بس هو حاس اني ماخذه على خاطر وهذا اللي انا ابيه
طولت عليكم بس مالي غيركم افضفض له وادري ان كلامي ماهو مرتب بس اعذروني من حر ما فيني
والله يسعدكم كلكم وماتشوفون الهم