اوووه ياسعووودي

كتبت هالموضوع من حر مافيني اقرو معي هالاحصائيه وبعدين بطلع الي بقلبي



نسبة تملك المواطنين للمساكن :


الكويت 85 %



الإمارات 90 %



تونس 80 %



بريطانيا 85 %



السعوديه الغنيه 20 % تراها 16% بس شكلهم استحو يحطونها






الحين السعودي على خبري من كم سنه حلمه فله الحين انكمش الحلم وصارت شقه وليتنا قادرين على سعرها


لين وين بنوصل مثلا شوي شوي صندقه وبعدها خيمه ومن جفر لدحديره وياقلبي لاتحزن



وبيصير هم وحلم السعودي شئه وعربيه << فلم عربي


عفوا قصدي خيمه ووانيت84 غماره وحده ويحشر عياله فالصندوق << فلم سعودي ياربي والله من قهري انكت:angry:


طيب والدبره انا حرمه زوجي راتبه الحمدلله زوين ومع كذا مو قادرين على بيت ولاحظو تراني انا وياه بس وان شالله البيبي فالطريق اذا ربي تتم حملي على خير


ومتزوجه فوق 10 سنوات ومن اجار لاجار والاقساط برضو لاعبه فينا


يعني من وين نلقاها من الاجارات ولا البنوك



يعني واحد راتبه نقول 6000او 7000


والحين الشقق الملك واصله 400000


بالله وش يكفي الراتب تقسيط ولا يصرف على عياله ولا فواتير ولا اجارات ولا ولا


لا وحاسدينا على بدل السكن


برايكم وش الحل ؟


تدورن فكرة نسوي جمعيه نتقاط كل مواطنين السعوديه وكل شهر نشتري بيت لواحد:hahaha:


ماحك جلدك مثل ظفرك


ماعليكم تفكير حرمه مشو مشو <<< ماحلل وحده مرشحه نفسها لمجلس الشورى تسرق فكرتي :cool:



هذا بس العقار والديون والرواتب



طيب نجي للصحه من فتره عندي موعد في مستشفى حكومي عشان الحمل


لاحظو يابنات حمل بعد سنوات انتظار وتسوي لي سونار الدكتوره وموقادره تشوف شي اجهزتهم مو متطوره وتظغط بطني بكل قوه بعدها جتني الام وافرازات وبغيت افقد حملي


واقولها ليه ماتطلبون اجهزه جديده تقول لي ليه هي مستشفى انا هذا مستشفى حكومي (الدكتوره باكستانيه )


هذا برضو من الفساد الي يصير في وزارات المملكه وعلى راسها وزارة الصحه الحكومه مو مقصره


تصرف مليارات عليهم ولا هو مبين مستشفايتنا من سيء لااسواء اجل اجهزت سونار مو قادرين عليها ؟؟؟



ملاحظه ( رحت مستوصف خاص متواضع جهازها متطور لاظغطت ولا شي وكل شي واضح لها )


واقولها دكتوره لازم اكون حشرانه عشان يبين تقولي بكل ثقه لا لا دنا اجهزتي متطوره ان شالله يبين كل حاقه <<< بتشق هدومها :44:


يعني مستوصف متواضع قدر على سعر الجهاز ومستشفى حكومي مو قادر يوفره ؟؟؟؟



وبما اني تطرقت لموضوع الفساد حابه اقول سالفه تقرقع بقلبي


عندنا عامل بنغالي على ماعتقد.. عامل ملتزم يخاف الله ومحترم


يشتغل في مسجد الحاره تبع حينا واذا فضى يغسل السيارات وينظف العماير


وصار كذا موقف اثبت نزاهة الرجل وحسن خلقه


مالكم بالطويله


هذا العامل عنده اخو متوفي له كم سنه بحادث سير صدمه مواطن سعودي والسعودي غلطان 100%


وكا أي عامل ضعيف مسكين تنازلو بس يبون الديه الي هي 120 الف


مو زي ربعنا اللهم لك الحمد يطالبون ملاييين ماعلينا


المهم الى يومكم هذا ماشافو ريال ليه طيب


السعودي الي صدم اخو العامل ولد قاضي والقاضي مهدده لو اشوفك تطلب ولا تشتكي


بسجنك !!


العامل معه الاوراق والاثباتات ويبي من يجيب له حقه


المغزى من هالقصه انه فيه فساد واصل للقضاء وياربي رحمتك وش بقى


وهذي قصه بسيطه والي اعرفه اعظم بس لقدسية القضاء اكتفي بهذا القدر



قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " الْقُضَاةُ ثَلاثَةٌ قَاضِيَانِ فِي النَّارِ , وَقَاضٍ فِي الْجَنَّةِ , قَاضٍ قَضَى بِغَيْرِ حَقٍّ ، وَهُوَ يَعْلَمُ فَهُوَ فِي النَّارِ , وَقَاضٍ قَضَى بِغَيْرِ الْحَقِّ ، وَهُوَ لا يَعْلَمُ فَهُوَ فِي النَّارِ , وَقَاضٍ قَضَى بِالْحَقِّ فَهُوَ فِي الْجَنَّةِ " .



نجي لحبيبة قلبي البلديه اعرف بنات توظفو في مصنع عاملات انتاج


المصنع هذا يوزع لمحلاته الي منتشره في مناطق الرياض وشكله في كذا مدينه غير الرياض مو متاكده


المهم البنات فالمنتدى لهم فتره طايحين مواضيع يبون بديل لهالمحل لان بيقاطعونه لغلاء اسعارهم وانخفاض جودة الاكل الي كله عفن ومقطن وماينوكل وكذا حاله تسممت من اكله


حزرو فزرو اسم المحل <<< برا :07:


ماعلينا البنات الي فالمصنع يشتكون من سوا المعامله غير ان الاكل بجد معفن يقولون واحنا نسويه نشوف حاجات غريبه ونشم روايح تحوم الكبد وياويل الي تتكلم او تبدي ملاحظه سوي شغلك وانتي ساكته


غير ان الاكل يتسوى ويتخزن فتره فالثلاجه يعني مافي شي فرش لما سالت طيب وين البلديه قالو يجون ويشوفون ولا كنهم يشوفون


يعني الدعوه فيها رشاوي وفساد


انا ماودي اتكلم فهالمصنع لان العاملات فيه ناوين لهم نيه ومخليه المهمه عليهم وشكله ان شالله قريب بيتقفل


الي علينا منه البلديه وش دورها وليه كذا



هذا غيض من فيض


بس تخبرون انا انسانه وراي مستقبل زاهر اخاف استرسل تروح علي :unsure:


انا كامواطنه مابي شي الا بيت يلمني يكون ملك ورعايه صحيه ممتازه وتعليم ممتاز


وابي وطني التوب في كل شي



ونصيحه لكل زوجه وام خوفو ازواجكم وابنائكم من الله انا اتوقع الي وصلنا له


بسبب قلة الوازع الديني والام مدرسه من صغرهم حسسيهم بالمسؤليه والانتماء لهذا الوطن


وانه يقدم وطنه على نفسه مو العكس ويخاف ويراعي الله قبل أي شي وكل شي


وزوجك مافيها شي تعطينه كم محاضره بطريقه غير مباشره وتذكرينه الذكرى تنفع المؤمنين



بجد الفساد منتشر وانا خايفه على هذا الوطن ربي يحميه ويخليه لنا ويخلي لنا ابو متعب :heart:


والله الحكومه ماقصرت تضخ مليارات بس الفساد مخرب وضع الوطن والمواطنين




واحبك يالسعوديه لا وحده تجي مشوته هذا عتب احباب بيني وبين وطني حبيبي



يلا انطلقو كل وحده تفضفض مع اني اشك :D وتقول مقترحاتها الحين انتم بتصيرون في مجلس الشورى :icon28: يمكن احنا الحريم احسن من الرجال ومايجيبها الا نسوانها والي مايحب النسوان الله يبعتلو حمى :hahaha:


انتشروووووو