عاد اليوم.. ابي يصير عندج انفصام شخصية..

بسم الله عليج.. اللهم عافنا..

لا..

انا قصدي انج اليوم تكتسبين أو تعيشين عدة شخصيات..

أو شخصية انج تقومين الصبح عادي وتجهزين الفطور لريلج قبل ليروح الدوام.. وتجهزين ملابسه.. وبعد ما يتريق وتودعينه بابتسامة أو باللي تبينه.. المهم تكونون عسل يا عسل..

بعدين تبدين شغلج..

تنظفين البيت كله لو ساكنة روحج.. ولو مع اهل ريلج.. تنظفين بعد ملحقج أو غرفتج اللي عندج ترومين تاخذين راحتج مع ريلج بدون مايشاركج احد فيه ويطل عليكم في خلوتكم...

المهم يتنظف المكان عدل ويترتب.. كأنج سندريلا يوم تعاقبها حرمة ابوها لو كان شيء مب نظيف.. يعني يكون نظافة نظافة..

بعدين تجهزين نفسج تكونين خادمة زوجك ليوم كامل.. تسوين له كل شيء وتنفذين طلباته كلها بكلمة : حاضر سيدي الحبيب.. سيدي حبيبي.. سيدي روحي.. يعني من ها الكلام بس يكون فيها سيدي..

تهزين كل مالذ وطاب من الغداءوالحلو وتحطينه بمكان قريب ممن مكان قعدتكم...

وتجهزين طاولة طعام.. صغيرة مع كرسيين.. وردة حمراء وبجنبها بطاقة من صنه ايديج وكلمة حلوة منج لريلج او بيت شعر..

تجهزين الحمام مع عدة الحمام المغربي.. وروب وشبشب جديد يكون هدية لريلج حتى لو مايلبس لأنه راح يلبس غصبا عنه.. لأن بعد الحمام راح تكونين مجهزة عدة الباديكيير والمانكيير وتنظيف للوجه..

رتبي الغرفة ةدخنيها عدل..

قبل لايوصل الزوج من العمل.. جهزي نفسج بلبس الخادمة الملكية.. او لو لبس خادمة أندونيسية.. بس حطي المكياج الهادي .. والشعر لفيه بس كوني مرتبة ومغرية لزوجج.. مثل وحدة من المغنيات ماعليه اسمحوا لي ما اعرف اسمها لأني ما اسمع أغاني لكني شفت صورتها وهي تغني على انها خادمة لكن كانت مغرية جدا لصاحبها..

ولما يوصل الزوج.. استقبليه بابتسامة واعطيه وردة يمسكها عند الباب.. شيلي كل شيء من ايديه بهدوء ولباقة مثل الخادمات الملكيات.. وبعدين امشي جدامه توصلينه لين الحمام يتغسل.. وكوني شالة فوطة بايدج يمسح بها..

وصليه لين طاولة الطعام وعطيه المنيو مال الأكل تكونين انتي كاتبته.. وصبي الشوربة له في البداية وحطي التوست المحمص معاه.. وبعدين بعد مايختار.. تروحين تيبين الأكل اللي انتي مجهزته وطابخته وتقدميه له..

عاد انتي ياشاطرة قعدي جدامة واكلي وانتي ساكته بس تكون ابتسامة خفيفة على شفاتج وناظريه بس.. خليه يراقبج وخليه يتكلم عن نفسه وشغله.. بعدين خلصي قبله.. ومريري عليه المنيو ثاني مرة حق الحلو لو في خاطرة..

بعد الحلو.. كوني مجزة فوطة مبلله.. وقبل لا يخلص روحي بسرعة وحطيها بالمايكروويف وتكون معطرة بعطر خفيف.. وبعدين ظهريها تكون دافية وعطيها لزوجج يمسح بها..

وبعدين خذيه ينام أو للحمام اذا يبي يتسبح قبل النوم ( كل وحدة تعرف طباع ريلها اذا يتسبح عقب ما ايي من الدوام او ينام).. المهم كوني مساعدة له في خلع الملابس وحطيها على جنب بكل هدوء.. بعدين جهزي الحمام يكون دافئ ويدخن.. وادعجي ريلج بالليفة المغربية من خاطرج.. بعدين بعد ما يخلص عبي البانيو ماي حار وخليه يقعد شوي وحطي زيت عطري فيه ودلكيه شوي.. بعدين خذيه ن ايديه وقدمي له الفوطة وبعدين الروب واذا رفض قولي له انه في جلسات تنتظره وهو لازم يكون لابس الروب.. ولبسيه الشبشب.. وخذيه للغرفة.. وسوي له بادكيير ومانكير.. وبعدين سوي له تنظيف بشرة.. وبعدين تدليك للوجه والكتفين.. وبعدين عطيه ملابس حلوة ونظيفة وخليه يقعد جدام التلفزيزن وتكونين مجهزة له القهوة مالت العصر او الحلو..

في هاي اللحظة اختفي عن الانظار.. وروحي جهزي العشاء الخفيف.. وكوني طالبة كيك من زمان وسلطة فواكه وعصير..

وروحي للطاولة ونظفيها وخليها جاهزة للعشاء..

احينه انتي روحي بسرعة الغرفة..
بدلي ملابسج.. والبسي ثوب سهرة هادي وبسيط بس مغري وحلو وملفت للنظر..

وبعد ارفعي شعرج او رتبيه نازل بس مب مفتوح.. وحطي مكياج هادي بسيط بس حلو.. وتروشي وتعطري وحطي كريمات الجسم المعطرة بعد الحمام اللي تاخذينه..

وان كان ريلج مشغول بشيء.. انزلي بهدوء بدون ما يحس فيج.. ولعي الشموع بكل هدوء في كل مكان تكونين وزعتي فيها الشموع من الصبح.. بعدين طفي النور من بعيد لين توصلين عند ريلج.. بعدين ناديه بس كل هذا مايكون شافج.. ناديه سيدي المحترم الحبيب العزيز.. وخليه يلتفت لج وينصدم انج تغيرتي من الخاادمة للأميرة..

وناديه واسحبيه بكل هدوء من ايديه لطاولة العشاء.. وعطيه بعد المنيو مال العشاء .. وحطي العشاء.. وبعدين حلو بالكيك والعصير.. وبعدين خذيه للغرفة..

وخليه ينام مثل الملك.. بس قولي له قبل ينام.. ( انت مرتاح وسعيد وراضي علي) وعطيه قبلة فوق راسه لأنها عظيمة عند الزوج وعلى ايده بدوتن ما تنتظرين جوابه..

وان شاء الله اكون وفيت بهاي الحركة.. وذا عندكم اضافات ابدعوا وغيروا من عندكم..

والقادم أكثر.. فانتظروا.........................

ههههههههههههههه يا حبيلك..

الله يستر ما ننقلب قروود !!!!!!

مشكورة أختي..

صرااااااااااااااااااااااااااااااحه اافكار تجنننننننننننننننننننننننننننننننننن.................:26: الله يعطيك العافيه حبيبتي :24: باانتضارالمزييييييييييييييييييييييييد:27:

على سالفة طرزان....
تصدقون مرة قريت في أحد المنتديات على لسان أحد الازواج وهو يضحك على المستوى اللي وصلت له زوجته من هالحركات يوم دخل عليها الغرفة و يلاقيها متعلقة في سقف الحجرة تنتظره مثل ( الق...... ) أو طرزان .

حركاتكم وايد مبالغ فيها وبعضها تخلي الريال بدال ما يفرح يضحك عليكم من قلبه.

أكثر شيئ يفرح الريال هو الحركات البسيطة التي تعبر عن محبة الزوجة لزوجها برومانسية جميلة مثل وردة جميلة إبتسامة مشرقة كلمات عذبه من القلب نظرات حب وحنان تآسر قلب الزوج صدقوني الريال مو محتاج حق كل هالسوالف . بعدين انا ما عجبتني ولا حركة من الحركات اللي ذكرتها الاخت وين راحت انوثتكم يا بنات وانتوا مثل القرود معلقة ... أو مثل الخدم ... زوجك أكرمك وخلاك اميرة في بيته وأنت مسوية روحك طرزان أو كابوي او جاريه في قصر أو خادمة في مطعم ...
معليش اخدم زوجي على عيني وراسي ولكن اكون أميرة في بيتي وعلى قلب زوجي اللي توجني بأحلى لقب واختارني زوجه ما اختارني خادمة أو إنسانه جايه من غابة .

بعدين لو كان قصدك على الإغراء في ألف طريقة وطريقة تغرين فيها زوجك وتخلين ما يشوف أحد غيرك بالدنيا غير هالحركات ..... وبعدين في حركات وايد احلى منها ذكروها الاخوات في عدة مواضيع بالمنتدى شوفوا اللي يناسبكم يا بنات ولا تخلون الرجال يضحكون عليكم ويتمسخرون عليكم . وصدقوني انا ما كتبت هالكلام إلا بعد ما سمعت عن الكثير من هاذي المواقف اللي تخلي الريال يضحك على حركات زوجته بدل ما يفرح بها . بعدين شوفي موضوع الأخت سديم اللي كتبت عن لبس المرأة لزوجها في البيت طريقة كلامها معاه ومعاملتها له هذا اللي يخلي الريال يتعلق بزوجته مش طرزان وشهرزاد الظاهر انك صغيرة بالسن ولحين متأثره بالرسوم المتحركة.

انا مو ضد هالحركات بالعكس انا احب هالحركات بس كل شيئ في وقته حلو يعني سويها بس بالمناسبات الغالية مو كل ليلة لا ن حلاة الشي بندرته و خليها حركات حلوة راقية تعبر عن انوثة وجمال ما ينساه الزوج ابدا

وهذا رأي الشخصي ولا احد يزعل من كلامي والسموحة من الجميع

وآسفة لو زعلتكم بكلامي لكن هذا يعبر عن رأي الشخصي.

أنا ما ادري ليش كل هذا التعصب..

ولا ادري ليش انتوا حاسين اني صغيرة وااايد وعقلي وااايد تافه..

حبيباتي أنا صار لي معرسة اربع سنين وعندي 2 الله يحفظهم لي ولأبوهم..

وبعدين لا تعقدون الموضوع.. انا ماقلت نناقز مثل الق.............. عسب نعيش حياة طرازان وحبيبته ..

والله حياتنا احن أكرم لنا من تقليد الاجانب..

ولا قلنا سووا الحركات كل يوم.. قلنا في السنه حسنه..

وبعدين انتوا لا تعمموا رايكم..

اكرر وازيد السبب اللي خلاني اطرح الموضوع مب منافسة وفشخرة ولا لعبان ومضيعة وقت.. ولا اني اكشف سر من اسرار الزوجية..

والله في حركات لا سويتها ولا شي.. بس هي ابداع من كثر المطالعة.. والانسان بحد ذاته يبدع من كثر الاطلاع..

ولا قلت كل وحدة لالالالالالالازم تسوي لريلها العجب العجاب..

انا صراحة ما ادري شو اقول.. لكن الحياة ملييييييئة بالناس التعيسة.. والله ياخوات اقولها مرة ثانية.. انا بحكم دراستي والاختلاط بالناس بشكل كبير.. شفت مشاكل ما تتخيلونها.. ولهذا السبب حطيت الموضوع خصوصا من كم يوم صارت مشكله بالعائلة بسبب تافه من اسباب الحياة الزوجية والضحية العيال اللي ابوهم تزوج وهجر البيت..

خواتي ما اقدر اكشف الاسرار.. لكن الله يعلم نيتي والسبب اللي من اجله حطيت الموضوع..

ورجاء حار انكم تفهمون السبب.. مب لأني صغيرة ولا عقلي صغير.. الحمد لله والشكر انا انسانه واعية دارسة ومتخصصة شؤون اسرية زوجية..

وانا مازعلت ولا راح ازعل.. لأني في ناس صدق تستفيد من وموضوعي..

لو المشرفات شافوا انه الموضوع مايستاهل كان حذفوه من زمان.. وغيره من المواضيع..

لكن الهدف من هذا المنتدى الرقي بالحياة الأسرية..

والله سبحانه يعرف ان نيتي كانت اني ابي اسعد الغير بكم حركة تسويها الحرمة لريلها ..

والله من وراء القصد..