باسطرمة منزلية ... أوعدكم انكم راح تثردون بزيت القلي الباقي منها خخخخ

اكيد الكل يعرف الباسطرمة ويحبها ...بس أني اكثر واحدة بالعالم تحب الباسطرمة ... بس الي من عمل ايدي وحياة عيني
انا متأكدة ... انكم بعد ماتسووها .. وتقلوها (لوحدها اومع البيض) ,زيت القلي راح تثردون بيه الخبزومايهون عليكم تكبوه !!!!!!! :29: هالكد ما طييييب :21: فتخيلوا حالكم وي الباسطرمة
!!!! :32:

الطريقة سهلة وعلمية (طريقة تحضير الباسطرمة كانت موضوع لأطروحةالماجستير الخاصة بأخو صديقتي ... <<<< لا تضحكون ..مااريد احلف ...هذي هي الحقيقة استعرتها منها لأني ااحبها بجنون)
الخلاصة.... عزيزاتي العضوات "الباسطرمة المنزلية100 على 100"
طبعا هم تفيد ام البيت العاملة وللضيف الفجائي او لما تعبانة وما في وقت للطبخ لأنك راح تخزنيها بالفريزر مش تجفيفوهذا اصح للجسم

المواد :(حسب الرغبة ... ممكن بالاول تتعلمين بكيلو لحمة وتشوفين الطريقة كيف ...وبعدين تسويين بالمرة الثانية خمس كيلوات وتحطيها بالمجمدة وتسوين منها شوكت ما تحبين ... ما تخرب حتى لو بعد سنة)

1- كيلو لحم بقري مفروم ناعم (خلي في شوية دهن مش مشكلة بس مش كثير ... اذااستخدمتي لحم البقر المصري "البتلو" فممتاز)
2- البهارات العربية السبعة (قرنفل, فلفل اسود, هيل اخضر, دارسين"قرفة",كمون مطحون ,كزبرة مطحونة و جوزة بوة شوي) طبعا الفلفل الاسود حسب اذا كان عندك اطفال فلا تكثرين ...وممكن اذا ماتحبين تسوين الخلطة بروحك ..ز تشترين البهارات جاهزة او تدورين على بهارات الباسطرمة الخاصة ...بالنسبة الي .. انا استمتع وانا اطحن من هذا شوي ومن هذا شوي واسوي البهارات طازجة بالبيت حتى نكهتها تبين زييييين
3- ملعقة اكل خل احمر ( تفاح او عنب او تمر) لكل كيلو ملعقة اكل خل ... وهذا مهم للتخمير
في ناس يستخدمون الليمون ... وهذا غلط ... لأن الليمون .. يخلي اللحم يجز (يعني ما يستوي ويصير مثل المطاط) ... بالاصل لازم نحط عصير "نارنج" بس هنا بالخليج ما لكيته ولا شفته ... فاستخدمت الخل الاحمر (لانه حامض من عصير حلو بالاصل مثل النارنج )
4- ملح حسب الرغبة
5- ثوم مدقوق وصاير عجين (تكدرين تستخدمين عصارة الثوم الصغيرة) وما يصير مفروم حتى لو مفروم ناعم ...لازم ما يبين ابد ... الكمية حسب الرغبة .. انا احط لكل كيلو5-8 حبات كبيرة واعصرها بالعصارة الخاصة ..فيصفى يعني ملعقة كوب .. تكدرتحطين خمس حبات وبعدين تشوفين هذي الريحة الي تريديها ولا اكثر ؟؟؟؟وتزيدين بعدين
6-اكياس نايلون شفافة للتخزين
7- وسلامتكم ياخواتي

طريقة عمل الباسطرمة
تحطين اللحمةالمفرومة في طاسة كبيرة (بلاستك).. تعجنيه بيدك الى ان ما يبين اللحم مفكفك ويصيركتلة واحدة...
رشي البهارات (رشة رشة مش مرة واحدة) وعجني وهكذا رشة ثانيةوعجني الى ان تخلص البهارات..
حطي الثوم بالخل وخلطيه باصبعك وديريه بسرعة على اللحم باماكن متفرقة .. وعجني.. لا تنسين الملح..ما تحطين كثير ..عادي (هذي الباسطرمة غير عن المجففة المالحة)..
استمري بالعجن ...الى ان ينخلط كله زين(شمي العجين... وشوفي اذا محتاج ثوم اكثر)
اتركي العجينة بالطاسة.. غطيها بغطاء طنجرة او صينية ... اتركيها ساعة ....(ساعةؤ ونص اذا الجو بارد)
هسة... سويها طوبا طوبات ...حسب الاكياس الي عندك(انااستخدم اكياس النايلون الشفافة ام نص كيلو).. حطي كل طوبة من اللحمة داخل الكيس وافرديها اول بايدك .... وبعدين بالشيبك الى ان يصيرسمكها نص اصبع او اكثر شوي (افرديها بحيث تكون ماتوصل طرف الكيس ... قبله بــ5 سم) اطوي طرف الكيس ..طويتين للداخل ..وحطيها بالفريزر...

طريقةالقلي:
طلعي الكيس من الفريزر... اتركيه 3 دقايق بس (يمكن ما تريدين تسوين كل الكيس ... نصه بس... صح) وقبل ما يذوب (يفك تجميده) استخدمي سكين حادة(مو مسننة) واقطعي شريط (العرض حسب الرغبة ) ثم قطعي الشريط الى قطع (صغيرة او وسط او كبيرة كيفج بس ما يبقى شريط)...
اذا اخذتي كفايتج من الكيس , فرجعيه للفريزر قبل ما يفك تجميده ...
حطي القطع بالزيت وغطي الطاوة شويي( طقطوقيات راح تصير بالزيت خلي بالك على وجهك المليح)ز.. قلبيها ...هسة ممكن تحطين بيض مخفوق عليها ...او تقدميها مثل ماهي وتسوين سندويتشات(صمون) مع طماطم وخيار ومسحة مايونيز على الصمونة .... اعطي اولادك السندويتشات ..وانتي جربي الزيت ...ههههههه دا اشاقى .......زيته يسمن ضعفين لانه زيت+دهن اللحم نفسه
اطيب طبق تسويه هو :باسطرمة +بيض
او باسطرمة لحالها + طبق طماطم وفلفل اخضروبصل مقليين ومرشوش عليهم جبنة كرافت مبروشة


وبالف عافية :cook: