غرفة الغسيل

* يكون فيها توصيل كهرباء للغسالة وللمجفف (المجفف يحتاج لحرارة عالية يعني لازم التوصيل يكون أساسي مو سلك مسحوب من فيش كهرباء تاني)

* خليهم يعملولك الفيش حق المجفف (أبو تلاتة) لأنه كل الأجهزة صارت كده ... وما تحتاجي تستعملي توصيلة اللي ممكن تنحرق مع الحرارة

* في أنواع مجففات زي حقتي ما تحتاج أنبوب لبرة ... بس لازم يكون في الغرفة شباك أو شفاط

* في أنواع غسالات تكون بالمجفف مية في المية .. يعني ما تحتاجي تشتري غسالة ومجفف عشان تختصري المساحة ... لكن لو عندك مكان فأنصحك بالغسالة لحال والمجفف لحال لأنه بيختصر عليكي الوقت في الغسيل ... على ما تغسلي شي تجففي شي تاني

* إذا كنتي لازم تغسلي الملابس بحار وبارد فحطي سخان في غرفة الغسيل ... لكن لو الموية نازلة حارة من أصله زي عندنا في جده فما يحتاج

* سوي فيها حوض لأنه أكيد أحياناً تحتاجيه

* وتصريف لموية الغسالة وبلاعة في الأرض عشان تقدري تغسلي الغرفة من فترة للتانية

* سوي فيها دواليب عشان تحطي أدوات الغسيل وأماكن فاضية للسبتان والمناشر ومكان للمكواة

غسالة الصحون


*الأفضل لغسالة الصحون تكون مو تحت الحوض مباشرة ولكن جنبه ... لأنه دائما تحتاجي تنقلي الصحون من الحوض للغسالة فالأفضل تسيبي مكان قدام الحوض وتكون الغسالة جنبك

*الغسالة تحتاج لتمديد موية وتصريف وما تحتاج سخان

*لازم يكون جنبها فيش الكهرباء وبرضو أبو تلاتة ... يعني خليه يعمللك جنب الحوض فيش وبعدين لمن تفصلي المطبخ تقوليلهم على مكان الفيش يقومو يطلعلولك السلك من جوا الرخام بشكل حلو ... ما أفضل الفيش من ورا لأنه بعض الأحيان تحتاجي تفصلي الغسالة وتستفيدي من الفيش أو البزورة يقعدوا يشغلوا الغسالة وانتي مو دارية

* وأعملي تسليك كهرباء في كل جدر في المطبخ .... حتحتاجيه للثلاجة والبوتوجاز وأجهزة الطبيخ وغسالة الصحون طبعاً

* المطبخ عندي مشترك في سخان الحمام اللي جنبه لكن بصراحة ما أحتاجه على الإطلاق يمكن لأنه في جده أغلب الوقت حر

إن شاء الله أكون أفدتك