(بسم الله الرحمن الرحيم)
اليوم نبي ندردش شوي عن الطفولة وذكرياتهاا
رح اقولكم عن بعض مواقفي
و عن اول يوم سجلت فيه بالمدرسة:
اول شيء ابوي الله يحفظه لما توظف بجدة كان على وقت ولادتي بس خلانا عند والديه رحمهما الله بديرتنا بالجنوب عاد تعرفون اجواء الجنوب هادية وجميلة وطبيعتها الخلابة واحنا ديرتنا بأعلى منطقة جبلية
طبيعة ساحرة عاد انا عشت طفولتي كلها بهالمنطقة الجبلية اصحى على صوت اذان جدي وزقزقت العصافير وبعدها اشوف عمي وجدي يعملون بالمدرجات الزراعية و عماتي يفتحون للماشية تطلع للجبل وبقيةالحريم بالبيت يجهزون الفطور عشان الرعاة ياخذونه معاهم وامي وزوجة عمي يروحون يجيبون الماء من البئر في القرب المصنوعة من جلود الماشية واحنا الاطفال اكبر همنا لعبتنا بس نتنقل بين الحقول والجبال (هايدي على غفلة ههههه)
المهم لما صار عمري 6سنوات وقت المدرسة ابوي اخذنا معه على جدة وجتكم هايدي مو مستوعبة الوضع الجديد مافيه جبال ولا جدي ولاجدتي ومن الاجواء الحلوة والهادئة ومن زقزقة العصافير الى اجواء جدة المزدحمة والحارة والعمائر الشاهقة ؟؟ كنت اسأل نفسي وين العصافير والجبال والسحب والطيور المحلقة اين بقية اسرتي اين جدي وجدتي؟؟؟؟؟؟؟:icon33:
نختصر ونروح لاول يوم رحت فيه المدرسه للتسجيل دخلنا الاداره وانا مو متعوده الا على اهل الديره:32: واشوف المديرة والابلات و(ابله حياة ) كانت كاابوس لي فيما بعد
ورحت وانا حاطة خلطة على شعري مكونه من (محلب وقرنفل) <<ياحليلي باقي متأثرة بالبيئة
بعدها قالو اروح الوحدة الصحية وهناك اول شيء قياس النظر طبعا وقتها مدري وش السالفة (بس لما كبرت عرفت وش السالفة)
ولما جلست عند الدكتوره كان معها مؤشر (انتل الراديو)و عندي هالمؤشر مربوط بما كنت اشوفه بالاحوال الجوية لما كانوا يستخدمون المؤشر للاشارة لمناطق ومدن المملكة(مذيع النشره الجويه حسن كراني) واختكم حسبت نفسها في نشرة الاحوال الجوية ولما بدئت الدكتور تسألني وين الاتجاهات انا مدري وش تقصد بس اناظر في المؤشر واتذكر مذيع الاحوال الجوية قلت في بالي سهله ورحت اقول شرق وذهلت وقالت برافوا(اول مره اسمع برافو) ومرة غرب وهي تقول براافو ههههههه ذهلت وجنت وقالت لامي بنتك ماشاء الله بتعرف الاتجاهات دي باين عليها حتطلع معلمة كغرفيا(اول مرة اسمع مرة كغرفيا)<<ياحليلي الناس في عالم وهايدي الجنوب بعالم
وتم انهاء التسجيل
وبدينا اول يوم دراسي ولما دخلت الساحة وشفت الصفوف والبنات مترتبين كانت صدمتي الثانية بعد صدمة جدة وحطوني بطابوري ولما بدى الطابور يمشي ومن الفجعة وانا امشي اناظر وراي في الطوابير اللي لسى ماتحركت اللى وتجي ابلة حياة تصقعني بظهري وتقول(اتعدلي وانتي تمشي)(يافتاح ياعليم) ياهي قويه (وقتها وزني 15 كيلوجرام -حسيت فقرات ظهري تخلخلت) وتذكرت جدي وجدتي وتدليعهم لي (من الهدوء الي العنف)
بس والله كاانت اياام حلوه الله يسقي ذيك الايام حلوها و مرها هذه القصة حصلت احداثها نهاية عام 1399/هجري
وما انسى الفصل و جو الدراسة و كنت استغرب ليه البنات يبكون وانا ماخذتها وناسة نتيجة العالم الجديد وكنت ثرثارة شوي وكل ثرثرتي عن الديرة وقريتنا وماعزها وطيورها والرعاة والراعيات وحداء الرعاة و حبوني الابلات وصار لي شعبيه لدرجة انهم كانو يهربوني من الحصص ;)لغرف المعلمات لاني كنت اسولفلهم عن حياتنا في القريه(فيلم بدوي) واول يوم دخل التلفزيون بيتنا طبعا كان مو ملون (الابيض و الاسود) كنت افكر ان مافي احد في السعودية عنده تلفزيون غيرنا وكل ما اشوف شي اجي اليوم الثاني واحكي للمعلمات ايش اللي حصل بالتلفزيون ومن ذكرياتي اللى ماانساها يوم دخل شهر رمضان كنا نفطر فوق السطح والاسرة مجتمعة وبرنامج الشيخ الطنطاوي توه يبدا (الله يرحم شيخنا الفاضل وجميع المومنيين)
ايام كانت قمه في البساطة والبراءة ولا برنامج افتح ياسمسم لايمكن نفوته لدرجة مره انقفل باب الغرفة اللى التلفزيون فيها وابويه ماكان موجود والبرنامج على وشك البدء كيف تتوقعون فتحنا الباب
(رحت انا واخويه عند جارنا اللي هوه صاحب البيت وكان كبير بالسن ولزمنا عليه وشرحنا له المشكلة
وماقصر فتح لنا الباب) ومن ذكرياتي اول ريال يقع في يدي كان لي معاه حكايه رحت عند صاحب البقالة واعطيته الريال وكل ماقال ايش تبغين تشترين اقول الي تبغا تعطيني اعطيني مسكين مادري كيف كان متحمل هايدي الجنوب.
/ والى اللقاء في الحلقة القادمة مع هايدي الجنوب لاني مشغوله مع اختبارات ولدي في كلية الطب سنة اولى. (دعواتكم لي و له بالتوفيق ليقول الملك امين ولكِ مثل) :27::icon35:
قلب ماتعود يجرح @klb_mataaod_ygrh
عضوة نشيطة
يلزم عليك تسجيل الدخول أولًا لكتابة تعليق.
شيوخها
•
ماشاالله ايام طفوله جميله عشتيها بالجنوب اجل مانكذب هايدي الي بالتلفزيون يازين حياتها اتمنئ اعيش زي حياتها طبيعه وهواء نقي
الصفحة الأخيرة
ذكريات جميلة وطريقة عرضك لها زادها جمالاً
الله يخليلك ولدك وتشوفيه دكتور كبير ويفرحك بشوفة اولاده ويقولولك .............."ياجدة"