بالمجلس دائما مع بعض لكن فجئه!!

السلام عليكم ورحمة الله وبركاته
كانت صديقه السوالف معاها متعه انسانه ماشاءالله موسوعه من العلم والإطلاع يمر الوقت معاها كانه دقيقه من كثر ماهي انسانه ممتعه السوالف معاها ماشاءالله بكل شي ملمه وكل شي تعرفه ذكيه جدا فرفوشه ماشاءالله تدخل القلب
سناباتها دائما تجنن طاقه إيجابيه صداقتها والتقرب لها ماشاءالله سعاده وطاقه ايجابيه سبحان من حط ذاك الحب بقلبي لها احبها في الله ذا الادميه ودائما احرص انها اعزمها واناديها طبعا تتسألون من اللي اتكلم عنها بتستغربون من هي
من تكون؟! تكون ياطويلات العمر زوجة اخو زوجي
طبعا اللي حصل انه الحرمه فجئه تغيرت كنا اذا طلعنا عزيمة تخص اهل الزوج هي دائما جنبي نسولف نتجاذب اطراف الحديث اذا تصادفنا عند اهل زوجي تطلب مني اوصلها اعزمها في بيتي وتعزمني فجئه الحرمه تغيرت اذا شافتني عند اهل زوجي كلمه ورد غطاها ماعاد تطلب مني اوصلها صارت رسميه جدا جدا اذا طلعنا عزيمة تخص اهل زوجي ماتجلس معاي ولا تحاول تجلس جنبي تبعد عني وتسلم برسميه ولاتحاول تدخل اي سالفه معاي او نقاش وتحاول تكون بعيده عني جدا استغربت جدا تصرفاتها ليش كذا تتعامل وش السبب مادري
حاولت اعرف لكن ماعرفت مرره ضاق صدري وحاولت ابين قويه وماهمتني واتعرف على غيرها لكن للاسف حازه بخاطري ودائما اشتاقلها واشتاق السوالفها دائما احن الجلستها والله ذاك اليوم كنا مجتمعين مع قرايب اهل زوجي عزيمة يعني واسمعها تقول الاخت زوجي تسولف يعني انه تعرفت على جارتها وانه يتواصلون وكذا والله في قلبي اقول ياحظ جارتها فيها
طبعا عشان اوضح لكم الصوره الحرمه ماقللت ادب معي او رمت حكي او اي شي من هذا القبيل لا لا فقط انسحبت انسحاب تكتيكي مؤدب وجدا واضح عليها انها انسحبت من سبب كبير وجاني السبب للاسف انها تحس انه اقارن فيها وانه يوم شفتها جابت شغاله قلدتها وجبت شغاله عشان كذا هي تغيرت علي وحست انه انا شخصيه فارغه واطالع الناس وش يسون واسوي لكن يعلم الله انه كنت محتاجه وابيها وتيسرت وجت بالفتره اللي هي جابتها طيب فالنفترض انه انا قلدتك السالفه لها٦ سنوات طيب قديمه ليش ماتنسين ليش الى الحين في قلبك وخلاص حكمتي علي مؤبد والله اللي خلاني افتح الموضوع بعد ٦ سنوات انه شفتها امس في اجتماع للحموله ومازالت نفس الرسميه وحتى جنبي تهرب ماتجلس وتحاول ماتاخذ وتعطي معاي ولو مزحت معاها او سولفت عشان افك الحواجز ماعطاتني وجه،، والله يعز علي نفسي وبنفس الوقت ماقدرت اشيل بقلبي عليها والله اني احبها واعزها ولا كان ودي ابد نوصل الهذي الدرجة حتى السناب عملت لي تخصيص وواضح انها صارت تخاف مني وتحس اني اغار منها لا وتقول طبيعتي ما احب العلاقات واحب اكون الحالي ماتبي تجرحني وانا داريه انها تخاف مني وتحس اني اغار منها
والله عجزت اكابر واقول انتي قويه طنشي اللي مايبيك لاعبينه بالطقاق لكن غصب اذا شفتها حنيت السوالفنا ومزحنا رغم انه عندي صديقات كثير بعضهم خذتهم الدنيا وبعضهم مازلت على تواصل لكن الصراحة مافيه مثلها بنت الحلال انيسه وتحيي المكان بسوالفها الممتعه وفوقها خفيفة دم ماشاءالله تبارك الرحمن
حسبي الله ونعم الوكيل على السواس اللي يفرق بين الناس ويلعب بعقولهم