بأخذ متزوج عشان مايتزوج علي

الرجال لما يتزوج على زوجته الاولى يكون الموضوع صعب عليه وعليها ويحتاج تفكير وتخطيط ومراعاه لمشاعر الأولى والتمهيد لها قبل مايقولها الخبر
بس الزواج على الثانيه أو طلاقها مافيه أسهل منه عند الرجال <<<والكلام هاذا ما أقوله من راسي أقوله من التجارب الكثير إللي نسمع عنها
لأنه مسويها من قبل يعني عادي عنده يسويها مره ثانيه وخاصة وإنه يحس إن الثانيه مو من حقها تتكلم عن التعدد لأنها في الأساس راضيه فيه وهو معدد
علشان كذ تشوفين الزوجه الثانيه دايم مدلعه زوجها وطايحه عند رجلينه أربع وعشرين ساعه لأنه لو مارضي عنها كل الرضا بيعتبرها نزوه ويرميها ورا ظهره <<لأن إللي ماكان له ولاء للأولى مابيكون له ولاء للثانيه
ومن ناحية تناقض المواضيع حدثي ولا حرج
تجيكي الوحده تكتب موضوعها وهي سايحه من كثر النعومه والرومانسيه وتحكي عن زوجها إللي مايصبر عنها ويموت في التراب إللي تمشي عليه ومايرفضلها طلب ويحبها ومغرقها حب ودلع،،،وبعدها بيومين تجي تحكي عن زوجها وإنه يمحطها بالعقال صبح ومسا وإسلوب النقاش بينهم لايخلو من بعض المحطات السريعه بالعقال !!!!!وعجبي

ومن ناحية الردود وإعتمادها على الرد الأول
هاذا لأن البنات يخافون من إن العضوات يهجمون عليهم بسبب ردهم وينتقدون أسلوبهم
بس إذا كان الرد الأول سب في الموضوع ومر مرور الكرام من غير هجوم من العضوات ولا من صاحبة الموضوع معناها إللي بتسب بعدين اللوم ماراح يكون عليها لوحدها لأنها ما بدأت بالسب وصاحبة الموضوع روحها رياضيه وتبلع السب والشتم بكل أريحيه فيعطونا على نافوخها لين ماتقول بس
علشان كذا حذاري ثم حذاري من إن الوحده تحط موضوع هنا من غير ماتنتبه للردود وتحرس موضوعها خوفاً من الهجمات المباغته
عاااااااااااااد كأني إسترسلت في الهرج وطولتها وهي قصيره
بس عدووووووووووووها

أنا أشوف ان بعض الرجال جريئه وتتزوج والبعض الاخر مايتجرأ يتزوج أو يكون عنده قناعه ان الزواج الثاني نكد او او اوو فأغلب الي تلاقينهم متزوجين ثانيه ماعندهم هالأفكار وماعنده مشكله ياخذ اكثر استغفرالله

وبالنسبه للاشياء الي تطلع ويهبون فيها ابن ادم فيه هالفطره الي هي المحاكاة والتقليد واشوف انها شي عادي مثلا لو كانت الفكره حلوه ومقبوله

وبالنسبه للردود الجارحه فعلا كثيره وانا عندي قناعه ان صاحبة الرد الجارح او الغير لطيف مسكينه او تحس بنقص او غيوره او او او

او انها غير متعلمه لازم يكون فيها عله وبدل مارد عليها اقول الله يعينها على نفسها
وسلامتك

الأخت أم ليان في كلامك نظر
ونظر ونظر
الزوج إذا بغى يطلق ماحسب حساب هي أولى وإلا ثانية
لاتعممين الأحكام ..........

انا احس الرجال هاليومين 99% منهم يفكرو يتزوجو الثانيه ...ولو يقدرو الثالثه والرابعه

بس هل معنى هذا اني بنت لم يسبق لي الزواج واخذ متزوووج؟!! لا والله

يمكن لااخذني الثانيه ياخذ فوقي 3 و4 كمان

اممم بكون صادقه
اول مره اسمع هالعذر للزواج من متزوج
يعني اسمع انهم يفضلون المتزوج لانه خلاص بناء حياته ولاعاد فيه ديون ولا صبر زي اللي توه بادي حياته وطبعا اغلب البنات اللحين يبغون الفلوس والماركات وهذا ماراح يتوفر باللي توه متوظف واهم شي عندهن القروش
والعذر الثاني ان الجيل الجديد مافيه فيهم السنع وجيل الرجال الاول هم السنعين !!
نجي لسالفة ان الزوجه الثانيه ما يتزوج عليها بصراحه اشوووفهم اللحين المعددين طابين بالزوج الثالث مرره صاير عندهم مووضه وبعض الاحيان موب بعد الزواج الثاني على طول اشوف كثير يجلسون من 8 الى 10 سنوات مع الثانيه ثم يطقون عليها الثالثه