ايش اسوي مع بنتي الحلوه

بناااات عندي كذا مشكله
انا مطلقه ومعي طفله عمرها ماوصل سنه ونص
بنتي جميلة وملفته للإنتباه وجريئه وحركتها كثييييره ماتجلس ابد الله يصلحها الا عند النوم ومع جمالها قصيرونه وهي تمشي تحفه بسم الله عليها الله يحفظها لي
احنا عند اهلي بحكم الطلاق
اذا جانا ضيوف تجلس بنتي من الفرحه فيهم تستعرض تركض طول الجلسه ماتجلس ابد وتضحك وترقص تدور وترفع يدها فوق وتقلب عيونها واذا ضحكوا الحريم من سالفه؛؛ تضحك بقوة وبصوت عالي تغصب على الضحك ونجلس نضحك منها بتقولين امسكيها؟ ماقدر عليها وحتى اذا رحنا لأحد تسوي نفس الحركات
وفيه ضيفه قريبه من بيتنا تجي كل يومين وتردد بسم الله علي ماتجلس ؛وتقول كلام كثير ؛ 
ودايم اشوف رؤى تخوف في بنتي وتفسيرها تحتاج رقيه وفيها حسد 
وهي كل ماتجينا الضيفه هذي ؛ او نروح لأحد 
تمرض بنتي بقوووه؛ وعلى فكره صار لها ثلاث شهور ماتاكل ابد
بس على الرضاعه
وتكرر موقف مرتين 
مرة و عمرها شهور
ومره قبل يومين كنت معزومه بجمعة حريم وطبعا علقوا على جمالها
الموقف انها فجأه تختنق كأن احد ماسك حلقها
وتنقز وينقلب وجهها ازرق وانا انفخ وجهها واغسلها في ماء يالله يرجع لها النفس بعد ماابكي وامي تبكي نظن انها خلاص ماتت
تجمعت مع صديقاتي قبل فتره 
وحده منهم نرفزتني من وصلنا وهي ياالله يافلانه بنتك مزيونه صح تشبه لك انتي وخواتك بس غير فيها شي زايد
ويوم جلسنا تمسك وجه بنتي وترفع شعرها فوق وتجلس تناظر فيها ياختي بنتك حلوووه فيها جاذبيه موب طبيعيه >>ضايقتني يوم ترفع شعرها وتمسكه فوق عشان تمقل فيها بدقه اكثر
طلعنا عقبها بيوم واحد مع نفس الصديقات وكررت نفس الكلام
طيب خلاص دريت انها حلوه وحتى والله كل اللي يعلقون من قرابه وصديقات مايذكرون الله ولاوحده قالت ماشاءالله وانا استحي مررره عجزت اقول لاي وحده اذكري الله
حتى اهلي الله يحفظهم 
دايم يعلقون على جمالها مع انها 24 ساعه معهم في البيت
ادري يحبونها بس انا ماتكلم عن الحب اتكلم عن تعليقاتهم وتنقال من قلب؛ ودايم تطيح طيحات شينه مع اني امشي وراها ؛ قلبي متعبني وكل مانروح لأحد 
انا روحاتي كل شهر مرة لجمعة قريباتي قلصت روحاتي عشانها
كل مانروح لأحد تستفرغ عندهم او تطيح او تختنق
انا ماعندي الا ذا البنت والله اموووت فيها لويجيها شي اموت
ومع اني ماأكشخها ابد ولبسها عادي ورخيص
ايش اسوي معها حركاتها تزيد جمالها ولاتستحي اذا جانا احد او رحنا لأحد حتى بالاماكن العامه تسوي حركات
مرة وديتها المستوصف بطعمها وكنت واقفه عند غرفة الدكتوره وعندي وحده حرمه كبييرة ناظرت في بنتي قالت ياماشاءالله تبارك الله ونفثت عليها ومسكت راس بنتي قرت قالت حصنيها واقري عليها
>>>هذي الانسانه الوحيده اللي ذكرت الله عليها
المشكله الثانيه انها شقيه مثلا اذا فيه اطفال اعمارهم اكبر منها 3 سنوات اول ماتشوفهم تركض تضمهم واذا لعبت معهم وانبسطت تروح تركض وراهم وتسحب شعورهم وتضحك بقوة يعني اضحكوا وتبيهم يصارخون عشان تضحك
واحيانا تاخذ جزمه وتضربهم مع روسهم وتضحك بقوة تبغاهم يقولون ااااه وتموت ضحك واذا اخذتها عنهم بكت وانصرعت واذا تركتها تطيح ضرب في الاطفال قلة ذوق مني يجون يقولون فكينا من بنتك وهي تكركر وتضحك ومرة ضربتها وكانت تضحك ويوم ضربتها بكت وندمت شكلها محزن لانها تقصد لعب وضحك وانا بكيتها
مع ان ضربها مايوجع لسى عمرها سنه وشهرين لكن الاطفال مايحبون هالشي وامهاتهم يتضايقون
فيدوني