السلام عليكم ورحمة الله وبركاته
الانسان الطبيعي...عباره عن مجموعه
من الصفات تشكله...
لكن...
لابد تلقين صفه هي الابرز في شخصيته
وتلقينه مشهور فيها عند كل الناس
يعني اذا ذكرت انسانه عندك...
تلقينك لاشعوري تقولين تجنن هالانسان
مافي اطيب منها....او مرحه بشوشه
او اعوذ بالله منها وتذكرين... لو بينك وبين نفسك
صفتها السيئه....
الصفات السيئه يا اخوات في مجمل الاحوال
تعود علي صاحبها بالشر...
بس ضررها قد يكون اقوي في....
الزواج....مع الزوج
لماذا....
بحكم الارتباط والاشتراك فالحياة
بعض الزوجات يحملون صفات غير جيده
تنفر الزوج...وتتسبب لها بتعب نفسي
في هذا الموضوع...
بعرض بعضها مع وضع بعض الحلول
التي قد تساعدها علي التغير ان شاءالله....
العصبيه....
هالنوعيه من النساء نار نار نار ....
تثور علي اتفه الاسباب تقوم الدنيا عند اول زله ....
دايما معصبة ما تامنين غضبها...
انسانه بغيضه....ضيقت الصدر
لو حاول شخص يتناقش معها او يراجعها بامر بسرعه تشب
ويرتفع صوتها....
او اذا واحد من عيالها غلط صارت نهاية العالم...
معيشه نفسها واهل بيتها بجحيم ....
ممكن تكون احسن وحده نظيفه ومرتبه وراعيه بيت
بس تلقيها تغلي تغلي من داخل واعصابها تعبانه....
وهي تنظف وهي تطبخ وهي تدرس عيالها
فتضيع كل طيبها ومجهودها....من زلات لسانها
هي تكره هالجانب فيها....
وتلوم نفسها...باستمرار
بعض من العصبيات.... تحاول تحط اللوم علي الظروف
او علي الاشخاص اللي تسببوا لها بالازعاج
وثوروا اعصابها....
هالنوعيه لو تزوجت شخص وسيع صدر
وبارد لا بد تجيه العدوي من عصبيتها
ويصير اصددام بينهم فما بالك لو خذت عصبي اصلا
الحل....
ليه ما تحول هالطاقه الكبيره اللي تبذلها بالعصبيه
لشي ايجابي ويبدأ من الداخل....
اذا كانت العصبيه بسبب تفكيرها ....
فالماده...او غيره عليه....او خوف....او تعب
فالبدايه تكون صريحه مع نفسها...
وتوقف دقيقه باي مكان لحالها مطبخ غرفة نوم
وتقول بصوت مسموع لنفسها...
بس يكفي خبال وحرق لنفسي ولغيري...
تقعد تدعي وتدعي وتدعي وهي علي حالها
ان كانت تنظف تستمر بتنظيفها او تطبخ تستمر بطبخها
او تتمكيج تستمر نفس الشي بمكياجها...
بس يكون لسانها يلهج بالدعاء ثم الدعاء ثم الدعاء
لكل اللي خايفة منه او كان سبب... بتعبها النفسي
هالشي يمتص الغضب ويفرغ الشحنه الكبيره
اللي داخلها...لعدة اسباب
او شي تكلمت وفضفضت من غير ما تحس انها
طلعت سرها لاحد ...ومن غير ما تحس انها غثت
احد بكثرة الكلام...
الشي الثاني... احساسها انها تشكي لمن بيده نجاتها
وخلاصها ذلك العظيم الجبار....وانها تاوي لركن شديد
الشي الثالث...تحس براحه لانها عملت عمل خير
اللي هو الدعاء...ومعروف الدعاء مخ العباده
الشي الرابع...احساسها انها ما آذت احد لا زوج
ولا اولاد ولا خادمه ولا ولا ولا
الشي الخامس...تغلبها علي هالصفه السيئه
كفيل باراحتها...
الزعول....
هالنوعيه مايمدي زوجها يفرح برضاها
عليه...الا قلبت خشتها وزمت خشمها
انسانه عذرا....تااااافهه
كل شي يزعلها وتبرر لعمرها انا حساسه
لكن الحقيقه انتي تافهه...
فرق بين الرقيقه الحساسه وبين الزعول
ليه قلتلك تجيبلي هالشي ونسيت....
ليه قمت وانا راقده وطلعت....
ليه سكرت اللابتوب يوم شفني...
ليه سكتت يوم اقبلت عليك...
ليه كنت تضحك وتسولف مع خواتك
ويوم جيت غيرت الموضوع...
وقيسوا علي هالسخافه...
الزوج ان كان طيب بيبرر مره مرتين عشر
بعدين بيقول طقي راسك بالجدار
اما الزوج الحار ضيق الصدر...
بيعطيك رد يخليك تكرهين حياتك وتجين تشتكين
بعالم حواء...
الزوج اللامبالي...بيخليك تكلمين نفسك وتدوين علي
اجابه وهو عايش حياته ومكمل سهرته براحه...
وانتي عايشه بمسلسل الاحزان والاوهام....
الحل....
وقفه جاده مع النفس ونفس الحاله الاولي...
مصارحة النفس بانك انسانه تافهه زعول من غير داعي
كثرة زعلي خلتني انسانه مالها قيمه...
محد يهتم بزعلها او رضاها....
قام وانا راقده...لانه انسان معرض للارق
شاغله موضوع ومطير النوم من عينه
وما بغي يزعجني....
ما جاب اللي طلبته....نسي انشغل ما معه فلوس
وتعيجز يروح يسحب من الزحمه...
سكر الابتوب... صدفه كان بيسكره بجيتي... زهق... يشوف شي
ما يبيني اشوفه...وش يعني بيكون خايف منك مثلا
وقيسوا عليها....
المفروض احط لنفسي قيمه ويكون لزعلي وخاطري
قدر....وهالامر ما يتحقق الا بالابتعاد عن سفاسف الامور
الفضوليه....
انت من تكلم...وشعنده داق هالحزه
ليه مستاذن من دوامك ورايح لاهلك اكيد صاير شي
ليه يوم كنا عندهم تجمعتوا فالمجلس وجات امك عندكم
ما تسوونها الا اذا كان في امر كبير
كم دفعتوا مهر وين بيسافرون...
اختك وشفيها ما نزلت يوم حنا عندهم ....
سمعت ان اخوك شاري ارض....
صحيح ان ابوك دفع الاجار عن اخوك الثاني
رجل اختك بيعرس عليها....
ليه فلانه ما حملت....ليه ليه ليه ليه
انت خاش علي ليه عساني اجنبيه انا مرتك ام عيالك
بينك وبين اهلك اسرار...
وشاللي بينك وبين خويك ماتبيني اعرفه...
انت ليه ما تعلمني....
اف اف اف وشذا اعوذ بالله
لقافه مو طبيعه...تصلح تشتغل فالتحقيق مع المجرمين
الحل....
وقفه جاده مع النفس مثل باقي الحالات...
ومصارحة النفس باني ملقوفه....لازم نسمي الامور
باسمائها عشان نعرف مدي بشاعتها...
لازم تحدثين نفسك...
انا وشعلي امر ما يعنيني...
ان شاءالله يخططون لغزو دوله....
هم اهل من دوني...ومثل ما عندك امور مع اهلك
ما يعرفها وما تحبين انه يطلع عليها...
طبيعي يكون للانسان نفس الشي مع اهله
وان كنتي بربر وتعلمينه بكل شي ما تقدرين تحفظين
العلم ببطنك...
مو مطلوب منه يعاملك بالمثل
العذر الوحيد اللي تقولينه لنفسك انا اعلمه لاني احبه
واعتبره كل شي بالنسبه لي...
طبعا كذب تعلمينه لانك ثرثاره والكلمه تقعد تحوس داخلك
لين تطلعينها...هذي الحقيقه
لان كل عايله فالدنيا سواء عايلة الرجل او المرأه عندهم
شؤونهم الخاصه اللي المفروض ما تطلع بري العايله
ما يطلعها الا واحد غبي.... لابد يجي يوم ويندم
المفروض هالكلام يكون حديث النفس اقف وقفه جاده
مع نفسي وابدأ التدريب الجاد علي قطع ونسف هالصفه
البغيضه عني....وانشغل باموري الخاصه
الملوله....
دايما ذابحها الزهق وتافف ....
ان كلمها من الدوام ها وشخباركم
ترد بتافف وتشكي الملل والزهق...
وان طلعها تافف من الزحمه...
او الحر او المكان ما عجبها ...
وتكسحه بان ليتها قعدت فالبيت بدال هالبهذله
وان سيروا علي احد....ورجعت
ها ان شاءالله انبسطتي....ابد زهق وسوالف تجيب المرض
لو ما طلعت اشرف...
طيب وشرايك في مطعم يمدحونه...
ها بشري عساه عجبك...
اقول مشينا....امحق مطعم اكله الله يعز النعمه
وريح الطبخ واصلنا وملا هدومنا...
لوني قاعدة(ن) ببيتي ازين لي
مالت عاللي مدحه....
الحل....
انا ليه كذا....ليه مافي شي عاجبني
هذي ديرتي وهذا واقعي...
انا وش ابي اصلا...
جبتله الملل من كثر ما انا اردد هالكلمه
العيب فيني ....انا اللي ماني قادره اسعد
نفسي ...انا اللي ماني قادره املأ الفراغ
في حياتي...
الامر يبدأ من داخلي....المفروض
ادرس او اتوظف ادخل تحفيظ او علي الاقل
اثقف نفسي...
اسوي مشروع بسيط وان كان في بيتي
لو اجمع طلاب الابتدائي وادرسهم
او اجيب خياطات او طباخات او عاملات
المهم اسوي شي احبه وانفظ غبار الملل عن حياتي
قبل اسممها بكثر تضضجري منها....لان هالامور عدوي
احساس ينتقل بين الاشخاص خصوصا...
القريبين من بعض...
بملاحظه بسيطه...اذا اقبل عليك شخص مرح لطيف
حلو اللسان ....تبتسمين لا شعوي
واذا اقبل عليك شخص كئيب كثير الشكوي
تحسين بانقباض فالنفس والمكان يكون بنظرك ضيق خانق
نفس شعور زوج الملوله...
اذا رجع البيت يحس انها راجع لمكان ممل مكان يضيق الصدر
يتبع...
خالة سيف @khal_syf
عضوة مميزة
يلزم عليك تسجيل الدخول أولًا لكتابة تعليق.
انا عصبية بس مو زي ماوصفتي اخف عصبيتي من النوع اللي اكل في نفسي وعجول بس ولله الحمد ما ابينها كثير قدر المستطاع الحمد لله عمره ما ارتفع صوتي بيني وبين زوجي قد ما اكون معصبه منه او اخذت على خاطري من حاجة
وعجوله بطبعي احب كل شي متى ماجاتني الفكرة بس انا ولله الحمد ومن فضله انسانه فاهمة وواعية اعرف ان كل شي له وقته ومو كل حاجة بتصير زي ما ابغى
وعجوله بطبعي احب كل شي متى ماجاتني الفكرة بس انا ولله الحمد ومن فضله انسانه فاهمة وواعية اعرف ان كل شي له وقته ومو كل حاجة بتصير زي ما ابغى
الصفحة الأخيرة
تعمدت اكتبهم وري بعض الملوله واللي ما عندها
حماس عشان تعرفون الفرق بينهم...
لان الفرق شعره...
هالانسانه تحسينها من غير مشاعر...
ممكن يجيها متحمس ...الله اليوم الجو يجنن
جو بر وشرايك...يالله زهبي اغراضك وخلينا نطلع
تزهب كل اغراض البر ويطلعون...
وشرايك نجيب لحم ونشوي
والا نجيب بخاري...والا نضبط كبسه عالحطب
كيفك...
وكل ما سالها وشرايك ننزل هنيا...كله واحد
وشرايك بالجو ....حلو
اذا نزلوا ....ها وشرايك بالمكان...زين
الحل...
لازم وفقه جاده...والاعتراف انها انسانه
ممله حتي النخاع... جامده تفتقد الروح الجميله
وخفة النفس...
الشخص يحب اللي يشاركه هواياته...
وان كنت ما احب البر..وشفيها لو ابديت الحماس
وقمت ازهب الاغراض وانا مبديه اللهفه علي الطلعه
اختار المكان معاه...واقترح غدانا او علي الاقل نتشارك
باختيار الغدا...سواء الزوجين لحالهم او اشراك عيالهم بهالامر
عشان يحس بحماس الجميع...
وان معه ارواح تشاركه فرحته...ابدي السعاده
والرضي علي المكان او اطلب منه يغيره ان كان مايعجبني
اتغزل بجمال الجو...
هالامر ينطبق علي اي مكان تطلعون فيه مع بعض
مطعم حديقة ممشي.... ان شاءالله تفرون فالسياره...
لازم تكون لي بصمه واكون ايجابيه...
احط لمساتي علي الطلعه...بعض البشر سلبي
قانون عنده...طلعه يعني يجيب من المطعم
فالنفرض بنروح ممشي...علي حسب الجو
اذا كان برد...قبل اطلع بسوي الزنجبيل مع الحليب
او اي مشروب حار يكون باستقبالنا اذا رجعنا
فالسياره بيكون الشاهي او الكبتشينو معي...طبعا من صنع يدي
واذا كان الجو حار...ازهب العصير واحطه فالثلاجه
واخذ ماء معاي...
امزح واقول بشوف من انشط فينا يقدر يمشي مسافه اكبر
اذا كان عنده قدرة اكبر علي المشي اكثر منك
اقول والله لاسويلك عشاء دسم يرجع الكيلوات اللي نقصتها
اذا سافرتوا...
ممكن تسوين عدة امور تحسسه بحماسك...
لو بتروحون لاهلك او اهله...بمنطقه ثانيه
ممكن تزهبين فطاير وسينابون ...او تقصصين فاكهه
وبعد مسافه تقولين يالله بفتح البوفيه...
سواء كان له لحاله او له ولعيالك...
تعرضين عليه اللي جايبته وتضحكين...بسمنك يعني بسمنك
امور تخليه يحس بانبساطك معه باي مشوار كان
هالشي يخليه يحب رفقتك لانك تعطين حياة وروح للطلعه....
انتبهي قبل تنهملين وتكونين مع قطع الاثاث فالبيت
ويفضل علي الطلعه الجامده معك...اي صحبة كانت
المهم ما تكونين انتي...
المشغولة....
كل ما جا يدورها ياما مداومه او طالعه...
او تتزهب للطلعه...
او تحضر دروس بكره...
او تدرس...او عندها شغل...
تكلم اهلها او صديقاتها...
قاعده علي النت او الايفون...
ماعندها وقت له ...ياكل لحاله
يقعد لحاله...وجودها نفس عدمه عنده
(هذي حالة حقيقيه....عندي صديقه متزوجه متزوج
وسالته ليه تزوجت من ضمن الاسباب ارجو الانتباه انه
من ضمن الاسباب مو السبب الوحيد
انها كانت دايما مشغوله عنه اما بدوامها او صديقاتها
او النت)...
الحل...
انها تتنتبة قبل فوات الاوان...
الوحده تعرف رجلها ياتري يحتاجني...
بعض الازواج يبي يحس بوجودها عنده لو ما كان بينهم حوار
يحب الجو الاسري يحبها تروح وتجي عليه...
تدرس العيال عنده...او تلعب طفلها الصغير معه حتي لو ما لمس
هالصغير....
حتي لو ما تفاعل.....فالنفرض ان هالزوج بيتوتي
وما يطلع...يعني ما عندها فرصه تخلص شغلها
بغيابه...
تجيب اغراضها وتقعد عنده...
وهي تشتغل تعلمه بموقف مر عليها فالدوام
تعلق علي مشهد فالتلفزيون...وهكذا
لازم تصحي من غفلتها وتفكر ان كثر البعد يولد
الجفا والفراغ...ويعطي مجال لايجاد الاعذار
لفعل امور قد ما ترضيها...
(خصوصا مع هالنوعيه من الرجال)
يعني لا ضرر ولا ضرار
تدور اي احد تحط الحره فيه....
هالانسانه موجوده بكثره بمجتمعنا...
تكون ضعيفة الشخصيه....
ما عندها ثقة بنفسها...
او مسالمه ما تحب تجادل وترادد...
او طيبه تسكت....
وحنا ماشاءالله مجتمعنا محد يوصيه بحدة اللسان
اللي يقطر سم....
وبالتصرفات اللي تذبح وتخلي الحكيم يفقد صبره ...
عيب هالانسانه انها تدور احد تحط الحره فيه....
فيا إما يكون الزوج او الاولاد او الخادمه...
تختلق الاعذار تلو الاعذار عشان تبرد حرتها
وتنفس عن غضبها...
دايما تعبانه نفسيا لانها مقهوره ما خذت حقها
ومقهوره لانها حطت الحره فاحد ماله ذنب
سواء عيالها او غيره...فتزيد حالتها سوء
واذا بغت تكحلها عمتها...
بمعني اذا جاء زوجها يعاتبها او يهاوشها علي اللي تسويه
تثور زياده لانها اصلا تعبانه من تانيب الضمير
وتعبانه من ضغط الكلام او التصرفات اللي تلقتها
وتكون النتائج..كارثيه خصوصا اذا كانت هالحاله
تتكرر معها مره بعد مره
الحل...
الصراحه مع النفس طبعا...
واحط يدي علي مكمن العله فيني...
قبل يهدم بيتي ويتعقدون اطفالي...
وتذهب خادمتي من غير رجعه...
ان كان سكوتي طيبه واني انسانه مسالمه....
فيجب ان اتحمل وحدي ووحدي فقط نتايج طيبتي
وان كان ضعف فيجب ان اعالج نفسي بنفسي
واشكو بثي وحزني الي الله...
دائما مناجاة الله والشكوي اليه تخفف الضغوط
مافي داعي للتكلف فالدعاء والسجع...
يا اختي كلمي الخالق علي طبيعتك باي مكان
بوضوء او من غير...
بصلاة او من غير ...هو معك اين ما كنتي
اشكي واشكي واشكي..ارتاحي ازيلي ثقل هموم
اتعبت كاهلك...
قبل ان يتعب حالك... هروب زوجك من جام غضبك
الي نعيم زوجه اخري...
وهروب اولادك وابتعادهم عنك....
مما يكون الموت البطئ لك...
الشكاكه....
من كنت تكلم....كنت تكلم وحده صح
ليه ماسح السجل...اكيد كنت تطالع مقاطع وصخه
ليه سكتت امك يوم دخلت....كانت تحشي راسك علي
يوم توديني لاهلي قلت انك بتكشت مع اخوياك وشرجعك البيت
جايب احد شقتي....
ووووووووووووو
انسانه مريضه وتمرض اللي عايش معها
تحاصره وتهاوشه تخنقه بكثر الحصار والتفتيش
والتاويل والتحليل....
الحل....
وشبسوي يعني ....كل المواجهات والمصادمات مع الزوج
من هالناحيه فاااااااااااااااااشله....
الا اذا استثنينا القله القليله....
نشوف الجانب الايجابي...
علي الاقل محترمني حاطلي هيبه...
افضل من ان يواجهي... ومعروف من الخسران في هالحاله
وان كابرنا...
اعالج اي حالة بهدوء وبصبر وباتكال كامل علي الله
سواء المقاطع او غيرها
وان فشلت وضاعت حيلتي...
فما لي حل الا الصبر والدعاء...
(فما رد القضاء مثل الدعاء)...
وان وقع امر الله...وهو نافذ لا محاله
اكون ...ان اخترت الخروج من حياته
او البقاء فيها...اكون ...
بكرامتي....
الا مع زوج تكون الزوجه عارفه ان حصارها له
وشكوها فيه ومحاسبته...تجيب نتيجه
سواء كانت خوف من الفضيحه او خوف من تركها له
او انه يفسر شكوكها.... انها حب وغيره
في هالحاله....عندها اياه تنشب بحلقه
العجوله....
صنف من النساء تبي كل شي بسرعه....
اذا بغته يوديها السوق...
لازم يوديها....اليوم يعني اليوم
تبي تغير اثاث...او تروح تتمشي
وصته علي اغراض للبيت...
وعدها يسويلها شي...
ماعندها صبر نهائي...
مستعده تقبها هوشه وزعل وتكبير وتهويل
واتهامات بعدم الاهتمام وانها اخر اهتماماته
وانها ما تطري عليه....ومظلومه وصابره
ليه وشصار لذا كله....
الحل...
تعود نفسها علي الصبر....
بدال اليوم بكره بعده الاسبوع الجاي
خصوصا للامور اللي مو مهمه....
ولاهي مستعجله....
وضع الاعذار ...احيان الواحد يرجع
ماله خلق يطلع مره ثانيه....
ممكن يطلع يغير جو... لكن
لانجاز عمل...ما يكون يحس برغبه لهشي
خصوصا اذا شاف ان هالامر مو ضروري
فماله داعي المشاكل والمشاحناة....
لامور ممكن تاجيلها...
تعويد وترويض النفس علي الصبر
من اهم الامور لمواجهه امو الحياة كافه
طبعا اذا شافها تطلب وتصبر يوم يومين ثلاثه
علي الامور العاديه...
اذا زعلت وهاوشت علي شي في مره من المرات
اكيد بيقول ان هالشي ضروي....
اخواتي الكريمات قيسوا علي ما ذكرت
نماذج من النساء...
الرومنسيه بزياده
المهمله
الكسلانه
الوصخه
راعية المقارنات
الحنانه
البارده
كتبت الموضوع من وجهة نظر شخصيه
ارجو المعذره ان كان هناك غلط او تقصير
وسامحوني عالاطاله...
تم بحمدالله....