السلام عليكم ورحمة الله وبركاته
اذكر مرة كتبت موضوع عن زوجي ومعاناتي معاه
وقتها كنت انسانة يائسة من نفسي وحياتي كنت بس اشكي واتحلطم
كنت اشوف نظرات الشفقة ع عيون اهلي وبعضهم يناظروني نظرات استحقار لشخصيتي الضعيفة
وكيف صابرة ع الاهانة المهم في يوم من الايام قررت اطلب الطلاق وألم عفشي كله وشلت عيالي معاي
وقلت اقدر اربيهم واعوضهم عن الاب كنت ببداية الانفصال سعيدة جدا حسيت بحرية وراحة بال
مافي احد ينكد عليك ويكدر حياتك بس بعدين حسيت بالوحدة
احساس يموت القلب وخصوصا اذا راحو عيالي لابوهم
انقلب انسانة ثانية بس ابكي من الوحدة والفراغ واشتااق لهم وخصوصا عيالي يحبون ابوهم كثثثثير
ويمكن اكثر مني واحيان يجلسون عند ابوهم اسبوع ومايبوني اجيبهم غصب عندي
وهم يبكون وهذا اللي كسرني وحزني ع حالي
قلت كفاية اخسر زوجي كمان اخسر عيالي مستحيل مابغى اطلع من هالزواج دام عشر سنين
وانا مو مستفيدة شيء
وشفت اللي كانو يحرضوني انفصل عن زوجي واللي يطبطب علي محد نفعني في وقت الشدة
كلن لاهي بحياته وبعياله
ومن ويومها وانا اشيل فكرة الطلاق من راسي واهلي معارضين رايي يبوني اتطلق
يقولون والله مايتغير ومن هالكلام
انا جلست افكر في نفسي وش سويت عشان اغيره واخليه احسن معاي
لقيت اني ماسويت شيء غير الصراخ والعصبية وبالنهاية صرت معاد اكلمه ولا اعطيه حقه الشرعي
الا بالحسرة وهالاساليب كلها غلط بغلط ماتجيب نتيجة
رجعت فكرت واستخرت برجعتي له
وقررت الرجعة ان كان فيه خير لي وان مارجعت فهو خيرا لي
وبيوم من الايام واحد من عيالي يبكي ومعاد ياكل يمكن ثلاث ايام ماطب حلقة لقمة ودايم يبكي
يقول ابي ماما تجي هنا اللي هو بيت ابوه بس مو راضي يجيني عند اهلي لا يبيني اجيه
وقرر ابوه يرجعني ورجعت بشروط والحمدالله
احس استفدت شيء واحد اني بينت له اني مارضى اعيش عيشة اهانة ومذلة ورجعت بكرامتي وكسبت عيالي والحمدالله
قدرت اتحكم باعصابي وغيرت زوجي بفضل الله
وبفضل تعاملي معاه
ويمكن الانفصال اعطاه درس يتعلم منه
والله اللي كانو معارضين ارجع ومستحقريني ولا فرحو برجعتي
الحين مايقدرون يحطون عينهم بعيني لأن شافو تغيير زوجي معاي وكيف صار يقدرني ويقدر اهلي وكمان
مسؤلية الام والاب في وقت واحد صصعععععععب جدا انا تعبت نفسيا لما احد من عيالي يمرض انا اوديه او اللي يبي بقالة
واللي يبي يتمشى تعبت جدا والحين
ولله الحمد احس رجعت شخصيتي بعد ماكنت مهزوزة صرت اهتم بنفسي
والبس واتمكيج اول حالتي قبل حتى لو بطلع زيارة لاحد ماحط شيء بوجهي كني بعزا
كنت كئيبة وشايلة هم الدنيا ع راسي
ماقولكم مره متغير لا تجي احيان يصير هواش او القاه بس ينافخ ومو عاجبه العجب عادي اخليه براحته الين مايهدأ
ويجي يتعدل احيان يعتذر واحيان لا بس يتودد لي وهذا يكفيني حس بغلطته
بس اول لا لما يهاوش او يرمي كلمة انط بحلقه واقلبها صراخ ولا استفيد شيء يستمر بغلطته
وانا استمر بصراخي
فالافضل لما يعصب او يزعل او مايسمع لك كلام طنشي قومي
سوي شيء تحبينه انا عن نفسي اقوم اسوي رياضة والله يابنات صرت ايجابية بشكل لا يتصور اول ماشوف النعمة اللي انا فيها
وبس اتحسر واقلب دور سالي الحين لا
دايم احمد ربي واشكره على النعم طول مانتي بامان وصحة وماكلة وشاربة هذي نعمة بحد ذاتها
واللي لها طموح تبدا تسعي له لا تخلي شيءء
هي نفسها فيه لازم تحاول وتثابر صدقيني بتقدرين
وبالنهاية لا تخلين الزوج هو كل حياتك مارسي حياتك وهواياتك وخلي الزوج جزء بسيط من حياتك
لا تكرسين كل يومك له لا خصصي لنفسك وقتك اهتمي فيها سوي رياضة او خلطات طبيعية للوجه والجسم والشعر
وتثقفي واقري كتب او بالنت مواضيع هادفة وخصوصا تطوير الذات
وتقربي الى الله اذا تصلين الفروض زيدي وصلي النوافل وصومي ايام البيض او ايام التطوع الخميس والأثنين
والاستغفار كل ماكنتي طفشانة او قبل النوم وصدقيني بتحسين براحة نفسية وتصيري انسانة رايقة
ماعاد تبين تعصبين او تزعلين من شيء
والله يوفق الجميع ويسعدكم يارب.