بحاجه تجاربكم ونصيحتكم يابنات 💕

مرحبا بنات 🖑
مساء الخير والعافيه عليكم جميعا 😍
حبيت اشارككم باللي امر فيه واتمنه استفاد من تجاربكم ونصايحكم ..
انا عمري 24 اتخرجت ولله الحمد والوظيفه بالطريق باذن الله
قبل فترة فاتحوني بموضوع زواج من ابن خالتي وآني الموضوع مو مرتاحتله ابد بس كلت خلي انطي فرصه لنفسي
وافكر بقيت بحاله قلق حته الليل مااكدر انام. الايجابيات اكثر من السلبيات حاولت اقنع نفسي صحيح شكله مو مقتنعه بي بس كلت ميخالف ممكن بالعشرة اتعود. بس بقت شغله اتخوفت منهة هواي انو الولد مريض بالسكر النوع الاول يعني من الطفوله بحثت بالنت وشفت تأثيرة عالرجل من ناحيه العلاقه وبحثت بغوغل وشفت تجارب البنات بهذا الموضوع((وهاي الطريقه اللي تعرفت بيهة عله منتدى عالم حواء ❤ )) صحيح اكو هواي حالات عايشين طبيعي بس بنفس الوقت شفت اكو البعض لا وشفت هواي بنات ناشرين بالمنتديات يعانون من هاي المشكله في ازواجهم لذلك خفت اخاف اوافق واتورط واخاف ارفض واتندم بقيت بحيييييييييرة 😤واسأل كل شخص.. امي حيرتهة وياي
كلت خلي اشوف رأي بابا بالموضوع وبابا رفض لان رافض فكرة زواج الاقارب وخصوصا وانو الولد مريض.. متتصورون بنات من بابا رفض شكد ارتاحيت كلت الحمد لله ما طلعت مني ...
بس بعدين خالتي كالت نقنع الوالد عادي الموضوع بسيط. رجعت للحيرة 😪 وصليت ودعيت ربي احس اذا اميل للموافقه معدتي تضطرب واديه ترجف بس شفت بداخلي مقاومه كبيرة ورفض للموضوع وأخير شي رفضت
المشكله انو حته بعد الرفض اعاني من التفكير وجلد الذات انو ممكن تكون فرصه وضيعتهة وكأنو شخصيتين موجودين براسي كل وحدة تكول كلام 💔 خصوصا واني رفضت شخص من قبل بسبب قله خبرتي وتجربتي بالحياة واندمت بعدين وصار عندي قله ثقه بقراراتي
ماتتصورون بنات صار شهرين شهر ال 12 وشهر 1 اني مو بحالتي الطبيعيه قلق وتفكير وخوف اشتاقيت لنفسي 😞
يجوز تكولون تبالغ بس والله اني بطبعي قلقه فمابالك بموضوع مصيري
خايفه يكون تصرفي خطأ من جهة ثانيه احس سويت اللي عليه خلاص والحياة كدامي
اتمنه تفيدوني بنصائحكم و اذا مريتو بتجربه مشابهة لا مانع تشاركونه بيهة 💕💕 آسفه عالاطاله 😘