الحمد لله رب العالمين ولدت يوم الاربعاء اول يوم في رمضان
ولادتي كانت يارب لك الحمد سهله وتيسرت وانا كنت ماخذه 15 يوم
في العاشر والنفسيه زفت والمستشفى طفشني لازم تنويم وطلق صناعي
بس ما سمعت لهم وطنشت
لحد يوم الثلاثاء من الظهر ينزل علي دم وبرضوا ما رحت على المستشفى
لحد ما بدا يجيني الطلق الساعه 3 الفجر بعد ما تسحرت وكنت عازمه على الصيام
المهم الطلق في البدايه كل ساعه الا ربع وصار كل نص ساعه وبعدين كل ربع ساعه
ولما صار كل خمس دقايق صحيت زوجي على الساعه 11 الظهر وطيران على المستشفى
على ما جهزوني ودخلوني غرفه الولاده كانت الساعه 11 ونص قاست الممرضه قالت مفتوح 5
سانتي ركبت لي المغذيه والتخطيط وعطتني الكمام حق المسكن وراحت
وجت على الساعه 12 تقريبا قالت بفك كيس المويه ولما رفعت رجلي وجهزت العده
تصيح حرمه في الغرفه اللي جنبي خلاص بتولد وراحوا كلهم يراكضون وخلوني
وانا طول الوقت اذكر الله واستغفر واسبح وادعي وهذا اللي سهل علي وساعدني
اللهم لك الحمد لما صارت الساعه 12 وربع تقريبا جتني الدكتوره وقاست قالت 7 سانتي
وفكت المويه وحطوني على جنبي على الساعه 1 الا ربع بديت احس ابغى ادفع واصيح
في السستر خلاص بولد وعلى طول جت قالت خلاص عشره اذا حسيتي بالالم ادفعي
ودفعت اربع مرات والحمدلله طلعت بنتي الساعه واحده الظهر اخذوا بنتي وانا جلست
قعدت السستر تخيط وتنظف وعلى الساعه 2 ودوني غرفة التنويم وبس
هذي قصة ولادتي وعقبال كل الحوامل يارب
يلزم عليك تسجيل الدخول أولًا لكتابة تعليق.
الصفحة الأخيرة
الحمدلله على سلامتك ومبروك البنوته
تتربى بعزكم يارب