وبه نستعين
الحمد لله والصلاه والسلام على نبينا وحبيبنا محمد صلى الله عليه وسلم
صباحكم عسل وسكر ونور يملى يومكم يا احلى بنات...
حبيت اشكاركم بموضوع لي شويتين افكر فيه
وبدخل بسالفتي على طوول ..
بنات طبعا الحين زي ماانتم شايفين حنا في اخر شوال وباقي شهرين بالظبط على السنه الجديده..
طيب انا فكرت اني من اول ودي انجز اشياء في هذي السنه ..وشي تم بفضل الله تعالى علي وشي لسه..
عاد فكرت قلت ليه ما استغل هالشهرين واحطهم كوقت محدد وهي مده جيده وما هي بسهله ..ممكن الواحد باذن الله ينجز فيها ...قلت ليه ماتحطين لك كم هدف محددين واضحين وبخطة عمل ..انجزهم في هالشهرين..
واصير باذن الله ان احياني ربي سويت لي اشياء في هذه السنه((((1431))))...
وفعلا قررت وقلت خليني استعد من الان عشان ابدا والتزم في الفتره القادمه باذن الله وبعد الاستعانه بالله...
طيب بتقولون وش دخلنا ..انا اقولكم ...يوم اني افكر قلت ليش ما اتشارك مع بنات حلوات حبوبات في المنتدى...
اكيد بلقى ناس باذن الله لهم نفس تفكيري ...
عشان اولا نتحمس والي ما حط في باله هالفكره يحطها ...ويكون في غير الحماس نقطة نهايه نشوف فيها الانجاز ...
ومن قدرت بفضل الله تحقق لو هدف من مجموعة اهداف...
وتعم الفايده على الجميع....
وممكن بعد وضع كل بنت لاهدافها يعطي فكره للي ماعندها شي محدد او مو واصله للشي الي تبيه ..يعني ممكن يفتح عينك على فكره رايحه عن بالك ...
يعني في كذا فايده للموضوع ...ومو شرط ان يكون في تحديث طوال الشهرين للعمل لا ..لاني بصراحه وانا اولكم ما اقدر اكون مستمره متابعه الموضوع على النت...
لكن الي باذن الله بحرص عليه هو في اخر اسبوع من شهر ذي الحجه ان احيانا الله.. ارجع انزل الموضوع وناخذ النتايج ونشوف الانتاج وكم نسبه الي وصلوا بفضل الله لاهدافهم...
ــــــــــــــــــــــــــــ
عاد الحين بقولكم وش اهدافي وفي ملاحظه مهمه جدا مو لازم تكون اهدافنا طقم مع العالم لا...
ممكن انتي لك هدف انا اشوفه تافه ..بس ماعليك مني انتي بالنسبه لك ذا هدف ولازم نحترمه ونحترم وصولك له ونعتبره انجاز من فضل الله عليك .... مهما كان تااااااااااافه ...شي ممكن عندي تافه عندك قمه في الاهميه .....
وهذا عادي طبعا لاختلاف وجهات النظر في البشر....
اهدافي باذن الله في شهرين:
الله يوفقني ويرزقني تحقيقها
1-اسدد جزء من دين علي .
2-استخدم كريمات شاريتها لتفتيح المناطق الغامقه (خاصه الركب)
3-استخدم زيت مسويته ولا استخدمته للشعر
4-اقرى 5 كتب شاريتها من مده
5-ارسم 15 تصميم
6-ادخل دوره وحده
7-انقص 5 كيلو
8-اخطط لاهداف السنه القادمه كتابيا باذن الله (وراح استعين بعد الاستعانه بالله عند التخطيط بالدوره الي موجوده في المنتدى من مده )
ــــــــــــــــــــــــــــــــــ
طبعا ممكن الان بنات يشوفون اهدافي ماش موب ذاك الزود لكن ارجع واقول اهداف كل شخص متناسبه مع كل جوانب حياته يعني مو لازم نكون كلنا نسخه وحده هذا مستحيل ....
طيب وممكن الان اذا شفت اهداف من البنات ممكن اتنبه لشي وارجع اضيفه للقائمه اذا هو موافق لي ...
عاد الحين الي بتنضم للمجموعه تسجل هنا بلسته من الاهداف ولو كان هدف واحد الله يبارك فيه ان شاء الله ..
وصدقوني شعور جميل اذا الانسان حقق لو 1٪ من الي يتمناه لنفسه ...وشعور اجمل تشارك الناس هذا الفضل من الله عليك بهالانجاز ....وتلقى التشجيع والتهنئه في نهاية المهمه من اشخاص لا تعرفهم ولايعرفونك....
ان شاء الله ان كلامي كان خفيف عليكم وباذنه تعالى نحاول ونحاول اننا نتقدم ولو خطوات ولا نيأس من رحمة الله...
محبتكم واختكم ....
تبارك الله همة عالية واهداف تتحقق باذن الله
كل سنة نفس الموال احط ببالي اهداف كثير ويادوب يتحقق واحد ولا اثنين
اهم شي عندي السنة اني اديري بالي على صحتي
شعري يتساقط بشدة ووزني نحيف وجسمي مافيه قوة
ولازم اسدد القرض الي علي
ولازم احسن معيشتي وانظم منزلي اكثر
لازم اعلم بنتي على الحمام اكرمكم الله واشيل الحفوظة قبل الشتاء
اللهم اعنا على طاعتك امين