السلام عليكم ورحمه الله وبركاته
اليوم راح اقولكم طريقتي في الايدام الهندي الصراحه خييييييييال طعمه
نبدأ في المقادير :
دجاج او لحم او ربيان
خضار مشكله (بطاطس _ فلفل رومي _ جزر _طماطم _ بصل _ ثوم زنجبيل اخضر مدقوق _كزبره خضرا حزمه كبيره مفرومه ) هاذي اللي استخدمتها لو حابه تضيفي زهره ولا فاصوليا ولا كوسا ولا فلفل حار قرون على كيفك انا سويته بارد عشان عيالي
بهارات الكاري انا جربت كذا نوع بس هاذي اطعم شي
فلفل اسود
علبه زبادي
ملعقه كبيره خل ابيض
ملعقه كبيره صلصل
ملعقتين نشا او ملعقه دقيق ابيض
والمكون السري خردل
نجي للطريقه :
اذا كان لحم اسلقي اللحمه لوحدها ومليحها لين تستوي
خوذي البصل وحمسيه مع اللحمه اللي انسلقت وحطي الخضار والثوم الزنجبيل وحطي بهارات الكاري ونص الكميه من الكزبره وخليها تنحمس حول 5 دقايق خذي علبه الزبادي وحطي عليه ملعقتين خردل كبيره وملعقه صلصل كبيره واخلطيها وحطيها فوق الخضار وملعقه الخل وحطي مرقه اللحم فوقها وبعد كذا شوفي اذا تحتاج ملح ولا لا لان المرقه مملوحه من قبل وخلوها تتسبك وقبل لا تسكرون النار ذوبي النشا في مويا واذا مافيه عندك الدقيق يفيد بالغرض راح تشوفين ان قوامها صار غليظ خليها دقيقتين وطفي النار وحطي باقي الكزبره الخضرا ورشه فلفل اسود واغرفيه طبعا تؤكل مع العيش او رز ابيض وممكن للي يسون حميه تؤكل زي الشربه
ملاحظه:
لو حابه تعمليها بدجاج او الربيان
خذي الدجاج يكون مقطع ارباع او الربيان يكون ني احمسيه البصل وحطي خضارك وزيديه مويا حاره
وهاذي صوره للطبخه
وهنا صوره مقربه
وبكذا نكون انتهينا اذا عجبتك الاكله لا تنسين شكرا :cook:
ويالا قدامي اشوف التطبيقات :35:
ننتظر مزيدك المميز