بتعرسين قريب ؟؟ ... تعالي يا بنيتي اقول لك شي

السلام عليكم ورحمة الله وبركاته

حياك الله يا عروستنا الحلوه

شوفي يا بنيتي ( مو عاد قلت لك يا بنيتي تحسبوني عجوز خخخخخخخ )
انا لاني اخصائيه نفسيه ولا عالمة اجتماع وقدري ادربي راسي مثل ذالعالم لكن من القهر اللي فيني ما ودي تضيع اعماركن وتنطفي سعادتكن

الاحظ اغلب بنات هاليومين الا من رحم ربي .. ضيعوا احلى ايام عمرهم واجمل سنينهم وقمة شبابهم بالنكد !! نكد نكد نكد هو وزوجها ووش السبب ؟؟

الماديات

بعض البنات صايرات الله يهديهن مادياااااااات جدا لدرجة انها خربت على نفسها هي بالدرجه الاولى عشان تثبت للناس انها كشخه وان زوجها بطران .. لاهي ارتاحت ولا ارضت الناس ورضى الناس غايه لا تدرك

فلانه من الناس ضيعت احلى فترة بالزواج وهي فترة الملكه بالتجهيز للعرس ما تشوف قدامها لا زوجها ولا مستقبلها ولا المسؤوليات اللي قدامها .. ما تشوف الا زواج بنت خالتها وزواج بنت عمتها ولااااااااازم يصير زواجها احلى منهم عشان ما يقولون زوجها مسيكين وماخذه واحد على قد حاله .. الابو يطلع من الزواج مديون والام عليها اسلاف فلوس ومجوهرات من فلانه وعلانه .. طيب معليش سوي زواج وامبسطي انتي وزوجك واهلك واحبابك لكن لا تسوينها منافسه وحرب مع مجتمعك واللي حولك وتنسين نفسك ترا الايام الحلوه ما ترجع ..


فلانه الثانيه آخر همها بشهر العسل زوجها .. اهم شي تسافر !! وتسافر لبد غالي وغريب أومحد راح له من قبل واهم شي الدرجه الاولى في الطياره لو ما راحت الدرجه الاولى قلبتها نكد وتزعل .. والفندق لازم اغلى شي حتى لو مو مريح اهم شي اذا سألوها الناس وين سكنتي تقول سكنت بالمكان الفلاني وسافرت اوروبا والا المالديف والا هاواي والا والا والا واذا ما ما حصلت اللي تبيه نكدت عليه وزعلت ... غير الدوران بالاسواق عشان تجيب ملاابس وشنط كشخه عشان الناس وتروح سفرة شهر العسل دوران بالاسواق ... طيب بلله بسالك ؟؟ كم مره بتسافرين شهر عسل ؟؟ وسعادتك انتي ؟ وسعادة زوجك هالمسكين اللي جلس سنين يحلم بسفرة شهرة العسل وحط قرش على قرش عشان يستانسون ؟ ترا سفرة شهر العسل مره وحده بالعمر لا تضيعينها بالنكد ولازعل ... اضحكي واستانسي واستمتعي بوقتك في اي مكان وعلى اي درجه واتركي عنك الناس والاسواق لاحقه عليها .. بتجيك ايام تقولين ياليت يسافر فيني او حتى يطالع بوجهي


فلانه الثالثه عاد الله يهديها .. مو رايحه لاهلك عشان ما عندي لبس حلو ... وش يوديني عند حريم اخوانك وانا ما عندي شنطه ماركه وكلهم معهم ويقهروني ... صاحباتي بالجامعه كلهم يلبسون نظارات سلفاتوري فيراقامو وكفالي
وتبدا تلحن على الرجال وتدخل في منافسات مع اهله وحريم اخوانه وتروح حيااتها نكد بنكد ..
وكل وحده عاد وزوجها .. اللي زوجها طيب وعلى نياته يروح يتسلف عشان يرضيها .. واللي زوجها عصبي يصك الباب بوجهها ويروح للاستراحه ..

انا اقوووووووووول
يا بنوتااااااااات .. يا حلوااااااااات ... ترا العمر قصييييييير ...استمتعي بأحلى ايام عمرك
والله مو نافعتك فلانه ولا علانه ولا شناط الماركات ولا السفريات ولا كل الماديات .. ولاهو جايك من المقارنات والمنافسات الا التعب والقلق والتوتر في علاقتك مع زوجك

تراك اذا التفتتي يوم من الايام بتلاقين علاقتك مع زوجك صارت ضعيفه .... ويكون كون عنك افكار معينه ما تتغير وبعدين تجين تقولين زوجي تغير .. زوجي ما يقعد بالبيت .. زوجي دايم قدام التلفزيون او النت او بالاستراحه
زوجي يحب يسافر مع ربعه ما يحب يسافر معي

وسنين عمرك يا حلوه راحت بالركض ورا المظاهر .. لا رضيتي عن نفسك ولا رضو عنك الناس