بجد غريبة

السلام عليكم

انا متاكده موضوعي راح ينحذف ميه بالميه بحجة عدم انتقاض العضوات

بس الصراحة عندي كلام وبدي احكيه

يا ترى القصص الي بتنكتب بالمنتدى صدق؟؟ ولا خيال ولا كذب؟؟؟ وحده فاضية حكت اكتب قصه من تاليفي؟؟

معقول في زي هيك بالدنيا الم وخيانه وكذب وقهر؟؟؟

يعني مو مصدقة لما تيجي وحده تحكي امي وابوي منفصلين ((للعلم بحس 90% من القصص اول كلمة هاي بتنكتب)) وكانت حياتي بائسة وبابا ما بعرف شي عنا وكان قاسي جدا جدا وامي تحملت وصبرت او امي ما شفتها من سنين او امي قاسية علينا كتير وما بتسال عنا (( بعدين لازم القصة تكمل ببهار الي هو المس او الجن او العين والحسد))

سبحان الله لازم يكون الام او الاب واحد فيهم ممسوس او محسود (( والبهار الجديدة تخيلوا مين ممكن يكون الحاسد العم او زوجة العم او الزوجه الثانية او الجاره الي كان نفسها بالبنت او الخدامه او ممكن راعي البقالة الهندي ))

بعدين نيجي للمنعطف الجديد ...ابوي زوجني بدون علمي او رضاي وبالغصب ما كنت بعرف بالزواج غير يوم زواجي وطبعا المهر بكون الاب سارقه والام موافقة على الزواج و البنت ((جميلة ومثقفة ومتعلمه وعندها طموح جدا جدا عالي )) بتتفاجا بين يوم وليله انها تزوجت وصارت ببيت زوجها

يعني انتو بتحكوا عن اباءكم الي هم بكونوا من اهل السعودية الناس الي متربية على الدين الاسلامي وعلى الصلاة وعبادة الله يعني ممكن تحكوا اب من دولة افريقية زوج بنته من شان الفلوس بتتصدق او واحد مو قادر يطعمي بنته راح زوجها عشان يخلص بتتصدق ..بس يزوجها هيك عشان يظلمها وبالسعودية((وين شرط موافقة الابنه ...الشيخ ما بسال عندكم وقت عقد القران عن موافقتكم؟؟؟ عن استلامك للمهر؟؟ عن شروطك؟؟ مافي شهود للزواج؟؟))

بعدين نيجي للمنعطف الجديد بعد الطفولة التعيسة والاهل الاشرار والزواج القصري الي هو الزوج

طبعا الزوج كل صفات العالم السيئة فيه ...زوج بخيل حارمها من الخبز ..زوج اناني ..زوج عصبي .. وحتى اهله ناس مش من البشر زوج ظالم وكمان مغازلجي بعاكس بنات طبعا حسب تطور القصة من كل اشي انه يكون بغازل بالتلفون او بالمسجات او على النت او يطلع معها او حتى يتطور الموضوع ويكون بزني معها

والزوجة المظلومة المكسورة شايفه كل شي وال مو قادره تتكلم خايفه يعصب عليها..غير الضرب لازم ما ننسى هدا البهار الخطير بالقصص ويتنوع نوع الضرب من الضرب العادي الى الكف الى الطرد الى الضرب بلوح زجاج او عصاية او قشاط

وكل هدا الانسان الصابرة ساكته على الاهانه عشان شو ما بعرف كل مره حجه يا انها ما بدها تطلق يا عندها صغير يا انها حامل طبعا الحمل بسير من اول ليلة من اول شهر وخلاص تورطت

وكمان لازم يكون بشرب خمر او يكون تاع مخدرات

وهي مسكينه ومضحية وخايفة من الطلاق ومن المجتمع ومو عارفه شو تعمل باطفالها مع اهل وحوش وزوج شيطان

خواتي انا اسفه بس معقول في هيك؟؟؟ يعني بعرف الدنيا فيها ابيض وفيها اسود ..بس معقول في هيك قصص انا مو طفله انا انقرصت كتير بحياتي بس مو متخيلة في بشر مثلا هيك او حياة مثل هيك والقصص الي زي هيك بتنزل كتيييييييييير

خواتي بدي اياكم قبل ما تنزلوا اي موضوع اقرؤوا الجملة المكتوبة

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))

قبل ما تطبعي كلمة احكي الله راح يحاسبني على كلامي مافي داعي للقصص المبالغ فيها لانه احنا هون اخوات بنتشارك الام بعض وهموم بعض ونسمع لبعض بس المبالغه والتاليف مافي داعي اله ...انا لسة مقتنعه ان الدنيا لسه بخير والناس كويسين والحياة اذا عشر ايام كانت سودة اليوم 11 بكون حلو

ودمتم بخير