ايش صاير بالدنيا .. قصة ضيفة تسرق من بيت صديقتي ..

السلام عليكم ورحمة الله وبركاته
كيف حالكم بنات
ودي من باب اننا خوات
والنصيحة لوجه الله
تفسرون لي هالموقف ... القصة طويلة
اليوم العصر سولفت لي وحدة من الصديقات المقربات الي اعتبرها اخت مثل خواتي تماما
قصة صارت لها
القصة أثرت فيني و سببت لي خوف
ممكن تقولون مبالغة لكن هذا الي صار
صداقتنا قديمة و الحمدلله والشكر مازالت مستمرة رغم أنها تزوجت وراحت منطقة بعيدة عني
إليكم القصة
تقول تعرفت على بنات من فترة
وبعد فترة دخلوها في قروب واتس
القروب هذا بعضهم حريم كبار وبعضهم متقاعد وبعضهم ربات بيت وبعضهم صغار فيهم مختلف المستويات الاجتماعية
المهم وحدة من القروب مسمية نفسها الشيف ( أم ف..... )
هي تستقبل طلبات وتطبخ في بيتها وتسترزق ووضعها حسب كلام صديقتي مستورة
صديقتي كريمة جدا جدا جدا وانا اعرفها مع ان وضعها المادي عادي ومو موظفة ربة بيت
كانت تقول لصديقتي نبي نطلع كوفيهات وتطلع معاها وقت الفاتورة
تحاول تتهرب وصديقتي تدفع منعا للإحراج وتمشي الموقف
صارت تزور صديقتي و تتشكى وصديقتي تروح الثلاجة وتعطيها من الفواكة والخيرات الي بالثلاجة
المهم مرة عزمت نفسها عند صديقتي وكانت صديقتي مو نايمة زين المهم قالت لصديقتي وجهك تعبان ادخلي نامي ارتاحي وانا بقعد في المجلس الين ترتاحين
صديقتي فعلا تعبانة دخلت تريح في غرفتها
ايش سوت تتوقعون؟؟؟؟
دخلت المطبخ و فتحت الفريزر
و سرقت ثمان أكياس لحم !!!
وخلتهم في كيس وخشتهم
عشان وهي طالعة تاخذهم معاها
تقول صديقتي وهي طالعة من عندي طلبت منها بشكل غير مباشر
فواكه و خضار واعطتها صديقتي
لكن تفاجأت وهي طالعة انها ماسكة معاها كيس و الكيس يطلع صوت
مثل صوت أكياس اللحم المجمدة لما تتصادم مع بعض اتوقع فهمتوا قصدي
و مااهتمت صديقتي بالموضوع
قالت يمكن معاها أغراضها او ماانتهبت لهالكيس
اليوم الي وراه صديقتي صايمة الست من شوال
وطلب زوجها تطبخ كبسة لحم
ولما فتحت الفريزر
اكتشفت المفاجأة مافي أكياس لحم
الا فقط كيسين!!!!
والباقي وين راح ؟؟!!!
وقتها صديقتي تذكرت الموضوع
و علمت زوجها و زوجها طبعا عصب
وصار يسمي الحرمة ام ف سراقة اللحم
والمصيبة ان نفسها السارقة الشيف الطباخة ام ف
صارت تكتب كلام نغز و لمز على صديقتي في السناب ؟؟!!!
هههههههههههههههه تصورتوا بالله عليكم
تصوروا سارقة من بيتها و تسبها في السناب اعوذ بالله من هالأشكال
سؤالي هو يابنات
أمانة عليكم انصدمتوا مثلي من القصة ؟؟
هل في بشر كذا بالحياة !
طيب الي تحب الناس واجتماعية
مثلي و مثل صديقتي الي ساكنة في منطقة وماعندها أحد من أهلها ايش تسوي يعني ؟ تصير تخاف من كل الناس ؟؟؟
لهالدرجة يعني خلاص الوضع خربان !
طبعا صديقتي هذي طيبة و كريمة
و اقدر اقول عنها قابلة للخداع والاستغفال بمعنى الكلمة
مهما ننصحها ما تتغير و ماتشك بالناس و على نيتها بشكل فظيع و تعليمها على قدها
و انا احبها لهالصفات لكني انصدم
من المواقف الي تصير معاها
صح احنا تصير معانا مواقف
لكن هي احسها على نيتها بزيادة المسكينة خصوصا انها ما كملت تعليمها صديقتي هذه
بنات صح في موجات غلاء ووباء
و ظروف مادية
لكن صراحة الانسان طبيعته عنده
عزة نفس و كرامة
وصلت ان الضيفة تسرق لحم من ثلاجة وحدة مستضيفتها ؟!!!!
فسروا لي انا بديت ماافهم
احس اني عايشة في كوكب غريب
وبديت اشك صراحة في الناس
وانا اجتماعية واحب الناس ومااحب اوصل لهالشي و ابدأ اشك في الناس ...💔💔💔💔💔