اول مرة استخدم الروب... شي مو طبيعي

السلام عليكم. اشلونكم بنات؟؟؟؟؟؟؟؟
حفلة تخرجي من الجامعة كانت المفروض امس عشان جذي رحت الصالون قبلها بيوم و شلت شعر وجهي بالشمع الطبي كالعادة. انا بس رديت البيت زوجي اخترع. قال لي :انت متهاوشة مع احد؟؟؟؟ شفت وجهي و لا الله لا يوريكم بقع و حبوب و انتفاخات حمرا عجيبة .
حاشتني الكآبة و قلت بس ماني رايحة حفل التخرج. اعتقد ان الجو اهو السبب لأنه كان غباااااااااااااااااااار و الظاهر بشرتي ما تحملت. المهم ثاني يوم الصبح نصحتني مرت حماي اني احط روب . و بالفعل حطيت لي ماسك روب كي دي دي بارد على وجهي كامل. حسيت بشوية وخز بس كان عادي. خليته 20 دقيقة تقريبا و لماغسلته الحبوب تقريبا اختفت و صارت حبوب صغار كلش لونها ابيض بس رجع وجهي طبيعي كأن الروب امتص كل حرارة الوجه. و الش اللي يضحك ان حفلة التخرج تأجلت الاسبوع الجاي عشان الغبار :D
و بس حبيت افيدكم باللي صار . يللا مع السلامة