مساء الخيرات عليكم جميعا
اخباركم ان شاء الله بخير
بقولكم عن قصة ولادتي ببنتي ربي يحفظها ويحفظ لكم حبايبكم
طبعا ولدت يوم الأربعاء وكنت ماخذه من التاسع عشرين يوم حسيت اني تأخرت والدكتوره مانبهتني عالموعد قلت اروح بنفسي لها واشيك
رحت كاشخه ومتمكيجه ولااحس باي الم باستثناء قبلها بيوم كانت تجيني الالام بسيطه زي المغص
دخلت عندها على الساعه 7 المسا وتفاجئت الدكتوره اني الين الحين ما ولدت ومارحت لها
اكشفت علي وهنا الصدمه
قالتلي ماشاء الله تبارك الله مفتوح اربعه سم انا طارت عيوني مصدومه فرحانه وخايفه
قلت كيف يعني قالت خلاص على قسم الولاده
ظليت اترجاها اطلع امشي لما احس بقرب الولاده ارجع ،عيت علي وانا أحاول فيها والعبرة خانقتني والتفت على زوجي ااشر له ابيه يقنعها بس انتبهت لي وعصبت ههههه
قلت طيب مابي طلق صناعي وانا ابكي قامت تحلف انها ماتعطيني بالليل وعشمتني اني اولد بإذن الله عالفجر
كنت ناويه اطلع منها وانحاش بس مافي مفر
وصت الممرضه علي توصلني للقسم وتبدأ الاجرائات
لين وصلت وانا ابكي وأودع زوجي وولدي وانا اشاهق من البكي
ومن دخلت الغرفة كلمت امي وعلمتها وبعدها بساعه جاتني الله يخليها لي وقعدت تقرا علي سورة البقره كامله ويس وراحت
طبعا انا من دخلت التاسع وانا مداومه على سورة مريم والانشقاق
وطول منا بالغرفة وانا أقرى هالسورتين وأعيد فيها وأزيد واكثر من الاستغفار والحوقله
شوي اسمع صوت صياح يمزع القلب ناديت الممرضه تشغل لي التلفزيون على المجد قران
وتعطيه اعلى صوت بس الصياح واصلني تأزمت نفسيا وملييت زياده لااكل ولا راحه ولانوم جا الصبح وانا انتظر مافي اي طلق حسيت اني مطوله وكان ودي أصرخ بعالي صوتي واهج من المكان
وكل شوي السسترات داخلين يسالون مافي طلق اقول لا
عالساعه 8 الصباح جأت الممرضه ركبتلي المغذي والتخطيط ، شوي الا هذيك الابره بتحطها بالمغذي طرى علي الصناعي اللي ركبوه لي ببكري وانا أصرخ ايش هذا قالتلي واتر
هنا استسلمت قلت جاك الموت
واحط عيني عالساعه وانا طول الوقت استغفر وانتظر الطلق ابي اولد وافتك تعبت من المحاتاه والانتظار
مرت ساعه وانا مااحس الا بالالام بسيطه جأت الدكتوره قاست فتح 5 ونص وفكت كيس المويه
سألتني في الم قلت خفييف وهي تضحك مع السستر تقول ولادتك شكلها سهله بس اذا حسيتي بألم اطلبي السستر مسكن بعدها بنص ساعه حسيت زاد الألم شووي قاسو فتح 7 طلبت المسكن مؤ من الألم من الخوف لا يزيد، بعدها رحت بعالم ثاني عشر دقايق ويروح مفعوله
وفجأه شد علي الطلق وحسيت اني خلاص بولد ناديتهم يقيسون الا خلاااص ولاده
وماهي الا كم دفعه وولدت الحمدلله والشكر
يارب لك الحمد كما ينبغي لجلال وجهك وعظيم سلطانك
يابنات عليكم بقراءة سورة مريم والانشقاق واكثرو من ترديد الاستغفار والحوقله والله انها سبب من بعد الله بتسهيل ولادتي
والله يسهل على كل حامل ويقر عينها بشوفة ضنا ها سليم ويرزق اللي مابعد حملت يااارب
ام طلال 8 @am_tlal_8_1
عضوة نشيطة
يلزم عليك تسجيل الدخول أولًا لكتابة تعليق.
الصفحة الأخيرة
الله يقر عينك بما اعطاك
بس ماقلتي وين كانت ولادتك :)