اول مشاركه لي ساعدوني ابني يكلم نفسه

السلام عليكم ورحمه الله وبركاته
ياليت ينتقل موضوعي لقسم الطفل حاولت اكتب فيه لكن تضهر لي رساله لم نقم بالتفعيل

اكتب لكم مشكله ابني الغريبه
اولا هو ولدي الوحيد عمره خمس سنوات احيانا احسه ماهو طبيعي واخاف كثير عليهانا احاول اربيه تربيه سليمه احاوره كثير واتكلم معه لكن اعترف اني كنت جاهله بامور التربيه ايام كان صغير لكن بعد دخولي النت حسيت كم كنت جاهله والحين صرت اقراء كثير والفضل لله سبحانه ثم فضلكم اخواتي الكريمات

الزبده طولت عليكم
ولدي عمره خمس سنوات مايعرف يعد لين العشره ولسى ما يعرف للحروف احسها حاجه تخوف انا اعلمه يمكن شبه يومي بس بدون ضغط عليه لكن ماهو راضي دخلته روضه شهر وجالس يصيح مايبغاها وان ما احب اضغط عليه
دائما كلامه غريب يقول ما ابغى اكبر ياماما ويجلس يصيح اذا قلتله بعدين تكبر وتدخل المدرسه
ويقول ما احب المدرسه خلاص خلصت منها
وبعد يقول انا ماابغى اصلي مع اني اما اقوله صل لكن الله ياربي يصلحه ويرزقني بالذريه الصالحه واخواتي المسلمات

الطامه الكبرى انه دايم يكلم نفسه يتخيل انه فيه ناس معه ويتكلم على لسانهم والله تقولون مسلسل والشخص واحد وهو مدمن تلفزيون

يلعب كثير استيعابه مره بطي خجول مره من الناس مستحيل يتكلم واذا تكلمك جلس يرفع صوته ويسوي حركات كثيره باسباب الخجل
الميزه المفيده فيه انه شاطر بالكمبيوتر يعني يفهم فيه بسرعه يعرف اشياء صعبه مثل فتح الصفحات والتصغير واماكنها وتغير شاشه سطح المكتب واشياء كثيره
وهو حنون مره على وعلى ابوه
اجتماعي مع الاطفال اللي يعرفهم بس
هذا كل شي عنه ابغاكم تطمنوني عليه وكيف اخليه يحفظ بسرعه مع انه مافيه طريقه الا جربتها حتى التعلم عن طريق السى دي وبالعاب شيقه لكن مافيه فايده

قلولي كيف اخليه يعبر عن نفسه بدون خجل
ان شا الله ما تطنشوني واعذروني اذا انا مكبره السالفه هذى وحيدي
والله يجزاكم كل الخير والف مليون شكر مقدما