#ران موري# @ran_mory_2
محررة ماسية
باركولي فزت بمسابقه مضمونه مو سباق المشاهدين و لاحروف والوف عقبالكم (مشاركه بالحمله)
السلام عليكم ورحمة الله وبركاته
اللي يحب النبي محمد صلى الله عليه وسلم يصلي عليه
ابشركم بنات...لقيت برنامج حلو وسهل...حتى الجوائز مضمونه
بصراحه...مابغيت اعلمكم...بغيت اكون لحالي الفائزة....بس قلت حرام بنات حواء حبيباتي
وياما استفدت منهم...خليني اقول لهم احسن...يستاهلون والله بنات المنتدى
اكيد وحده منهم تتمنى يكون عندها بيت ملك والثانيه تتمنى اطفال تسمع منهم كلمة ماما
بس ماعندها سيوله ماديه علشان تتعالج - ووحده تبغى فلوس لانها مديونه ويمكن ويمكن ويمكن
كنت العام اشارك بسباق المشاهدين واحل السؤال وارسل اجابتي..واقعد على جمر
واحلم بالسياره...اتخيل المذيع يقول اسمي وانا فايزه باليوكن
مره اقول لا لا لا ... ما ابغى يوكن
امممم يوكن....لا لا لا سياره تاهو احلى ....
...امممممم لا الكابريس احلى ايه ايه احلى وكشخه
لا لا لا وين كابريس..سيارة اخوي كابريس...ابغى احلى علشان اقهره امممممم
لقيتها.....سياره همر...ايه همر...والله لو يدري اخوي انه يكره سيارته هههههههههه
اووووف وين راح بالي....كلها على سيارات .... وحتى اذا فزت بالسياره ماراح اسوق
يمكن حظي يجي على الحلقه الاخيره...ويختار الممثل الكوره اللي داخلها اسمي
وتكون جائزتها نص مليون
يمكن....!!
سبحان الله كل شي جايز...ايش راح اسوي فيها لو فزت؟
اشتري شقه فيها واجرها واخذ اجارها !
طيب اأثث الشقه ولا اخليها فاضيه...
لا وين أأثثها يمكن المستأجر يجيب اثاثه معاه
بخليها فاضيه احسن علشان اوفر باقي الفلوس...
بس لو شريت شقه اخاف المستأجر مايدفع الاجار كل شهر واتورط
لا لا لا خليني اشتري قطعة ارض احسن ....! على الاقل سعرها يزيد بعدين
بس اي قطعة ارض اشتري...على شارع عام...ولا تكون الارض على اربع شوارع رئيسيه!
لا وين قطعة ارض ... اخاف ينصبون علي؟
اروح افتر بالسوق واشتري كل شي !
صدق اني خبله....وش ابغى فيها اخاف بعدين اندم ...ولا راح اقدر ارجع الاغراض
علشا ارجع فلوسي
اغير اثاث البيت .......
احطها بالبنك واخليها على قولة المثل خبي قرشك الابيض ليومك الاسود
امممممم فكري ياران فكري....هذي نص مليون...مو لعبه
وطووووووووووووول ما انا افكر ... قطع سلسلة افكاري مقدمة سباق المشاهدين
يووووووووووووووووه البرنامج بدأ...
انتهت المقدمه....
رحب المذيع بالضيوف...
عرض اللوحه الاولى....
بدأ استقبال المتصلين والمتصلات...وانا عصابي مشدوده
الله يصلحه المذيع...ماراح يعلن الفائزين العشره بحل السؤال الا اذا انتهت اللوحه
استقبل المذيع الاتصال...اعطاه السؤال والمتصل طلب خيارات
قالوا الضيفين الخيارات...والمتصل لازال محتار...
ياربييييييييييي ياغبي اختار الاجابه الاولى هي الصح وفكنا
اعوذ بالله من هالتصلين...ماعندهم ثقافه ابد...اذا مو مثقفين لا تتصلون
اوفففف...احسن تستاهل ان اجابتك خطأ محد قالك تتصل
ياربي متى تنتهي اللوحه الاولى
بااااااااااااااااااااااااااااااااااااااااس خلاص اسكتوا....انتهت اللوحه الاولى
الحين المذيع بيذكر اسماء اللي فازوا...ما ابغى اسمع نفس...خلوني اسمع واكحل عيوني باسمي
يارب افوز يارب
بدا المذيع يذكر الاسماء وانا قلبي...دق دق دق دق دق دق بوم بوم بوم بوم بوم
واحس عظامي تنتفض ....
لاااااااااااااااااااااااااااااااااا اسمي ما طلع .... :icon33:
يا خساره الفلوس اللي دفعتها على قيمة الرساله
هذا كان حالي يومياً في رمضان اللي فات ... انتهى سباق المشاهدين وما فزت ابدا
حتى اسمي ماطلع
ياخسارة الفلوس اللي راحت على حل السؤال ... مدري كم رسالة رسلت..الله يستر ما ابغى احسب
اخاف انصدم..
خلص سباق المشاهيدن في 19 رمضان علشان التهجد...يعني راح اقدر اتابع حروف والوف
اممممممممممممم اشارك ....؟
بس اسألتهم صعبه وغريبه وماني عارفه كيف اشترك ؟
طيب فرضاً اني اتصلت .. ولو اني ما احب الاتصال...بس بتخيل
لو اتصلت .... وجمعت مبلغ .... لو حليت السؤال اللي بعده غلط وش بيصير
تروح فلوسي كلها اللي جمعتها للي حط السؤال ... لاااااااااااا مستحيل اشارك..
طيب طيب طيب
مسلسلات حليمه.....
لااااااااااا وييييييييييييين اسئلتها كلها عن المسلسلات وانا مو شاطره فيها
.................................
صدق اني خبله
صدق اني غبيه
صدق اني جاهله
الحين اروح عند المسابقات واشارك واخسر فلوسي وانا مو ضامنه ان اسمي يطلع
ونسيت هالبرنامج الحلو
هالبرنامج السهل
هالبرنامج المضمون
حتى فلوس ما ادفع ولا اخسر قرش واحد
ويني عنك ياهالبرنامج الحلو
ويني عنك يا هالبرنامج السهل
ويني عنك يالثلث الاخير من الليل
يالله
ربي كان ينزل الى السماء الدنيا وينادي عباده...
هل من سائل فاعطيه
هل من داعي فأستجيب له
هل من مستغفر فاغفر له
وانا جالسه وانا جالسه عند التلفزيون...
وانتظر افوز
اثاريك ياربي كنت تطلب منا اننا نسألك اللي نبغى علشان تعطينا اياه وببلاش
اثاريك ياربي كنت تطلب منا اننا ندعي باللي نفسنا فيه علشان تستجيبه لنا وببلاش
اثاريك ياربي كنت تطلب منا اننا نستغفرك علشان تغفر لنا وببلاش
واثاريني ياربي خليتك وما فكرت الجأ اليك وانت المضمون
ورحت للبرامج اللي مو مضمونه
اثاريك ياربي كنت تنزل للسماء الدنيا جل شأنك وتعالى جدك علشانا احنا
علشان تفرحنا بستجابتك دعاواتنا...وتعطينا سؤالنا...علشان تشوف الابتسامه على محيانا
واحنا تركناك ولجانا لغيرك
يارب سامحنا....يارب اغفر لنا...يارب عفوك ... يارب مغفرتك
ربنا ماعبدناك حق عبادتك
اعترف واقولها يارب
ماعبدناك حق عبادتك
اخواتي..ربنا يحبنا احنا...نزل علشانا احنا ..ليش نخليه وهو المضمون ونروح لغيره
لا وندفع لهم فلوس علشان نفوز ...وبالنهايه مانفوز
انتي يا اختي ياللي تبغين الحمل...لاتنسين الثلث الاخير من الليل
انتي يا اختي ياللي تبغين بيت ملك...لاتنسين الثلث الاخير من الليل
انتي يا اختي ياللي تبغين تتزوجين..لاتنسين الثلث الاخير من الليل
انتي يا اختي المديونه...لاتنسين الثلث الاخير من الليل
انتي يا اختي اللي تبغين وظيفه...لاتنسين الثلث الاخير من الليل
سهام الليل لا تخطئ ابداً
خواتي....
تأكدوا انكم اذا دعيتم الله في الثلث الاخير من الليل بقلب خاشع وبتأدب
راح يستجيب لكم...ماراح تخسورن شي...راح تكسبون ثنتين
استجابة الدعاء - قلب مرتاح
في الختام....
اتمنى ان موضوعي كان خفيفه على قلوبكم
على قولة شيخنا سليمان الجبيلان حفظه الله (كاملة الدسم..خالية من الكلسترول )
بنات....
يمكن ماكان عندي اسلوب حلو وجذاب بالكتابه ولكن هذا جهدي
ان وفقت فمن الله وان اخطأت فمن نفسي والشيطان
اختكم المحبة لكم #ران موري#
81
5K
يلزم عليك تسجيل الدخول أولًا لكتابة تعليق.
البحرالواسع
•
كلامك يسر الخاطر
يعطيك العافيه كلامك كله درر واحب اضيف لكلامك الفلوس الي تندفع في الرسائل والمكالمات لوتندفع للصدقات والجمعيات الخيريه ومرضى الفشل الكلوي ومرضى السرطان فاجرها أضعاف مضاعفه في كل سنبله مائه حبه وعد من رب العالمين وليس قنوات همها الربح على حساب مالنا واوقاتنا
الصفحة الأخيرة