باركولي أخيرا ولدت

السلام عليكم كيفكم ياحبوبات وحشتوني ... حبيت أبشركم إني ولدت لي عشرة أيام والحمدلله وجبت مهند الله يحفظه ويحميه .... بصراحة ولادتي كانت أسرع ولادة الله يسهل لكل وحدة حامل ولادتها زي ماتسهلتلي ..
شوفوا ياحبيباتي كان عندي مراجعة عند دكتورتي رحتلها الساعة إحدى عشر ودخلت عندها وحدة في الليل طبعا وكان هذا يوم الإثنين ولمن كشفت بالسونار قالت كل شي تمام أتوقع ولادتك باليومين هذي ومارضيت تكشف علي من تحت عشان قالتلي خلي الولادة تجي من حالها لأن كان عندي فقر دم شديد وصل لسته الهيموجلوبين فقالتلي مابا ألعب فيكي وأكشف من تحت المهم الله يسلمكم قالتلي روحي البيت وأشربي زيت خروع وأمشي عشان تجيكي الولادة باليومين هذي خرجت من عندها على وحدة ونص ورحنا نشتري عشاء وعلى البيت المهم اتعشيت أنا وأبو الشباب وطبعا عيالي نايمين كان هذا حملي الرابع ودخل زوجي ينام على الساعة ثلاثة وأنا جلست أتفرج على التلفزيون وأحس بألام تجي وتروح كانت خفيفة المهم قلت خليني أدخل أخذلي دش على الخفيف وأنا أعزكم الله في الحمام وعلى البانيو أحس نفسي ماأقدر أوقف مرة الالم زاد بسرعة لبست ملابسي وخرجت عند زوجي أصحي قام مسكين مفجوع قلتله شكلها ولادة قلي بسرعة على المستشفى وقمت ألبس العباية والمويات تنزل بكثرة والالم زايد مرة حاسه نفسي انه بينزل وطول ماأنا بالسيارة وأنا أدعي وأصرخ من الألم وزوجي مسكين خايف ويصبرني والحمدلله انه الشوارع فاضية لأن وقتها كانت الساعة أربعة إلا ربع وعلى بال ماوصلت المستشفى نزل زوجي بسرعة يجبلي الكرسي مسكين كان حايس ماهو عارف وين يروح المهم جات الممرضة وطلعتني على طول غرفة الولادة والله ياأخوات طلعت السرير بملابسي شلت بس العباية طلعت السرير وأدف وأصرخ شوية تجيني دكتورة تكشف تلاقي الرحم مفتوح عشرة خلاص كل اللي في الغرفة حايس لأنهم دخلوني غرفة ولادة رقم 3 ماكانت مجهزة الممرضات يجروا وشوية جا دكتور البنج على طول حطلي إبرة ماقمت غير على صوت زوجي يقلي الحمدلله على السلامة ولدتي مسكين دخل عندي الغرفة لمن شافهم حايسين ويجروا خاف علي ودخل على نزلت النونو والحمدلله وبكذا خلصت مأساتي يعني ماتعبتهم ولا تعبوني ولدت بمجهودي والحمدلله ربي سهلها علي ... بس اللي يقهر ماكان في وقت ينادوا دكتورتي لأن دوامها انتهى بس الحمدلله الدكتورة اللي ولدتني طيبة ...
ودحين أبى مساعدتكم قولولي شي يشيل الكرش اللي بعد الولادة غير الشماغ ويشيل السواد اللي في البطن واش ينظف البطن يخلي الدم أعزكم الله ينزل لأنه لي كم يوم مافي دم ينزل مع اني ماأشرب بارد مرة كله حار وأشرب قشر القهوة اللي معاه زبيب وشمر ويانسون يعني الحاجات هذي لو عندكم أي خلطات بتفيدني بنفستي قولولي عليها لاتبخلوا علي الله يسعدكم يارب ويسهل لكل حامل يارب .