بالبلدي الفصيح

حتى أنت يا خيار


طيب طيب يللي على الباب اشبك كده متصربع.. دحين كل يوم على كده لازم اتسمر ساعة زمان عشان حضرتك تفتحي الباب يا شيخه حرام عليكي هلكتيني بعدين افتحي درف الباب الاتنين منتي شايفاني كيف متعتل كرتون المقاضي.. طيب سامحني يا سيدي مو قصدي المهم قولي جبت كل المقاضي.. ايوه جبتها.. ايش ده اللي انت جايبو هادي مقاضي اشتريتها والا شحتها: حبتين طماطم وحبتين خيار وحبتين بطاطس وشوية بامية وفاصوليا خضراء ليه ما جبت من كل نوع صندوق؟.. صندوق في عينك منتي شايفه اسعار الخضار والفواكه كيف مرتفعة ياهوووه يا ناااس الخيار صار الكيلو بـ 10 ريال عمرها ما صارت وكل ده من تحت راس تجار الخضار الطماعين اللي ما يخافون الله اللي بيقولوا وهما بكاشين في كلامهم انه سبب ارتفاع الخضار والفواكه هيه برودة الجو هادي الايام لا والتاني ايش يقول بسبب الحرب اللي كانت في لبنان زادت الاسعار والتالت ايش يقول عشان فيجو وزي ربرتو وقعوا للاتحاد زادت اسعار الخضار في الحلقة هيه بالله ياناس ايش.. (دخل طز في سلام عليكم) كل ما حصلت مصيبة قاموا زودوا الاسعار ما يكفي اللي قاعد بيصير في سوق المواد الغذائية وسوق الادوية حتى اصحاب بناشر السيارات زودوا الاسعار في بيع الكفرات وغيار الزيوت وكله من تحت التاجر الطماع اللي ما يشبع ومن تحت راس الحبايب اللي في وزارة التجارة ساكتين على كل اللي قاعد بيحصل.. لكن المصيبة تخاف انه بكرة النهار نشوف مخللين قصدي محللين يتكلموا على زيادة اسعار الخضار ويقولوا زيادة الاسعار زيادة طبيعية في ظل انخفاض اسعار الاسهم واساسا محد ودا الناس في مصيبة الا دول المحللين اللي ما وراهم الا الهلس ساكتين على هادول الحيتان اللي قاعدين ينهبوا في ارزاق الغلابا ومؤسسة النقد ترمي على هيئة سوق المال وهيئة سوق المال ترمي على مؤسسة النقد وانت الله يعينك على جلطات القلب والسجن والا تكون نهايتك في الشرشورة لانه كل ما حصلت مصيبة في البلد جابولنا هادول المحللين وتشوفوهم وهما قاعدين يبربروا ويقولوا انه زيادة اسعار الخضار كان بسبب انقطاع المويه طيب يا حبايب المويه مقطوعة دايما مو جديد لكن ما نقول الا الله يعيننا على كل اللي قاعد يصير فينا.
وعيشوا كتيييير تشوفوا كتيييير
ومن عكاظ الاسبوعيه نقلت المعلوميه