امووول11 @amoool11_1
كبيرة محررات
بالتفصيل الممل تجربة //امووول بعد الالترا ليزك في مستشفى الكحال بالدمام
.
.
اليوم راح احكيلكم تجربتي بالتفصيل بعد ماسويت عملية الالترا ليزك لعيوني بمستشفى الكحال بالدمام ولله الحمد
انا من سنين ابحث وادور ورى عملية تصحيح النظر
مره اعزم ومره اهون لحد ماربي تمم الحمد لله قبل رمضان باسبوع بديت اقتنع اني لازم اسويها
طبعا المشكله اللي حيرتني خوفي من المكان اللي راح اقرر واسويها فيه
تعرفون عيووووون مو لعبه
طبعا لقافه مني سويت بحث باليوتيوب وبحثت في النت عن التجارب وكنت كل شوي براي
اخترت اسوي العمليه بمستشفيات المغربي
اتصلنا عليهم قالوا العمليه بتكلف 6500 ريال شاملة كل شي
تعالي ونسوي لك الفحوصات ان طلع كل شي تماام من بكرا نسوي العمليه والعمليات تتسوى كل ثلاثاء واثنين
جهزت حالي وطلعت من الخفجي للدمام وعلى طول للمستشفى
وصلنا عندهم قالوا مافي عمليات الحين والدكاتره مسافرين والجهاز الفلاني موموجود انا ضااااق خلقي :(
وزعلت وانقهرت شلون امس متصله ويقولون تعالي وطقينا مشوار واخرتها مافي
واحنا بالسياره شاار على زوجي
وش رايك نروح للكحال قلت ماراح نلقى مواعيد لان عندهم زحمه وقبل اسبوع دقينا عليهم قالوا مافي مجال
قال نتصل اتصلنا قالوا اوكي مافي مشكله تعالوا
حركنا وطلعنا للكحال
معليش الموضوع طويل بس اكيد اللي تبي تسوي العمليه راح يهمها ادق التفاصيل
وصلنا للكحال اخذنا موعد فتحنا ملف واخذوا مننا 700 ريال
طبعا المبلغ حق فحوصات قبل العمليه ان طلع ان العيون فيها مشكله من التهاب او ماينفع لها العمليه خلاص ماراح يسترد المبلغ
دخلت وسويت الفحص وكان على ثلاث مراحل بتكون الفحوص نفس يوم بتسوين فحص نظر للنظاره
بيحطونك على جهاز ويشوفون عيونك
بيلبسونك نظاره ويحطون عدسات وقدامك اللوحه شوفي يمين يسار وزي كذا
بعدها تروحين لجهاز ثاني بيحطون لك قطره وبيجي الدكتور ويفحص سمك العدسه اللي بعينك
وكلها امور عاديه
بعدها دخلنا عند الدكتور وانتظرنا نتايج الفحص طلع كل شي تماام عندي ويصير اسوي العمليه
قالوا تعالي بكرا الصبح بتسوين العمليه
رحنا لشقه وريحنا وطول الليل هواجيس وحالتي حاله خايفه اني اتالم واوسوس وحالتي حاله
جا اليوم المنتظر واجهز حالي واروح
طلعنا للدور الثاني وجت وحده سعوديه خذتني لغرفه انتظار للنساء جلست وزوجي بغرفه انتظار للرجال
طبعا بالغرفه انواع الضيافه وجابوا لي ترمس قهوه وتمر وحركات
بس ماني يم شي بشوف وش الخطوه اللي بعدها :06:
جت الممرضه سعوديه جابت لي لبس خاص وانا ترجع الحاله معاي ماادري وش فيني بس لازم اعلمكم لان كل اللي مريت فيه
مااااا لآمه داااااعي :hahaha:
قالت فكي شعرك ولفي الشيله وحطت على راسي طاقيه واعطتني كمام لبسته يعني غطى وجهي كاني متلثمه
ولبسوني روب فوق العبايه وفصخت الجزمه كرمكم الله ولبسوني برجولي نفس الشراب اللي يلبسونه في العمليات
جابوا لي ورقه ووقعت عليها وطلبوا مني اكتب اسم الشخص اللي بيدخل معاي وتركوني وراحوا
بعد 10 دقايق جت وقالت يلا بنروح
طلعنا ودخلت غرفه العمليات وكان صوت القران ماشاء الله تبارك الله والله يحسس بالامان الحمد لله
لقيت زوجي جالس ينتظر بالغرفه وملبسينه نفس لبسي
في سرير نمت عليه حطوا بعيني قطره وكانت قطره مخدره وفوق راسي في جهاز كبير
شوي دخل الدكتور وسلم وقام يتكلم معانا ويطمن وان الامور بسيطه وسهالات
جاب زي الاله تثبت العين وانا كنت طبعا عارفه وش الخطوات من قبل شايفتها وكنت شايله هم شلون بيفتحون عيني
الحمد لله ماتحسين باي شي
قالي طالعي الجهاز في لون اخضر ركزي فيه ويتكلم ولاتخافي يابنتي وبكل خطوه يقولك وش راح يسوي مافي تناظرين
فوق بيحط اداه بعدها بيشيلها ويسوي اشياء ثانيه بسيطه بيرش زي الماده بعدها بيقول بنمرر الليزر
خلك على النقطه الخضرا بعدها خلصنا وتم بحمد الله العين الاولى
ونفس الشي للعين الثانيه
بعدها بيركب لك عدسه مؤقته للعين لحد مايرجع غشاء العين وكانك حاطه عدسات عاديه
تخيلوا دقيقتين للعين اليمين ودقيقتين للعين اليسار وخلصنااااااااااا
بعدها جلست وحسيت بدوخه طبعا مو من شي من رفعه الضغط يودونك لمكان تستريحين فيه دقيقتين تشربين مويه
تقومين تجي الممرضه السعوديه تعطيكي نصايح مابعد العمليه مكتوب فيها انك عادي تتوضين تتروشين
انتبهي من الشامبو يدخل العين عدم فرك العين بقوه
ممنوع المكياج العطور البخور البعد عن حراره الغاز
طبعا عادي تمارسين حياتك اليوميه وتصلين وتسجدين عادي
سويتها الاثنين قالت الاثنين الجاي تجين نشيل العدسه المؤقته
يوصفون لك مضادات حيويه وقطرات ترطيب للعيون
طبعا ولاحسيت باي الم ولا اي شي الحمد لله :27:
تلبسين نظاره شمسيه سوداء عازله للضوء وتقولك بعد تبعدي عن الاضاءه القويه طبعا حتى وانا في البيت لبست النظاره
بعد العمليه بثلاث ساعات بديت احس بنغزات راح مفعول الادويه اللي عطوني
وجا موعد القطرات بتحطين الادويه ولاااازم تلتزمين فيها
الرؤيه كانت يعني ماتقدرين تركزين بشي زين لان توك طالعه من العمليه بس تشوفين دربك والرؤيه واضحه
الايام اللي بعدها تحسين بجفاف بالعين وشوي نغزات نفس الشوكه تغز العين وتروح عاااادي جدااا
اوصف لكم الشعور بالضبط نفس يوم تلبسين عدسات ويكون الجو فيه غبار وتجي حكه بسيطه وتنشف العدسه
نفس هالشعور طبعا عادي تستحملين لان اللي يبي الدح مايقول اح خخخخخ
الاثنين اللي بعدوا رحنا للدمام
دخلنا غرفه فحص النظر تقولك يلا شوفي الارقام والحروف وين مفتوح يمين يسار عارفينها
الوقت هذا يااالله لك الحمد كان كل شي واضح
طبعا الاسبوع حق العمليه النظر مره اشوف الكتابه واضحه مره تغبش عااادي مااستقر النظر
دخلت على الدكتور شال العدسات المؤقته وبرضوا قاس نظري كان تماام 6 على 6
قال الدكتور الحين كل شي تمام الحمد لله تقدري بعد اسبوع من الحين تحطي مكياج تطبخي عطور بخور كلووو عادي
الحين صارلي تقريبا شهر ونص من سويتها
الحمد لله النظر احسن مايكون كل شي تمام بيكون عندك قطره مرطبه للعين وقت الحاجه وسلاااامتكم
هذي تجربتي بالتفصيل وعقبال اللي بيسوونها ان شاء الله
العمليه سويتها بالكحال الدمام
افضل دكتوور عادل الرشود
تكلفه العمليه بالضبط 8700
شامله النظارة والادويه
اي استفسار سؤال رقم جوالي موجود بملفي وانا حاضره لاي وحده حابه تسال عن حاجه
اختكم ام امل :33:
.
.
49
67K
يلزم عليك تسجيل الدخول أولًا لكتابة تعليق.
Sooooozy
•
الحمدلله على سلامتك اخت امووول والله كنت ناويه اسويها واستفدت من تجربتك كثيرصارعندي خلفيه عن الموضوع الله يوفقك.
ماشاء الله تبارك الله عليكي والله يتممها عليكي بالعافيه نفسي اسويها بس انا عندي حساسيه وعلى مايقولون استماجزيم يعني انحراف في القرنيه ماادري تناسب وللا
ورد#وعود
•
الحمدلله على سلامتك بسالك ابدا ابدا مافيه الم لان شفت مقطع في اليوتوب وشفت زي الظغط الشديد عاى العين وانا انسانه خوافة موت من ادكاترة
الصفحة الأخيرة