عاملتكم أكلة شامية بحتة ونادرا ما حدا يعرفها موجودة حصرا في دمشق
ولما رح تشوفوها رح تلاقو أنها أكلة كتير سهلة
بالمقابل مفيدة للأطفال وللحوامل وللمرضعات ولكل العائلة كمان
لأنو كل مقاديرها طبيعية بدون معلبات أو منكهات غير طبيعية ومتوفرة بكل بيت
وطبعا هي ضيافة طيبة وفاخرة لضيوفنا المميزين
مقادير أكلتنا
كيلو حليب طازج
كيلو برتقال من النوع الغني بالعصير وياريت يكون حامض شوي
3 ملاعق كبيرة ماء زهر واذا كان ماء الزهر من النوع المركز نكتفي بثلاث نقط فقط
سكر
نشاء الذرة
أول شي منجهز الكاسات اللازمة للبالوظة
الأكلة عبارة عن طبقتين
رح نبدأ بالطبقة الأولى وأكثرنا بيعرفها وهي المهلبية
تحتاج الى كيلو حليب (الكيلو هو 4 كاسات تماما)
كل كأس حليب يحتاج الى ملعقتي طعام ممسوحتين من السكر وملعقة من النشاء
منخلط النشاء مع كمية قليلة من الحليب ومنضيفهم للحليب والسكر ومنحركهم جيدا على البارد
ومنحطهم على النار منحرك تمام
ولما بيبدأ الحليب يغلي منتركه على النار 5 دقائق و منضيف كمية ماء الزهر
منحرك شوي ومنطفي النار
ومنصبه بالكاسات المخصصة للبالوظة
منصب المهلبية لثلثي الكاسة وممكن للنصف كمان حسب الرغبة
منحط المهلبية بالبراد مدة ساعة ليتماسك
منجهز الطبقة الثانية
تحتاج الى عصير كيلو من البرتقال مصفى ومحلى ب 3 ملاعق سكر
منترك كاسة عصير على جنب ومنضيف للعصير المتبقي 3 ملاعق نشاء
بنفس طريقة اضافة النشاء على الحليب
يعني أول شي مندوب النشا بشوية عصير ومنضيف النشا للعصير على البارد طبعا
ومنحط المزيج على النار مع التحريك المستمر حتى يغلي العصير
ولما بيغلي حيكون سميك جدا منضيفلو كاسة العصير
منحرك منيح ومنطفي النار مباشرة وفايدة هي الحركة أنو العصير
يكون فاتر مو سخن لما نضيفه على المهلبية
طبعا رح نضيف الطبقة الثانية على المهلبية بهالشكل ومباشرة على البراد ليبرد ويتماسك
ورح تستمتعو بطعم الحامض مع الحلو مع نكهة ماء الزهر اللذيذة
هادا غير الفوائد لهالأكلة الصحية
وصحتين وعافية للجميع
:) :) :)
fadya abd @fadya_abd
عضوة جديدة
يلزم عليك تسجيل الدخول أولًا لكتابة تعليق.
نزف المحاني
•
يعطيك العافيه
شكلها كثيييير مشهي وانا بحب نكهة البرتقال
بس سؤال اقدر اغير في الطبقه الثانيه يعني مره احط برتقال مره ليمون مره فراوله او مانجو وهيييك شغلات
شكلها كثيييير مشهي وانا بحب نكهة البرتقال
بس سؤال اقدر اغير في الطبقه الثانيه يعني مره احط برتقال مره ليمون مره فراوله او مانجو وهيييك شغلات
الصفحة الأخيرة