بالله مين الغلطان و مين معه حق ؟

صبحكم الله بالخير
كيفكم ان شاء الله بخير
يا اخواتي شورو علي و هل انا معي حق او غلطانه
العلم سلمكم الله اني ساكنه بنفس مدينة اهلي لكن انا بحي و هم بحي طبعاً اسبوعياً بالويكند اروح لهم بحكم اني اطفش من البيت و ظغط المدارس خصوص ان زوجي نادراً جداً يخرجنا تماشي كل شي عنده ممنوع و هو اغلب الويكند يخرج مع اصحابه كشتات و استراحات
صار كل ما جاء يوم الخميس قال انا خارج اتصلي على اخوك يمرك يوديك عند امك طبعاً اخوي يجيب زوجته عند اهلها و اهلها ساكنين بنفس الحي اللي انا ساكنه فيه و صار كل اسبوع يقول كذا و أكلم اخوي و ما يقصر الله يسعده يمرني و اذا برجع البيت قال كلميه يرجعك و على هذا الموااااال كل ويكند
الصراحه يا بنات حسيت اني زودتها مرني و رجعني يا اخوي يمكن طفش بس ما يبي يكسرني و هو مو فاضي لي كل اسبوع ! عنده اشغاله و زوجته و اطفاله و ارتباطاته يمكن احرجه و قد لمح لي كذا مره انه مو فاضي و فين زوجك ما يجيبك
فصرت احيان ما اروح لأهلي عشان ما ابي اكلف على اخوي و اشغل نفسي بأي شي بالبيت واتحمل الملل والروتين
بقولكم عن موقف حصل اليوم طبعاً زوجي عنده اجازه و خرج امس كشته مع اصحابه و على اساس يجي يوم الجمعه و اليوم اتصل يسأل عن اخبارنا و عن مدرسة الاولاد قلت له يا فلان بخير الحمدلله بس ترى الغاز خلص يوم الجمعه عبيه قال انا تمددت اجازتي و برجع ليلة الاحد لكن كلمي اخوك يمرك وروحي لأهلك قلت اهلي خرجوا مافي احد بالبيت تغير صوته و زعل قال ايش فيك لك فتره كل ما اقولك روحي مع اخوك مره تقولين اهلي خارجين و مره تقولين اخوي مشغول و مره تقولين عندي اشغال بالبيت علميني ايش السبب ؟ اخوك يقولك ما عاد بمرك او انتي من راسك ؟ قلت والله اخوي ما يقول شي بس انا ما بكلف عليه كل اسبوع ما ابي احرجه معي و هو مو ملزوم فيني قال يعني من راسك اما انا اوديك ولا بلاش ، ليش اذا شفتيني مبسوط بالكشته تنكدين علي قلت مو قصدي انكد انا اللي اعرفه انك بتجي يوم الجمعه و الغاز خلص ضروري اعطيك خبر و اهلي فعلاً مو بالبيت من البارح ! زعل و سكر الخط !!
بالله مين الغلطان و مين معه حق ؟ و هل تشوفون اني زودتها مع اخوي ولا كيف ؟ يعني طول الايام والاسابيع والاشهر اما اخوي يطلعني او انطق بالبيت !!