ايش رايكم في الكلمة توجع صح ،، وليلة العيد بعد ..

السلام عليكم ورحمة الله وبركاته ..
عيدكم مبارك وكل عام وأنتم بخير ..
البارح حصل موقف مع أعز صديقاتي نكد علي فرحة العيد ،،
هي الله يهديها مع ان قلبها طيب وراعية واجب لكن أسلوبها جارح
في الكلام هي ترمي الكلمة ولا همها كيف يكون أثرها على اللي قدامها ..
وأنا عكسها ما امدح نفسي والله لكن عشان احطكم في الصورة ،، أنا رقيقة معها
ومع غيرها ولا أحب اجرح احد وافكر في الكلمة قبل ما اطلعها ..
وأنا والله ياما جرحتني بكلامها وعديتها لها لأني اعزها ولا ابغى اخسرها ،،
لكن البارح كنت اسولف معها بالتلفون وفجأة قالت كلمة صدمتني لدرجة ما استوعبتها
في البداية :eek: ،، كنا نتكلم في موضوع وفجأة قالت : ( انت على ايش مشتاخة ؟ تراك بنت فلان :eek: )
قصدها على ايش شايفة نفسك وانا والله عمري ماشفت نفسي ولا تكبرت والموضوع اللي كنا نتكلم
فيه ما يخصها هي لكن يخص ناس غيرها لكن هي تبغاني اتنازل وارضى بشي وانا ما ابغاه ،،
اللي صدمني وزعلني يوم تقول تراك بنت فلان ،، وابوي والله رجال والنعم فيه والكل يشهد له
بالخير وهو من وجهاء قبيلته وشيوخها ،، وحتى لو ماكان كذا هو ابوي ولا اسمح لأحد يمسه بكلمة ..
لا والمصيبة يوم عاتبتها على الكلمة اعتذرت بأسلوب بايخ وكأني انا اللي غلطت عليها ،،
لا وتقول أنا آسفة على الكلمة وآسفة اني اتصلت عليك :eek: ..
وبعد شوي ارسلت لي على الجوال وكاتبة : انت ضيعت فرحة العيد !!!
بالله ايش رايكم ؟؟ والله انها نكدت علي وما حسيت بطعم العيد ..
ومن مواقفها معاي تحط يدها جنب يدي وتجلس تتريق عشان هي ابيض مني :eek:
ومرة كنت مسويه لها عزيمة في بيتي وعازمة اهلي ومتكلفة وتجي تحرجني قدام الناس
وتقول هذا اللي قاعدة تشتغلين فيه من الصبح ؟ :eek: مع اني ماخليت شي ماسويته
والأكل كان روعة وكل شي مرتب ،، والكل عجبه شغلي الا هي جلست تتريق تخيلوا !!!
هي اسلوبها بايخ حتى مع اهلها وتجلس تسب اختها وتتريق عليها وهي جالسة معانا !!
وانا والله من مواقفها هذي بدأ قلبي يتغير عليها مع اني والله اعزها مرة لأن لها وقفات
حلوة معاي ، لكن احس اني خلاص ما عاد اقدر اتحمل طولة لسانها وخصوصا الموقف
اللي البارح احس انه كسر شي كبير كان لها في نفسي ..:(
اعطوني رايكم في اللي حصل وقولوا لي لو كنتم مكاني ايش تسوون ؟؟