بابا بيقول ابنك مش طبيعي صحيح يا دكتورة؟

ابني يا دكتورة عمره سنة و شهرين و انا عايشة في بيت اهلي مع ماما و بابا و اخواتي المشكلة انه لحد دلوقت ما بيتكلمش يعني يا دوب بيقول ماما و بابا على خفيف مع اننا بنكلمه كتير لكن مفيش فايدة و كل ما يكون عايز حاجة يفضل يقول اه اه اه بس لكن ما بيقولش مثلا مم لما يكون جعان ولا امبو لما يكون عطشان و مشكلته التانية انه بيخاف من الناس بصورة مش طبيعية يعني لما بيجي حد يزورنا في البيت يفضل يبص له و يعيط و يصرخ مع انه لما بنخرج و نشوف الناس في الشارع ما بيعيطش و ممكن كمان يلعب معاهم ، المهم بابا بيقول ابنك مش طبيعي وديه للدكتور وانا من ساعتها نفسيتي تعبانة جدا مع انه و الله بيفهم كل حاجة يعني اقول له هات كذا يجيب و لما يكون عايز يطلع البلكونة يروح يجيب لي الخمار عشان البسه و يشاور على البلكونة يا ريت يا دكتورة تطمنيني و لومحتاج دكتور اوديه لدكتور اطفال ولا ايه و المفروض اللي في سنه يتكلموا كام كلمة