بانجن .. كيف اتعامل معه .. عصبببببببببببي

السلام عليكم

ياعمري انتي قطعتي قلبي

اول شي باين انكم تحبون بعض ومبين من تصرفه هذا انه يموت عليك ومشتاق لك موت

ويمكن تصرف بهالحدة بسبب ضغوط الدراسة والغربة وبعده عن الناس الي يحبهم وانتي اهمهم

والرجال بشكل عام يحب يحس بحنية زوجته ورحمتها له وتعلقها فيه

انا لو مكانك باصبر شوي لما يهدا واحس الجو ملائم بعد كذا ارسل رسالة من الرسايل الجاهزه من الجوال

مثل:

بأحجز على لندن
تذاكر وترحيل
"وآخذ" بدل هالقلب
"قلب" إصطناعي "!!
قلب اصطناعي مابه
إحساس ويميل!!
وظيفته للدم
يعطي إندفاعي!!
والقلب الاول
برسله " لك " بمنديل
واقول
خذ
هذا
السبب في ضياعي

......

وهذي رسالة ثانية:

ناج الحبيب الي توده وتغليه

ما دمت حي ودام عينك تشوفه

لو صد يشفع له معك حلو ماضيه

وحقه عليك انك تقدر ظروفه


باختصـــــــــــــــــــــــــار


شخص عطاني وده مانيب ناسيه

ومن شراني أنا دايم الدوم شاريه

........

وهذي رسالة فوق البيعه بعد :

ليتك رخيص عندنا
يوم صديت

ليتك مثل غيرك من الناس
عادي

......

اختاري الي تحسين انه يناسب موقفكم ويأثر فيه

او يمكن تحصلين رسايل احلى من عند اخواتك او اخوانك

وبعدين استني شوفي وش بيكون رده

وبعدها كلميه ولازم تنهين الموقف وتصفون الي بينكم

واذا شفتيه لان معك شوي .. وضحي له موقفك ونفس الي قلتيه لنا هنا من انه كان يرد عليك ببرود..الخ قوليه له

وان بروده كان هو السبب في انك ماكلمتي واكتفيتي برسايلك لانك تبين تحسين بشوقه لك

وانك يهمك تكونين مو ممله بالذات معه هو

وان هالشي حساس بالنسبه لك..(يعني اقلبيها عليه) بس بكلام كله ود وهدوء

وبعدها اذا شفتيه اخذ واعطى معك في الكلام كلميه عن شوقك له و وش صار فيك بعد مازعل وانك تعبتي عشانه

وبعدها عاتبيه على طريقة ردة فعله وانه كان مره قاسي معك وانه مجرد عتاب بسيط منه كفيل

بأنك تصلحين الموقف وتعالجينه

هذا الي عندي

لكن مهما كان لازم تنهين الموقف

وترا مثل هذي المواقف ملح الحياة الزوجية خصوصا ان بعد هالمواقف ترجع العلاقة اقوى

لأنها تخليكم تفهمون طبع بعض أكثر

اختي الغالية حلوة الاطباع
الله يجزاك خير على الرد
احس اني ارتحت شوي مع ان المشكلة ما تغير فيها شي
وربي محتارة احس ان رسالة الجوال ما راح تحل شي لا والعلة جوالي جوال النورس ما يرسل الا صفحة وحدة :(
بغيت اكسره ذاك اليوم
ياختي المشكلة انه مو هالمرة بس يقلبها علي تجيها حالات احيان اموت من القهر وما ابي احكي لاحد ابي يكون بينا خصوصية ولا ابي اشغل احد بمشاكلي وغير كذا احس احيان لو ما حكيت تنحل بس والله انقهر
مشكورة يا قلبي والله اني قاعدة الحين اريح نفسي بالفضفضة
على العموم ان شاء الله ربي يريح بالي ويهديه ربي :26:

يابعد عمري وقلبي..

لايضيق صدرك ولا شي..
معروف إن بداية أي حياة زوجية تكثر فيها المشاكل..
ليه؟؟!!
لأن كل طرف مابعد فهم الثاني..
ولا بعد عرف مقدار غلاه..
ولا بعد حس إنه تملك قلبه..
ولا بعد فهم تصرفات الطرف الثاني ومعناها...

اللي عليك...
لاتركزين على المشكله..
لان مافيه مشكله بالأساس....
إنما ركزي على إنتقاء الكلمات المناسبة في الوقت المناسب..
وركزي على الحيويه والإبتسامة والهدوء ...
حسسية بغلاه بدون ماتسفهينه وتسفهين مشاعره..
تقدرين بضحكه وكلمة بدلال تهدينه..وتنسينه وتمتصين غضبه..
بلاش مواجهات..وأنتَ كنتَ وانتِ كنتي..
في كل عتب..أو زعل خلي لسانك ينقط عسل..
ولفي بالمشاكل وأجدعيها ورا ظهرك..
لامن شاف ولا من دري..:o

اختي الغالية ونة خفوق
تدرين لنا سنة متملكين :(
وكيف ما فيه مشكلة
انا اتخيل !!
والله تدرين بعد ما قريت ردك مدري وش اقول ؟!!
ممكن اكون خلقت مشكلة وما فيه مشكلة
تدرين انا خايفة من ايش لو ما اعتبرتها مشكلة معناه اتعامل ولا كنه صار شي
طيب وشلون وهو ما يبي يكلمني وبعد اسبوع بتبدأ اختباراته يعني غصب ما اكلمه عشان ما اشغله ولا اضيق صدره
بس المشكلة لو زاد الموضوع سوء واعتبرني ما اهتميت :(
لا تقولين ما فيه مشكلة يمكن لاني ملخبطة وشارحتها باختصار بس والله متضايقة
على العموم احس فعلاً خففتوا علي شوي وفضفضت :)
الله يجزاك خير وادعي لي والجميع لا ينسون يدعون لي

اوكي حبيبتي..
معك حق..فيه مشكله..
بس القصد لاتخلين منها مشكله..

الحياة مليانه مشاكل...
لو كل مشكله بنوقف عندها وندقق بنتعب..

اوكي زعلان..
أتصلي فيه ولا تقولين أنتَ الغلطان..أنتَ مشغول..
حتى تحصلين اللي تبين مع زوجك..خليكِ مرنه..
أعتذري..وقولي ابشر باللي يرضيك..
وقولي كلام يلين قلبه..
يا اختي أفهميني تكفين..:23:
كليه أكل بالحكي..أرضيه بأسلوبك وكلامك..
بيثقل عليك بس والله بتسبهينه من طريقتك واسلوبك وتعاملك..
مو تعاملينه كند لك...تهاجمينه كل لحظه..
او متهم في قفص الإتهام تبينين له خطأة وذنبه..
خلك ذكيه..تتقلص المشاكل..ويرتاح لك..
وترتاحين وتخف الضغوط النفسيه عليكم..


أسأل ربي يهديكم ويسعدكم ويسمح أمركم..:26: