بحاجة لأفكاركم ..

السلام عليكم ،،

أولا وقبل كل شيء .. حبيباتي انا مو جاية أفش خلقي وبس .. لا انا حابة اعرف شلون لازم الزوجة تقرب زوجها منها لو حست ان في شوية تباعد صاير بينهم ..

انا حديثة عهد بالزواج .. صارلي 7 شهور ..
حياتي معاه حلوة ولله الحمد .. بس شيء عادي ان يصير بين اي اثنين اختلاف في الآراء ويصير شد وجذب ..
بس بالأخير نتصالح وترجع الأمور طبيعية ..

انا لحد الحين ما صار معي حمل .. وما ادري ليش .. لأني ما رحت عند طبيب .. لأن زوجي يقول انه مو مستعجل ..
وفي ناس كثير حملوا متأخرين .. فهو حابب ينطر أكثر ..

هذا الموضوع .. يسبب لي انا حرج .. خصوصا معه .. لما يوجه لي عبارة تجرحني ..
احيان يقول لي بعد العلاقة .. لو جات بنت بنسميها كذا ولو ولد بنسميه كذا ..
وكأنه متأكد ان بيصير حمل .. وانا بقوله الله كريم .. وبسكت ..
احيان يقول لي شنو وضعك الحين .. متى بتجيبين لي ولد .. وانا اقوله الله كريم ..


وفي شغلة كمان كثير بتضايقني فيه .. صارت من قبل .. واليوم بعد صارت فحسيت نفسي مخنوقة ومحتاجة رأيكم ..
من بعد ما ملكنا .. كانت اتصالاته فيني متوسطة .. لا هي كثير ة ولا قليلة .. بمعدل مرتين في اليوم مثلا ..
فترة الخطبة .. كانت تمر علي اوقات ما يسأل علي فيها ..
يعني يكملني في الليل .. وانام واصحى اروح الجامعة وأرد .. وللمساء يلا يدق يسأل شخبارك !!
كنت اتضايق .. اقول ليه ما يسأل عني .. وأكثر من مرة لمحت له ان دا الشيء مو حلو انه ما يسأل علي ..

فكان رده ان لو انا ما كلمتك انتي كلميني .. وفعلا كنت اسويها اني اتصل فيه اكلمه .. او ادزله مسج ..
بس لو ما اتصلت .. عشان اشوفه بيسأل عني او لا .. ما يتصل إلا مرة باليوم !!

اتزوجنا الحين .. وصرنا ع طول مع بعض .. فلو راح الدوام .. احيان يتصل الظهر يسأل علي واحيان لا ..
انا ابرر اقول انه انشغل وما قدر يتصل .. وأعذره ..

بس ايام الجمع .. لما اروح بيت ابوي .. اظل من الصبح لليل ما يتصل ولا يسأل عني ..
إلا لما يبي يجي ياخذني .. يتصل يقول جهزي نفسك ..!!
وبعد كنت أصبر نفسي واقول مشي الموضوع ..

عاد امس كان بسافر يوم وبيرجع .. فما راح اقدر اني اظل لوحدي في الشقة ..
نمت في بيت ابوي .. لأول مرة بعد زواجي ..
لما نزلني بيت ابوي ورجع الشقة .. دز لي مسج .. وبعد شويات دز مسج .. وكنت ارد عليه ..
عقب هو نام .. وأنا بقيت صاحية للصلاة .. ودزيت له مسج ورد علي ..
وانا كنت مخبرته لما يجي بيمشي يتصل فيني يطمني عليه ويودعني ..
نمت وصحيت بالـ 12 الظهر .. واستغربت ان تلفوني مافي منه ولا مسج ولا اتصال ولا اي شيء !!

قمت صليت وقلت بتفطر .. إلا وجاني مسج منه .. انه ما سافر بسبب شوية ظروف !!
استغربت انه ما اتصل فيني ولا خبرني من الصبح .. وانحرجت حتى اخبر اهلي انه ما سافر ..
لأن بيسألوني ليه ما اتصل فيك من الصبح وخبرك ؟؟ شنو ارد عليهم !!

رديت على المسج .. وما عاد اتصل ولا دز اي مسج !!
لحد المغرب .. ديزت له مسج لأني كنت متضايقة مرة ..
وقلت له الظاهر ان حياة العزوبية عجبتك .. ونسيت ان عندك زوجة لازم تسأل عليها .. لهدرجة مشغول وما عندك وقت تسأل عليّ ؟؟!!

عقب فترة كلمني وقال انه توه طلع من المسجد .. وظل يخبرني ليش ما سافر .. وانا اسمعه ومعصبة وبس اهز راسي ..

وبالـ 10 جا لي بيت ابوي وخذاني .. انا قلت صار له فترة ما شافني بقول لي وحشتيني ..
او بيعبر بأي طريقة عن انه افتقدني .. بس ما شفت منه ولا اي شيء ..
لدرجة انه حتى ما ضمني لما دخلنا الشقة !!
بدل ملابسه وطلع فتح التلفزيون وقعدنا تعشينا .. عقب انا دخلت الغرفة وقلت له يلا ننام ..
وفعلا دخل الغرفة .. وانسدح .. قال لي البارحة وحشتيني الشقة بدونك ماهي حلوة ..
وغمض عينه ونام !!

انا تضايقت مرة .. وتميت ابكي .. وطلعت من الغرفة وجيت اكتب لكم ..
ما ادري هل انا مكبرة الموضوع .. والله الي احسه واقع حقيقي ..
احس ان العلاقة بينا فيها فتور .. ماني عارفة مصدره ..
هل انا مني السبب .. هل المسج الي دزيتها ضايقته عشان جذي مو عاطني وجه ..
بس الفتور صار له اسبوع تقريبا .. انا ما ودي هالشيء يصير بينا واحنا لسه متزوجين ..
انا ادري انه يحبني والحمدلله .. ما أشك في هذا الشيء .. بس ليش تصرفاته صايرة جذي ..

ممكن تساعدوني شلون ممكن ارجع علاقتنا .. مبهجة .. براقة .. سعيدة .. حماسية ..