الله يبلغنا واياكم رمضان ونحن وانتم بصحه وعافيه .. اول شي احتسبي الاجر انك تفطرين صايم ولا تضيعي اجرك بالتسخط اعرف انه تعب بس مالك الا الصبر والله يكون في عونك ويساعدك .. بالنسبه للطبخات سوي الطباخات السهل اللي ماتاخذ وقت ..
صينية الخضار ... المقادير باذنجان .. بطاطس .. فلفل رومي .. كوسه .. بقدونس ليمون ملح .. جبنه سايله قشطه . جبنه موزريلا
الطريقه .. قطعي الخضار كلها واقليها م عاد الفلفل الرومي والبقدونس .. اخلطيها كلها بعد القلي مع بعض وحطي عليها الجبنه السايله والقشطه وبعدين حطي عليها الفلفل الرومي والبقدونس وحطيها في القوالب البيضاء حقت السوفليه وبعدها رشي عليها الجبنه الموزريلا ودخليها الفرن تتحمر وبالهنا والعافيه
بطاطس باللحمه المفروم ... المقادير والطريقه لحم مفروم نفس حق السمبوسه بس تضيفي له شوي معجون طماطم وتخليه يتسبك . وبطاطس مقطعه اصابع مقليه . جبنه وقشطه وجبنه موزريلا تحطي البطاطس في صينيه وترشي عليه اللحمه المفرومه وبعدها تحطي الجبنه والقشطه بعد ماتخلطينها مع بعض وبعدها تحطي الموزريلا وترشي عليها فلفل حار وزيتون اخضر وتدخلينها الفرن ..


عندك التوستيه . تقطعي اطراف التوست وترصي التوست في صينيه وتاخذي بصل وتكشني وتحطي عليه فلفل رومي و جزر مبشور و تحطي التونه وتخليها تتسبك حطي عليها شوي كركم وبهارات وقلبيها وحطيها على التوست وافرديها وحطي عليها جبنه سايله مع قشطه تخلطينها مع بعض وتدخلينها الفرن تتحمر


عندك صينيه الدجاج اسلقي دجاجه وقطعي خبز واقليه . وبصل مقطع . سوي كشنه بالبصل وحطي عليه الدجاجه بعد تنتيفها وقلبيها وحطي عليها معجون طماطم وبهارات وخليها ع جنب خذي صينيه وافردي فيها خبز مقلي وسقيه ب شوي مرقه من حقت سلق الدجاجه وبعدها حطي طبقه دجاج وبعدين حطي طبقه زبادي مخلوط مع حبه ثوم و بعدها حطي خبز وبعدها دجاج وبعدها زبادي لين تخلصي الطبقات عندك وبعدين رشي عليها بقدونس وسماق
بيتزا البطاطس .. قطعي بطاطس مكعبات وحطيها في الصينيه وحطي عليها كشنه نفس حقت البيتزا بس حطي لها فلفل رومي مع الكشنه ينطبخ وبعدين اخلطي بيضه معه جبنه كاسات وصبيها عليها وحطي على الوجه زيتون اخضر اللي يجي حار وبعدها دخليها الفرن تجمد شويه ورشي عليها جبنه شدر كرافت وخليه بس تسيح الجبنه وبالعافيه ...
وان شاء الله لي رجعه تعبت وانا اكتب الله يكتب اجرنا واجرك

وه ي قلبي ماشاء الله يوم عندك ويوم عند اهل زوجك وتقولي عن نفسك رفلا
والله ماشاء الله عليك حرمه سنعه
غيرك ماتتحمل تحط رجلها على طول
اسمعي حبيبتي
انا افرزن السنموسبه واصابع الجبنه لرمضان كامل
وعادي سوي ايدامات بس كل مره نوع من الايدام
اشتريلك قطاعه حق الخضروات تقطعي به البصل والثوم عشان مايضيع وقتك في التقطيع
خذيلك بهارات جمعيها كلها في علبه ثم وقت الطبخ رشي منه
يعني من قبل رمضان نظمي كل شي ودوري طبخات سهله وماتاخذ منك وقت
مع اني اشوف سموسبه وشوربه وايدام ولقيمات تكفي والله

والله ياحبيبتي تقدري تتعذري رمضان للعباده مو للطبخ قولي لزوجك انا ماعرف اطبخ ولا اقدر اضغط ع نفسي كل واحد ياكل في بيتو وانتهينا

تدرين شبت كبدي يوم قلتي ابو زوجك زعل عن العصير
واضح انك متكلمة عند احد او زوجك والا بالله كيف بيعرف ان العصير من امس ! يمكنك قلتيها بدون تفكير عندهم ووصلت للشايب اللي متعود على اصدار الاوامر العليا !
بعد اليوم أي شي تسوينه لهم لا يدرون كيف وليه مدام يجونك قبل المغرب بشوي
اعملي نفسك كارفه ميته تعب
وفي نفس الوقت اطلبي مفرزنات وخبيها " اذا فيه ناس زي الفار ينبشون " حطيها تحت تمر او أي شي
نوعي
جيبي سنبوسة هندية وجيبي بف ونوعي في الحشوات ما بين لحم وجبن
وجيبي خبز تست افرديه وقطعيه دوائر وغمسيه في بيض وبقسماط وفرقيه في صينية الين يجمد ثم اجمعيه في كيس
كذا تقدرين تقلينه في الزيت وتحشينه أي حشوة تبغينها طبعا بعد ما تقسمينه نصفين
ممكن تسوين عجينتك المعتمدة وبعد ما تنفخ ادهني الكيس بزيت وحطيها فيه وجمديها وطلعيها الساعة عشرة يصير باقي بس تفردينها وتسوينها وممكن تسوينها وتفردينها من الان بيتزا صغيرة بدون حشوة وزي ما سويتي بالتوست
حطي العجينة بعد ما تفردينها وتقصيها دوائر في صياني مفرقه الين تجمد ثم تجمعينها اذا ثلجت في كيس او علب بلاستك واذا بغيتي تستخدمينها طلعيها مباشرة وفرقيها في الصياني الين تذوب انتبهي تخلينها تذوب على بعض وتخرب فرقيها وهي جامده واذا ذابت بس حطي حشوة البيتزا والجبن والزيتون وعلى الفرن
اهم شي لا تتكلمين عند احد انك تفرزنين ولا تقولين انك شريتي من تاجرة لو اشتريتي عشان ما يجيك امر من السلطات العليا
قولي انا سويتها برسل لكم الطريقة وسوي تصوير لاي طريقة في الانستقرام زي اللي طبختيها وارسليها وكيفهم يحسون انها مختلفة او متشابهة طنشيهم
لانهم لو قلتي مشتريه من تاجرة بيجيك امر وبيطالبك بالطبخ لهم
فانت سوي اللي يريحك وزوجك تفاهمي معه
قولي مو صحيح يروح علي رمضان اطبخ لعشيرة يوم ايه ويوم لا
عشان ما اطق واطققك بالشكوى اللي ممكن بيوم توصل للمشاكل مالها حل خلني ادور راحتي واسوي امور تساعدني على اللي يصير

انتي نفس وضعي من ناحية الطبخ لكن الحمدلله بيتي رغم تعبي وحوسة الورعان احاول اخليه دايم مرتب
لكن مشكلتي بالطبخ مره ما اهواه وغداي اما كبسه.او ايدام ورز او معرق والعشى احتاس فيه ودي انوع لكن مادري وش اسوي مؤخرا صرت اسوي سندوتشات بعض الاحيان ومع هذا زوجي ومع انه مايتشرط لكن يقول ترى ذبحتينا بالسندوتشات يحب الاكلات الشعبيه واحس الطبخ اللي فالنت ماتتوفر مقاديره كلها عندي وانا من الناس اللي لو ينقص غرض واحد ابطل وماحب اسوي
وسبحان الله اي طبخه جديده اسويها ماتضبط معي والحلى زوجي يموت فيه لكن انا احب اسوي انواع بسيطه ماحب الحلى الحوسه اللي مقاديره واجده ويخليني اجلس ساعات بالمطبخ واخر شي يخرب
برمضان صحيح املي السفره لكن ماكون راضيه عن نفسي يعني احس ماسوي باتقان غير الشربه والايدام الفطاير حلوه لكن ماعرف انوع بالحشوات ماعندي غير جبنه تونه واحيانا بيض او دجاج والحلي ماسوي غير صنف واحد واعيش رعب انه ممكن مايضبط
وجربت لما انام وانا عارفه ان الفطور انا اللي بسويه احس ان مخي حتى وانا نايمه يشتغل وافكر بالفطور واقوم وجسمي ونفسيتي زيرو
لكن الحمدلله زوجي مايعزم غير مرتين او ثلاث واحيانا يجونا ضيوف زياره من برى فاضطر اسوي لهم فطور
لكن من جد اشتقت لروحانية رمضان اللي فقدتها بسبب المرض يارب يارب مايدخل رمضان الا وانا متشافيه 😢