اول مره يزعل مني الغالي 😭

بسم الله الرحمن الرحيم
السلام عليكم ورحمة الله وبركاته وبعد..
خواتي الجميلات كيفكم عساكم في سعاده وصحه وسلامه يارب العالمين..
موضوعي بنت زوجي الله يهديها ويبعد كيدها عني ويشغلها في نفسها..
والله تعبت منها كيف أتعامل معها لا نفع معها طيب ولا مسايس ماتشكر ابدا..
تاكل وترفس عاد الحين متخذه اسلوب جديد بعد ما جات واستقرت عدنا تتجاهلني ولما يكون ابوها موجود تغير معاملتها صحونها ترميها في المغسله ما تغسلها إذا خليت لها ريوق ما تأكله ولما ما احط لها تجلس تسأل ابوها ابوي شي ريوق ابوها يلتفت عليه ما حطيت لها انا قوله الحين وقت غداي تتغدي معنا..
والعشاء نفس الشي إذا حطينا لها ترميه في الزباله وإذا صدف وجات وقت العشا وتعشينا مع بعض.. تجلس تنقد وتتقرف وتقرفنا معها.. وانا ساكته اناظر بس لانها اعرف اسلوبها تبي تستفزني عشان اعصب وارفع صوتي وابوها ما يحب هذا الأسلوب وعلى فكره هيه ذكيه تسوي هل حركات بدون ابوها ما ينتبه يعني بس لي انا..
و الحين صحيت ولقيت المطبخ معفوس جلست اغسل واتحلطم عليها زوجي ما عجبه لأنه ما يحب كثرة الكلام والشكوى وهيه تعرف.. زعل وطلع.😤.
انا احاول انظف كل شي عشان ما يكون لها سبب ما تغسل صحونها وتقول مب انا انام والمطبخ والبيت كله نظيف.. يعني اصلا ما تسوى لنا شي ولا تساعد في شي ومومطلوب منها تسوي شي بس تخف علينا شوي حركاتها ترحمنا..
غيره غير طبيعيه فيها لما نجلس مع بعض كلنا وابوها يتكلم معي تعصب وتقوم تروح وتخلينا وتسوي حركه انها زعلت من ابوها.. معنه ابوها يكلمها بس هي تبي ابوها يتجاهلني وهيه موجوده يعني انا وبس ليش.. انت ما تبي تكلميني كيفك اما ابوك زوجي احترمي ابوك على الأقل..
وهذا كله وانا ساكته عنها وما اضايقها وتروح لعماتها وتتشكى مني وانا ما سويت لها شي.. يعني ما باقي بس غير ابوس ايدها وراسها عشان ترضى عني تتصرف كأنها عمتي ام زوجي أو عديلتي..
والله من قهري على نفسي اتكلم.. لكل إنسان طاقه يتحمل لما تزيد عن حدها ينفجر وهذا الي صار اليوم وتخاصمنا انا وزوجي و زعل مني وراح وهو يعرف انه بنته غلطانه لكن هيه بنته ما راح يوقف معي عليها..
ويمكن انا اسلوبي في الشكوى منها غلط لاني اسكت ولما ما اتحمل انفجر.. وهو ما يحب هذا الأسلوب ابدا حتى ولو معي حق ما يوقف معي ما يحب العصبيه والصوت العالي.. واصلا هو يبيني اسكت واتحمل ما يبيني اتشكا منها.. ايقولي الله بأخذ حقك منها ومن غيرها بس لا تشتكي وعدي.. هو اسلوبه في الحياه كذا....
وبنته كبيره عمرها 22 سنه مش صغيره وانا ما جيت الحين وبقول ما تعودت عليه لا انا من عمرها عشر سنين ابوها متزوجين.. لا طيبي نفع ولا الهدايا ولا سكوت والتغاضي عنها والتغافل بالعكس زاد غرورها وجحودها..
الله يرزق ها الزوج وتروح عسى غيرتها على ابوها مني تخف شوي..
من فضلكن اخواتي إلى عندها تعليق يجرح وبتعين نفسها محامي الدفاع تعليقك ما برد عليه لاني إلى فيني كافاني..
وانا اليوم بذات ما اتحمل لأن الغالي عمره ما زعل مني ابدا 😭💔..
الله يهديني ويهدي بنت زوجي وتعقل وتعرف انه إلى تسويه فيه ما يجوز لأن هل جزاء الإحسان إلا الإحسان.. والله صايره لها مثل الخدامه تاكل وتشرب وتمش ايدها في طوفه وما شكيت غير من التعب الي فيها.. تخيلي بيتك نظيف ويصبح الصبح تحصيله معفوس نكايةً فيك.. وعشان تتسبب مشكله بينك وبين زوجك....
سبحان الله وبحمده سبحان الله العظيم..