الف مبرووووووووووك..........

ما شاء الله والحمد لله على سلامتك ومبروك ما جاك،، يتربى بدلالك وعز ابوه ان شاء الله

اشكر كل من باركلي وعقبال كل محرومه وعقبال كل الحوامل يارب العالمين والحين اقولكم الحكايه . كان عندي موعد ياطويلات العمر يوم الثلاثاء عند الدكتور واول ماكشف علي قال راح اكتب لك دخول يوم الخميس لاكن شكلك راح تجين بكره وصدق يوم الاربعاء قمت الظهر وتحممت ويوم جت الساعه وحده صبت معاي مويات قلت وش ذا لأن مافيه الم وخفت وزوجي سافر الصباح وش اسوي واكلم امي (على فكره امي ممرضه في مستشفى العسكري) قالت كلمي ابوك وتعالي بسرعه واكلم ابوي وطيران على المستشفى ويسرع واقوله وش فيك طاير ماأحس بشي وين الالم اللي يقولوون عنه المهم وصلت على الساعه ثنتين وادخل اناوامي ويكشفوون علي قالت الرحم مفتوح 4 سم قالت مافي الم قلت لا قالت ولاده قلت لأمي مافيني الم المهم طلعوني فوق واول لما جات الساعه 4 قالت الرحم مفتوح 6 سم مافي الم قلت لا وين الالم وين الطلق كله كذب فكذب جت الساعه 7 هاه مافيه الم قلت لا ياربي وش القصه وشوي ويجيني دكتور وكان مصم الا ادق ابرة ظهر فلت مابي قال صدقيني حلوه وانتي اول ولاده وماراح تحسن بشي قلت نابي خلاص انا بالعربي ابي الاجر ابي احس بالألم اللي يقولوون عنه قالوا بنعطيك ابرة طلق قلت طيب يالله بس ولدوني كل ذا التأخير علشان طيل العمر نايم فبطني علشان كذا الطلق بارد ويوم جيت من البيت اكلت رطب بس المهم عطوني الابره واحس بالألم وجاك الصراخ والزعاق هذا وانا قايله ماراح اصارخ وانفتح الرحم 10 سم ويووم حسيت بالألم قلت لأمي خلاص نادي الدكتور يعطيني ابرة الظهر مااقدر اتحمل وامي تهاوشني اسكتي يالله شهيق زفير كني فحصة علوم وحاطين لي الاكسجين اذا حسيت بالألم اعطه واذا حطيته ادوخ ويصحوني وخلودي نايم تصدقون ماقام والدكتوره تقول البيبي فخطر وانا انواع الصياح ياربي سهل يارب لاتحرمنياه تصدقوون حتى القابله كانت تقرا علي سورة الزلزله وتدعي لي وتخيلوا الولد على جنب جاي ولا يتحرك وهي الصرخه الاخيره وطلع حبيبي ويوم شفته دخت معد دريت عن نفسي الا وانا فغرفتي انا وامي وولدي معاي وتوته توته وخلصت الحدوته . ( ابي اقولكم يابنات عن مستشفى العسكري قمت النظافه والعنايه والقابلات يابنات ماليزيات ومسلمات وحنونات والله العظيم روعه وكثر ماكنت ماسمع عن المستشفى تخوفت منها لاكن اقولكم وبكل امانه اللي تبي تولد تتوكل على ربها وتولد وربك هو اللي ييسر ) واجعل (خالد) يارب قرة عيني ويبر فيني وفأبوه يارب العالمين والله يوفق الجميع.

نسيت اقول لكم اني ولدت الساعه 8 ونص يوم الاربعاء 23/12/1428