اللهم صلِ على نبينا محمد ماتعاقب الليل والنهار
تذكرت أيام رمضان في عز البرد يوم كانت أمي تغطينا في بطانيتين
صحيت مره على صوت أمي وأبوي وعلى ريحة القهوه مع ريحة كبسه طلعت من تحت البطاطين
المكومه وأروح للصاله : أمي جالسه على الأرض وجنبها القهوه ويديها على الدفايه وفوق الدفايه بريق الحليب
أبوي متكئ ولابس الفروه ويشرب فنجاله. أول ماشافوني ضحكو كلهم يقولون لي تعالي تعالي
مآشآء الله بنتنا بتسحر معنا اليوم
يغطيني أبوي بالفروه ويقول لمي الحليب الحليب بسرعه يدفيها
مبسوطه ( صحيت على السحور) أمي تقول بسرعه روحي صحي خواتك الكبار
طيران لغرفهم أطبل على الباب واسحب البطانيه السحور. السحور. وارجع لفروة ابوي مبسوطه
اتسمع على سواليفهم
كبسه طعمها شي ثاني لبن. فواكه
اجتمعنا على السفره يبدأ أبوي يعلق على اختي الكبيره ويمزح مع اختي الوسطى
(اضحك من قلب أحس اني أسعد طفله ) من غير مدحهم لي بصوم بكره
أبوي : يالله بسرعه اشربن مويا بسرعه بسرعه الآذان قرب نتسابق على من يفرش أسنانه قبل
ونتسمع على الآذان
يقوم أبوي من مكانه وهو يقول لاإله إلا الله بصوت عالي رايح يصلي وألحقه وهو يقولي برد يابنتي برد ارجعي
ايام راحت الله يرحم أمي ويشفي ابوي
تعاملهم غير الحين لو أشوف واحد من عيالي صاحي على السحور ( على طول أقوله إرجع نام
وش اللي مصحيك )
مانحسسهم برمضان 24 وعشرين ساعه بالمطبخ ومعصبين لا تلمس ولا تسوي
إبعد عن هذا
اتمنى انهم يحسون بحساسنا قبل وبنفس الوقت مقدر اسوي ربع ماتسوي أمي
الله المستعان
الله يجعلنا في رمضان من عتقائه من النار يا كريم
ويرحم أمواتنا وأموات المسلمين
وصايف حور @osayf_hor
عضوة
يلزم عليك تسجيل الدخول أولًا لكتابة تعليق.
الصفحة الأخيرة
الله المستعاان ..
يا ليت ترجع أيام
زمان :frown:♡♡
الله يبلغنا رمضان
و جميع المسلمين و هم
بخير و عافيه .