باي حق وشنو ذنبها تسمى مطلقة؟!

هلا خواتي شلونكم عساكم طيبين ؟.

المهم اليوم ابي اتناقش وياكم بموضوع فترة الخطبة وهالسوالف وابي منكم تجاوب
يالله ببدا.
الموضوع يقول: في بعض المجتمعات الخليجية اللي عندهم عادات الله يهديهم تهد الحيل
فمثلاً: الحين اللي نعرفه ان البنت اذا انخطبت يشوفها الريال اللي هي (النظرة الشرعية)
لحد هني الوضع اوكي طيب وبعدين شافها واعجبته وعجبها بالشكل.(شنو الدعوة بس شوفني واشوفك) اللي ابي اتوصله
ليش مايكملون معروفهم ويخلونهم يتعرفون على بعض اكثر في فترة الخطبة يعني يتعرفون على اطبايع بعض وياخذون على بعض على شان يكسرون الحواجزاللي مالها داعي ويمونون على بعض بس بحدود ويبعدون عن الرسميات المملةاللي تسبب الضجربعدالزواج وبعدين تصير عيشتهم روتينية بحتة . والواحد على شان يتجنب هالاشياءيغتنم فترة الخطبةويخليهم يتواصلون مع بعض بالتليفون بس مو كل يوم يعني بين فترة وفترة ، وعلى شان جذا لازم تكون فترة الخطبة طويلة وفترة الملكة قصيرة. وطبعاً مايكلمون بعضهم الا بعد اذن وموافقة
الاهل وبالاخص اهل البنت ؛على الاقل يعرفها وتعرفه ويفهمها وتفهمه اكثر انا ما اشوف فيها شي فالبنت قاعدة تطلع وتدخل وتحاجي السواق وتحاجي اللي يبيع وهذولي ماراح تربط فيهم اي صلة(شنو هالتناقض؟ تناقض بعينه وعلمه بصراحة!) شفيها اذا كلموا بعضهم قبل الملكة يعني بفترة الخطبة على الاقل ماتنظلم البنت باسم مطلقة على غير فايدة .وهذا راح ياثر حتى على سمعتها ليش تطلقت بفترة الملكة وشلون ووووووووووووالخ. ببين لكم اكثر:
فمثلاً:اذا كلموا بعض اوطلعوامع بعض بعد الملكة واختلفواعلى شي او اكتشفوا شي بانفسهم وحسوا انهم ماراح يقدرون يستمرون مع بعض واتفقوا على الانفصال (الطلاق بفترة الملكة) وتاليتها يسمونها مطلقة!
باي حق يسمونها مطلقة وشنو ذنبها وهو مادخل عليها ولاشي ولاصار حتى زواج .اللهم عقد بس.
فانا اقول لبعض الاهالي يتداركون هالامر ويغتنمون فترة الخطبة.
حرام والله بعض هالبنات صغار بالسن اذا سالتيها قالت لج : انا مطلقة بس ما دخل علي طيب باي حق تسمين نفسج بها لاسم؟! والله شي عجيب.واذا سالتيها ماتدرين عنه من اول ما كلمتيه؟ قالت:لا وترد وهي مفزوعة ومتخرعة:لا ماعندنا جذا ممنوع اهلي مايرضون.
واذا سالتيها ليش ما يرضون اذا كانوا دارين وباذن منهم اهلج وموافقته هو تكلمينه؟ قالت: هذي عاداتنا وتقاليدنا. طيب ما نقول اكفروا ؛ الشي هذا مايصير الا جدامكم وبموافقتكم.الله سبحانه شيقول:(لاتواعدوهن سراً) مثل ماترضون على بنتكم تكلم الي بالسوق والسواق وغيرهم عشان حاجتها
خلوها تحاجي مستقبلها لان هذي عشرة عمر ماهي بلوزة او شنطة اذا ما صلحت تترجع اوتتبدل. على الاقل يمديها تتراجع عنه اذا حصل شي قبل ما يطيح الفاس بالراس.
بس انتبهوا لاتفهمون غلط. يكون عن طريق التليفون بس بدون مقابلات وخرابيط.

والشي الثاني بموافقة اهل البنت بالذاتوموافقته هو اللي خاطب. وناطرة ردودكم.
ملاحظة: لا تحطون في بالكم اني معترضة على الشرع ومصطلحاته لا انا معترضة على تصرفات بعض الاهالي.بامكانهم يتداركون مثل هذي الامور والواحد لازم يتسبب.وشاكرة لكم.